ᑐᑭᓯᓇᕐᑎᓯᒍᑏᑦ
ᑐᑭᓯᓇᕐᑎᓯᒍᑏᑦ
ᐁᑦᑐᑑᑕᐅᒍᓐᓇᑐᖅ ᐳᕙᓪᓗᓇᖅ | ᐳᕙᓪᓗᓇᐅᑉ ᖁᐱᕐᕈᑯᓗᖏᑦ ᑎᒥᒦᓕᕐᑐᑦ ᓱᒃᑯᑎᕆᓕᕐᓱᑎᓪᓗ. ᐃᓄᒃ ᐁᑦᑐᑑᑎᐅᒍᓐᓇᑐᒥᒃ ᐳᕙᓪᓗᑐᖅ ᖃᓂᒻᒪᓕᕈᓐᓇᑐᖅ ᐊᓂᕐᑎᕆᔭᐅᔪᒃᑯᓗ ᐃᕐᐸᑎᕆᒍᓐᓇᓱᓂ |
ᐋᓐᓂᐊᓯᐅᑎᒧᑦ ᓱᕐᕋᓗᑲᑦᑕᐅᓂᖅ | ᑌᒣᓕᑭᑕᖕᖏᑲᓗᐊᕐᓱᓂ, ᑎᒥᐅᑉ ᓈᒻᒪᒋᖕᖏᑕᖓᓄᑦ ᐋᓐᓂᐊᓯᐅᑎᒧᑦ ᓱᕐᕋᓗᑲᑦᑕᐅᓂᖅ. ᐋᓐᓂᐊᓯᐅᑎᒧᑦ ᓱᕐᕋᓗᑲᑦᑕᐅᓂᖅ ᑲᒪᒋᔭᐅᑦᓴᐅᑎᒋᖕᖏᑯᓂ ᑐᖁᒍᑕᐅᒍᓐᓇᑐᖅ. ᑌᒣᓕᑭᑕᖕᖏᑲᓗᐊᕐᑎᓗᒍ, ᐅᑕᕐᕿᖁᔨᓲᖑᓚᕿᔪᒍᑦ 15 ᒥᓂᑦᓯᓂᒃ ᐋᓐᓂᐊᕕᒻᒥᑦ ᐊᓂᖕᖏᑫᓐᓇᖁᔨᑦᓱᑕ ᐅᕕᓂᒃᑯᑦ ᖃᐅᔨᓴᕐᑕᕕᓂᕐᓂᒃ. |
ᒪᒥᓴᐅᑎᒃ ᐋᓐᓂᐊᓯᐅᑎᒃ | ᐋᓐᓂᐊᓯᐅᕐᑎᐅᑉ ᐋᓐᓂᐊᓯᐅᕐᑎᒪᕆᐅᓪᓘᓃᑦ ᐱᔭᐅᒐᑦᓴᓕᐊᕆᓲᖓ. ᐊᑦᔨᒌᖕᖏᑐᑦ ᒪᒥᓴᐅᑏᑦ ᑐᖁᑦᓯᒍᓐᓇᑐᑦ ᖁᐱᕐᕈᑯᓗᓐᓂᒃ, ᑌᒣᒻᒪᑦ ᐳᕙᓪᓗᑑᑉ ᐄᖃᑕᖏᑦ ᐊᑦᔨᒌᖕᖏᑐᓂᒃ ᐅᐊᕈᑎᒌᓂᒃ ᒪᒥᓴᐅᑎᑕᓖᑦ. |
ᒪᓗᓐᓇᐅᑎᖃᖕᖏᑐᖅ | ᒪᓗᓐᓇᐅᑎᓕᐅᑉ ᐊᑦᔨᒋᖕᖏᑕᖓ. ᐃᓄᒃ ᒪᓗᓐᓇᐅᑎᖃᖕᖏᑐᖅ ᒪᓗᓐᓇᐅᑎᖃᒡᒑᑐᕐᓗᓃᑦ(ᑎᒥᒥᒍᑦ ᐃᑉᐱᓂᐊᖕᖏᑐᖅ ᐊᑦᔨᐅᖏᑦᑐᓂᒃ). ᐃᓄᐃᑦ ᓯᓂᑦᑑᓂᕋᕐᑕᒥᒃ ᐳᕙᓪᓗᕈᑎᓖᑦ, ᐃᓚᖏᓪᓗ ᐁᑦᑐᑑᑎᐅᒍᓐᓇᑐᒥᒃ ᐳᕙᓪᓗᓇᖃᕋᓗᐊᕋᒥᒃ ᒪᓗᓐᓇᐅᑎᖃᓲᖑᖕᖏᑐᑦ, ᖃᐅᔨᔭᐅᕐᖃᔭᖕᖏᓂᕐᓴᐅᓚᕿᓲᖅ ᐳᕙᓪᓗᓇᖅ ᑌᒣᒻᒪᓗ ᖃᐅᔨᓴᕐᑕᐅᓂᖅ ᐱᒻᒪᕆᐊᓘᓚᕿᔪᖅ. |
ᖁᐱᕐᕈᑯᓗᒃ | ᒥᑭᔪᐸᐅᔮᓗᑦᓱᓂ, ᐃᔨᒻᒧᑦ ᑕᑯᑦᓴᐅᖏᑦᑐᖅ. ᐊᒥᓱᒻᒪᕆᐊᓗᐃᑦ (ᐱᓕᐊᓐ) ᖁᐱᕐᕈᑯᓗᑦᓴᔦᑦ. ᐊᒥᓱᑦ ᓱᒃᑯᑎᑦᓯᒍᓐᓇᑐᑦ ᐃᓄᒻᒥᒃ ᐃᓚᖏᓪᓗ ᐱᒻᒪᕆᐅᒻᔫᒐᓗᐊᑦ ᖃᓄᐃᖕᖏᓯᐊᕐᑎᓯᒍᑎᐅᒍᓐᓇᒥᒐᒥᒃ (“ᖁᐱᕐᕈᑯᓗᑦᓯᐊᑦ”- ᓚᔭᐅᓲᑦ). ᐃᓚᖏᑦ, ᐅᑦᑑᑎᒋᓗᒍ ᐳᕙᓪᓗᓇᐅᑉ ᖁᐱᕐᕈᑯᓗᖓ, ᓱᒃᑯᐃᒍᓐᓇᑐᑦ ᐃᓅᑉ ᑎᒥᖓᓂᒃ. |
ᑲᐴᑎᐅᑉ ᐃᓗᓕᖓ ᐳᕙᓪᓗᓕᕇᒃᑯᑎᒃ BCG | ᑲᐳᑎᐅᑉ ᐃᓗᓕᖓ ᐳᕙᓪᓗᓕᕇᒃᑯᑎᐅᒍᓐᓇᑐᑐᐊᖅ. ᓄᓇᕕᒻᒥ ᓄᑕᕋᓛᑦ ᑲᐱᔭᐅᖁᔭᐅᓲᑦ ᐅᐱᓐᓇᕋᓂ ᐱᐊᕋᐅᑉ ᑎᒥᖓ ᐃᕐᐸᑎᑦᓯᑌᓕᒐᓱᐊᕐᖃᔭᖕᖏᓂᕐᓴᐅᒪᑦ ᐳᕙᓪᓗᓇᐅᑉ ᖁᐱᕐᕈᑯᓗᖓᓂᒃ ᐊᓯᖏᓐᓄᑦ ᑎᒥᖓᓃᑦᑐᓄᑦ (ᐃᓚᒋᔭᐅᑎᓪᓗᒍ ᖃᕆᑕᖓ). BCG ᑲᐴᑎᐅᑉ ᐃᓗᓕᖓ ᐃᑲᔪᕐᓯᒪᓱᖅ ᑖᓐᓇ ᐱᐊᕋᖅ ᐁᑦᑐᑑᑕᐅᒍᓐᓇᑐᒥᒃ ᐳᕙᓪᓗᓕᑦᓴᐸᑦ, ᐃᕐᐸᑎᑦᓯᑌᓕᒍᑎᐅᒐᒥ ᑎᒥᖓᓂ. BCG ᑲᐱᓯᒍᑎᐅᖁᔭᐅᓲᖑᖕᖏᑐᖅ ᐃᓅᓱᑦᑐᓂᒃ ᐃᓄᒻᒪᕆᐅᓕᕐᑐᓂᓪᓗ. |
ᐊᐅᖏᕐᑕᐅᓂᖅ | ᐊᑑᑎᔭᐅᓲᖅ ᖃᐅᔨᒐᓱᐊᕈᑎᐅᑦᓱᓂ ᐳᕙᓪᓗᓇᐅᑉ ᖁᐱᕐᕈᑯᓗᖓᓂᒃ ᑎᒥᒻᒦᑐᒥᒃ ᐅᕝᕙᓗᓐᓃᑦ ᓇᐅᑦᓯᑐᕈᑎᐅᑦᓱᓂ ᖃᓄᖅ ᑎᒥᒃ ᐃᑲᔪᕐᓯᒪᔭᐅᑦᓯᐊᕋᓗᐊᕐᒪᖔᑦ ᐋᓐᓂᐊᓯᐅᑎᑐᕐᑕᐅᔪᓄᑦ. ᐋᓐᓂᐊᓯᐅᕐᑎ ᑲᐴᑎᒧᑦ ᐊᐅᖐᕐᓯᓲᖅ (ᑕᓕᒃᑰᕙᓪᓗᓲᖅ). ᑕᑯᓗᒍ ᐊᐅᒋᕐᑕᐅᓂᖅ (ᒪᑉᐱᒐᖅ 78). |
Cardex ᐊᓪᓚᑕᐅᓯᒪᕕᒃ ᐋᓐᓂᐊᓯᐅᕐᑕᐅᖃᑦᑕᑑᑉ ᖃᐅᔨᒪᔭᐅᒍᑎᖓ | ᖃᕆᑕᐅᔭᒃᑰᑐᖅ ᐱᓇᓱᒍᑎᒃ ᐳᕙᓪᓗᑐᓕᕆᔩᑦ ᐊᑐᓲᖓ ᖃᐅᔨᒪᒍᑎᒋᓂᐊᕐᓗᒍ ᓇᓪᓕᐊ ᐊᓐᓂᐊᓯᐅᕐᑕᐅᖃᑦᑕᑐᖅ ᖃᖓ ᑕᑯᔭᐅᒋᐊᖃᕐᓂᐊᓕᒻᒥᒪᖔᑦ ᐱᓇᓱᐊᕈᓯᕐᒥ ᓇᓗᓀᕐᓯᒍᑎᐅᓲᒍᑦᓱᓂᓗ ᓯᕗᓂᕐᒥᒃ ᑕᑯᔭᐅᓂᑦᓴᕆᓛᓕᕐᒥᔭᖏᓐᓂᒃ. ᐱᒻᒪᕆᐅᕗᖅ ᐃᑉᐱᒍᓱᑦᓯᐊᖃᑦᑕᕆᐊᖃᕐᓂᖅ ᑕᒡᒍᖔᔦᔪᖃᓕᕈᓂ ᖃᐅᔨᒪᒍᑎᑦᓴᐅᔪᓂᒃ ᓱᕐᕃᑐᐃᓐᓇᕆᐊᖃᕐᒪᑦ ᐃᓅᑉ ᐋᓐᓂᐊᓯᐅᕐᑕᐅᒍᑎᖏᑦᑕ ᖃᐅᔨᒪᔭᐅᒍᑎᖏᓐᓂᒃ ᓯᕗᓂᕐᒥᓗ ᑲᒪᒋᔭᐅᒍᑎᒋᒋᐊᓕᖏᓐᓂᒃ. |
ᐋᓐᓂᐊᕕᒻᒥ ᑲᐅᔨᒐᓱᐊᕐᑕᐅᒋᐊᓪᓛᓂᖅ | ᑖᓐᓇ ᐊᑑᑎᔭᐅᓲᖅ ᑐᑭᑖᕈᑕᐅᓂᐊᕐᓗᓂ ᐃᓄᒃ ᖃᐅᔨᓴᕐᑕᐅᒋᐊᓪᓚᕆᐊᖃᕐᒪᖔᑦ. ᐋᓐᓂᐊᓯᐅᕐᑎ ᐊᐱᕆᒐᔭᕐᑐᖅ ᐃᓄᒻᒥᒃ ᖃᓄᐃᖕᖏᑲᓗᐊᕐᒪᖔᑦ, ᐅᖁᒣᓐᓂᖓᓗ ᑭᑦᑎᑕᕐᓗᒍ, ᐳᕙᖏᓪᓗ ᓈᓚᓪᓗᒋᑦ ᖁᖓᓯᖓᓗ ᐳᓪᓕᖏᒃᑲᓗᐊᕐᒪᖔᑦ ᖃᐅᔨᒐᓱᐊᕐᓗᒍ. ᑕᑯᓗᒍ ᐋᓐᓂᐊᕕᒻᒥ ᑲᐅᔨᒐᓱᐊᕐᑕᐅᒋᐊᓪᓛᓂᖅ (ᒪᑉᐱᒐᖅ 65). |
ᓄᓇᓕᒻᒥᒃ ᐃᓕᓐᓂᐊᑎᑦᓯᓂᖅ | ᖃᓄᐃᖕᖏᓯᐊᕐᓂᒨᓕᖓᔪᓂᒃ ᖃᐅᔨᒪᔭᐅᑎᑦᓯᓂᖅ ᓄᓇᓕᒻᒧᑦ ᑐᑭᓯᔭᐅᓂᕐᓴᐅᒐᔭᕐᑐᑎᒍᑦ. ᓄᓇᓕᒻᒥᒃ ᐃᓕᓐᓂᐊᑎᑦᓯᓂᖅ ᑐᕌᒐᖃᕐᑐᖅ ᖃᐅᔨᒪᓂᕐᓴᐅᑎᑦᓯᒐᓱᐊᕐᓂᒥᒃ ᑐᑭᓯᒪᓕᐅᒥᑎᑦᓯᒐᓱᐊᕐᓂᒥᓪᓗ ᖃᓄᐃᒍᑎᐅᒍᓐᓇᑐᑦ ᖃᓄᐃᖕᖏᓯᐊᓂᐅᒍᓐᓇᑐᓪᓗ ᐱᓪᓗᒋᑦ. ᐅᑦᑐᑎᐅᒍᓐᓇᑐᑦ ᑌᒣᓗᕐᓂᒧᑦ, ᐊᑭᓐᓇᒥᐅᑌᑦ, ᖃᕆᑕᐅᔭᒥ ᑮᓇᖃᕐᕕᑯᑦ (Facebook), ᓈᓚᐅᑎᒃᑯᑦ ᓄᓇᓕᒻᒥᓗ ᓱᓇᓱᐊᕐᑎᓯᓂᒃᑯᑦ. |
ᓄᓇᓕᒻᒥ ᖃᐅᔨᓴᕐᓂᖅ | ᓄᓇᓕᒻᒥ ᖃᐅᔨᓴᕐᓂᖅ ᐊᑑᑎᓲᖅ ᐊᒥᓱᐃᑦ ᖃᐅᔨᓴᕐᑕᐅᖁᔭᐅᓕᑐᐊᕐᒪᑕ (ᓄᓇᓕᓕᒫᖑᒍᓐᓇᑐᐊᓪᓛᑦ), ᖃᐅᔨᓴᕐᑕᐅᒍᑎᖃᓚᖓᓗᑎᒃ ᐁᑦᑐᑑᑕᐅᒍᓐᓇᑐᒥᒃ ᓯᓂᑦᑑᓂᕋᕐᑕᒥᓪᓘᓃᑦ ᐳᕙᓪᓗᒪᖔᑕ, ᒪᓗᓐᓇᐅᑎᖃᖕᖏᑲᓗᐊᕈᑎᒃ. ᓄᓇᓕᒻᒥ ᖃᐅᔨᓴᕐᓂᖅ ᓇᕝᕚᕈᑎᐅᒍᓐᓇᓲᖅ ᐳᕙᓪᓗᓇᕐᒥᒃ ᖃᐅᔨᔭᐅᒐᔭᕐᓯᒪᖕᖏᑐᒥᒃ ᐱᒻᒪᕆᐅᑦᓱᓂᓗ ᓄᓇᓕᒻᒧᑦ ᐳᕙᓪᓗᓇᖃᕈᓐᓀᒍᑎᐅᒍᓐᓇᕋᒥ. |
ᓇᐅᑦᓯᑐᕈᑎᒃ ᐋᓐᓂᐊᓯᐅᑎᑐᑦᓯᐊᑐᖃᕐᒪᖔᑦ | ᐊᑐᕐᑕᐅᓲᖅ ᓯᓂᑦᑑᓂᕋᕐᑕᒥᒃ ᐳᕙᓪᓗᑑᑉ ᐋᓐᓂᐊᓯᐅᑎᑑᒪᓂᖓᓂᒃ ᖃᑦᓯᓂᒃ ᐄᓯᖃᑦᑕᒪᖔᑦ ᐅᓪᓗᒥ ᐃᓯᕕᒋᒋᐊᓕᒻᒥᓂ. ᐃᓄᒃ ᐄᓯᖃᑦᑕᕆᐊᓕᒃ ᐄᔭᐅᖁᔭᐅᓯᒪᔪᓂᒃ ᐅᓪᓗᖁᑎᖏᑦ ᒪᓕᓪᓗᒋᑦ ᒪᒥᑦᐸᓕᐊᑦᓯᐊᖁᔭᐅᒧᑦ. |
ᖃᐅᔨᒪᔭᐅᒋᐊᖃᖕᖏᑐᓂᒃ ᐅᖃᔭᐅᑎᖃᕆᐊᖃᖕᖏᓂᖅ | ᓲᓱᒋᔭᖃᑦᓯᐊᓂᖅ ᐃᓅᑉ ᐱᔪᓐᓇᐅᑎᖃᕐᓂᖓᓂᒃ ᑭᓇᒃᑯᓄᑦ ᖃᐅᔨᒪᔭᐅᖁᔨᒻᒪᖔᒻᒥ ᐋᓐᓂᐊᓯᐅᕐᑕᐅᒍᑎᒥᑕ ᒥᑦᓵᓄᑦ. ᐋᓐᓂᐊᕕᒻᒥ ᐱᓇᓱᐊᕐᑏᑦ ᐱᐅᕐᓯᕐᒥᒍᑦ ᐱᖁᔭᑎᒍᓪᓗ ᓲᓱᒋᔭᖃᑦᓯᐊᑐᑦᓴᔭᐅᔪᑦ ᖃᐅᔨᒪᔭᐅᒋᐊᖃᖕᖏᑐᓂᒃ ᐅᖃᔭᐅᑎᖃᕆᐊᖃᖕᖏᓂᕐᒥᓂᒃ. |
ᖃᓂᑕᓕᕕᓂᖅ | ᐃᓄᒃ ᓂᐅᕐᖃᑐᐃᓐᓇᕆᐊᓕᕕᓂᖅ ᐳᕙᓪᓗᓇᐅᑉ ᖁᐱᕐᕈᑯᓗᖓᓂᒃ (ᖃᓂᑕᓕᕕᓂᐅᓗᑎᒃ ᐃᓄᒻᒥᒃ ᐁᑦᑐᑑᑎᐅᒍᓐᓇᕉᑕᕆᔪᒥᒃ ᐳᕙᓪᓗᑐᒥᒃ), ᖃᐅᔨᓴᕐᑕᐅᖁᔭᐅᓕᕐᓱᓂᓗ ᓯᓂᑦᑑᓂᕋᕐᑕᒥᒃ ᐁᑦᑐᑑᑎᐅᒍᓐᓇᑐᒥᓪᓗ ᐳᕙᓪᓗᓕᕐᓯᒪᒻᒪᖔᑦ. |
ᖃᓂᑕᓕᕕᓂᕐᓂᒃ ᖃᐅᔨᓴᕐᓂᖅ (ᕿᓇᔭᕐᓂᖅ) | ᐳᕙᓪᓗᑐᓕᕆᔩᑦ ᐊᐱᕆᒐᔭᕐᑐᑦ ᐁᑦᑐᑑᑕᐅᒍᓐᓇᑐᒥᒃ ᐳᕙᓪᓗᓂᕋᕐᑕᐅᔪᒥᒃ ᑭᓇᒃᑯᓂᒃ ᖃᓂᑕᖃᖃᑦᑕᒪᖔᑦ. ᑖᒃᑯᐊ ᖃᐅᔨᓴᕐᑕᐅᒍᓐᓇᓯᖁᓪᓗᒋᑦ ᓯᓂᑦᑑᓂᕋᕐᑕᒥᒃ ᐁᑦᑐᑑᑎᐅᒍᓐᓇᑐᒥᓪᓘᓃᑦ ᐳᕙᓪᓗᒪᖔᑕ, ᓂᐅᕐᓯᔪᕕᓂᐅᑐᐃᓐᓇᕆᐊᖃᕐᒪᑕ ᐳᕙᓪᓗᓇᐅᑉ ᖁᐱᕐᕈᑯᓗᖓᓂᒃ. |
ᐁᑐᑦᑑᑕᐅᒍᓐᓇᓂᖓ | ᐋᓐᓂᐊᒃ ᐃᕐᐸᕈᓐᓇᑐᖅ ᐊᓯᖏᓐᓄᑦ ᐃᓄᓐᓄᑦ. ᐁᑦᑐᑑᑕᐅᒍᓐᓇᑐᖅ ᐳᕙᓪᓗᓇᖅ ᐁᑦᑑᑎᐅᓲᖅ, ᐃᓄᐃᓪᓕ ᐁᑦᑐᑑᐃᒋᐊᓪᓚᕕᖃᕈᓐᓀᓲᑦ ᐄᕐᖃᕆᐊᓯᔪᕕᓂᐅᓕᕋᒥᒃ ᐅᓪᓗᓂᒃ ᐱᓇᓱᐊᕈᓯᕐᓂᓗᓐᓃᑦ ᐊᒥᓱᒐᓚᓐᓂᒃ. |
ᖃᐅᔨᔭᐅᒍᑎᒃ | ᐃᓅᑉ ᐅᕆᐊᕐᑐᑕᖓ ᐅᐊᕈᑎᓕᒻᒧᑦ ᐳᓪᓚᐅᔮᐱᒻᒨᑕᐅᑦᓱᓂ ᖃᐅᔨᔭᐅᒐᓱᐊᓲᖅ ᐳᕙᓪᓗᓇᕐᑕᖃᕐᒪᖔᑦ. ᐊᒥᓱᐃᑦ ᐱᓇᓱᐊᕈᓰᑦ ᐊᓂᒍᕈᓐᓇᑐᑦ ᐳᕙᓪᓗᓇᖅ ᓄᐃᓚᐅᕐᑎᓇᒍ. ᑖᓐᓇ ᖃᐅᔨᓴᐅᑎᑦᓯᐊᖑᓂᕐᐹᖅ ᖃᐅᔨᒍᑎᐅᒍᓐᓇᓱᓂ ᐃᓄᒃ ᐁᑦᑐᑑᑕᐅᒍᓐᓇᑕᒥᒃ ᐳᕙᓪᓗᒪᖔᑦ. |
ᖃᐅᔨᔭᐅᒍᑎᓪᓚᕆᒃ | ᓇᕝᕚᕈᑎᐅᔪᖅ ᐃᓄᒃ ᐳᕙᓪᓗᓇᐅᑉ ᖁᐱᕐᕈᑯᓗᖓᓂᒃ ᑎᒥᒥᐅᑕᖃᕐᒪᖔᑦ. ᐊᑦᔨᒌᖕᖏᑐᓄᑦ ᖃᐅᔨᓴᕐᑕᐅᒍᑎᖃᑐᐃᓐᓇᕆᐊᓕᒃ ᖃᐅᔨᔭᐅᒐᓱᐊᕐᓗᓂ ᐳᕙᓪᓗᖏᑦᑑᒪᖔᑦ ᐅᕝᕙᓗᓐᓃᑦ ᓯᓂᑦᑑᓂᕋᕐᑕᒥᒃ ᐁᑦᑐᑑᑕᐅᒍᓐᓇᑐᒥᓪᓗᓃᑦ ᐳᕙᓪᓗᒪᖔᑦ. |
ᐋᓐᓂᐊᓯᐅᑎᑐᑦᓯᐊᕋᓗᐊᕐᒪᖔᑦ ᑕᑯᓐᓇᑐᖅ (DOT) | ᑕᑯᓐᓇᑐᖅ ᐃᓄᒻᒥᒃ ᐋᓐᓂᐊᓯᐅᑎᒥᓂᒃ ᐄᓯᔪᒥᒃ. ᑖᓐᓇ ᐊᑑᑎᔭᐅᓲᖅ ᖃᐅᑕᒫᑦ ᐃᔭᐅᑦᓯᐊᖃᑦᑕᖁᔨᒨᑦ ᐋᓐᓂᐊᓯᐅᑎᓂᒃ. ᐊᒥᓱᓂᒃ ᐅᓪᓗᓂᒃ ᐄᓯᖕᖏᑑᖃᑦᑕᓂᖅ ᒪᒥᓴᑦᓯᐊᖏᑦᑑᑎᑦᓯᒍᓐᓇᒪᑦ ᑖᓐᓇᓗ ᐃᓄᒃ ᖃᓂᒻᒪᕈᓐᓇᕋᔭᕐᓱᓂ ᐃᕐᐸᑎᕆᒋᐊᓪᓚᕈᓐᓇᓱᓂᓗ ᐳᕙᓪᓗᓇᕐᒥᒃ. |
ᐄᔭᐅᒋᐊᓖᑦ ᖃᓄᐃᓪᓗᐊᓂᖓ | ᑖᓐᓇ ᑐᑭᖃᕈᓐᓇᑐᖅ ᐊᑦᔨᒌᖕᖏᑐᓂᒃ. ᐃᓚᖓᓂ, ᖃᓄᐃᓪᓗᐊᓂᖓ ᐄᔭᐅᒋᐊᓕᐅᑉ grams-ᑎᒎᕈᓐᓇᑐᖅ milligrams-ᑎᒍᓪᓘᓃᑦ. ᐃᓚᖓᓂ ᐄᔭᐅᒋᐊᓕᐅᑉ ᖃᓄᐃᓪᓗᐊᓂᖓ ᑐᑭᖃᕈᓐᓇᒥᔪᖅ ᑖᒃᑯᐊ ᒪᒥᓴᐅᑏᑦ ᐄᔭᐅᒋᐊᖃᕐᕋᔭᕐᓂᖓᓂᒃ ᐅᓪᓗᒥ ᐊᑕᐅᓯᕐᒥ. ᐅᑦᑑᑎᒋᓗᒍ: ᐃᓄᒃ ᐁᑦᑐᑑᑎᐅᒍᓐᓇᑐᒥᒃ ᐳᕙᓪᓗᑐᖅ ᐊᓪᓗᐃᔪᕕᓂᐅᒍᓂ ᐅᓪᓗᒥᒃ ᐊᑕᐅᓯᕐᒥᒃ ᑐᑭᖃᕋᔭᕐᑐᖅ ᐊᑕᐅᓯᕐᒥᒃ ᐄᒋᐊᓕᒥᑕ ᖃᓄᐃᓪᓗᐊᓂᖓᓂᒃ ᐊᓪᓗᐃᔪᕕᓂᐅᓂᕐᒥᒃ. |
ᐋᓐᓂᐊᓯᐅᑎᒃ | ᐳᕙᓪᓗᓂᕐᒨᓕᖓᔪᒥᒃ ᐅᖄᓕᕋᑦᑕ, ᐅᖃᐅᓯᖃᕙᓪᓗᑐᒍᑦ ᒪᒥᓴᐅᑎᒥᒃ. ᐄᕐᖃᒐᖅ ᓚᔭᐅᒍᓪᓘᒥᔪᖅ. |
ᐋᓐᓂᐊᓯᐅᑎᒧᑦ ᓱᕐᕋᑕᐅᕐᖃᔦᕐᓂᖅ | ᖃᐅᔨᒪᔭᐅᒍᑎᖃᕐᒥᔪᖅ ᒪᒥᓴᐅᑎᓄᑦ ᓱᕐᕋᑕᐅᕐᖃᔦᕐᓂᒥᒃ. ᑌᒣᓲᖅ ᑖᓐᓇ ᒪᒥᓴᐅᑎᒃ ᑐᖁᑦᓯᖃᔦᑐᐊᕐᒪᑦ ᖁᐱᕐᕈᑯᓗᒻᒥᒃ. ᐱᔭᕆᐊᑦᑐᐃᒪᕆᓲᖅ ᐳᕙᓪᓗᓇᐅᑉ ᑲᒪᒋᔭᐅᒋᐊᖃᕐᓂᖓᓂᒃ. ᐋᓐᓂᐊᓯᐅᑎᒧᑦ ᓱᕐᕋᑕᐅᕐᖃᔦᕐᓂᖅ ᐊᑑᑎᓲᖅ ᐃᓄᒃ ᐄᖃᓯᔪᕕᓂᐅᓗᓂ ᓄᕐᙯᓇᖃᑦᑕᓕᑐᐊᕐᒪᑦ ᐊᑯᓃᕐᑐᒥᒃ. ᓇᑯᕐᑐᒪᕆᐊᓗᒃ ᓄᓇᕕᒻᒥ, ᑕᒪᓐᓇ ᐊᑑᑎᓪᓗᐊᖏᑦᑐᓯᐊᖑᒻᒪᑦ, ᑌᒪᑦᓯᐊᖏᓐᓇᖁᑦᓱᒍᓗ! |
ᐋᓐᓂᐊᓯᐅᑎᒧᑦ ᓱᕐᕋᑕᐅᕐᖃᔦᕐᑐᖅ ᐳᕙᓪᓗᓇᖅ | ᐳᕙᓪᓗᓇᐅᑉ ᖁᐱᕐᕈᑯᓗᖓ ᑐᖁᑕᐅᕐᖃᔦᑐᐊᕐᒪᑦ ᒪᒥᓴᐅᑎᐅᓲᓄᑦ. |
ᐋᓐᓂᐊᓯᐅᑎᒧᑦ ᓱᕐᕋᑕᐅᑦᓯᐊᑐᖅ | ᒪᒥᓴᐅᑎᒃ ᑐᖁᑦᓯᒍᓐᓇᑐᐊᕐᒪᑦ ᖁᐱᕐᕈᑯᓗᒻᒥᒃ. “ᐋᓐᓂᐊᓯᐅᑎᒧᑦ ᓱᕐᕋᑕᐅᕐᖃᔦᕐᑑᑉ” ᐊᑦᔨᒋᖕᖏᑕᖓ. |
ᐳᕓᑦ ᓯᓚᑖᓄᕐᑐᖅ ᐳᕙᓪᓗᓇᖅ | ᐁᑦᑐᑑᑎᐅᒍᓐᓇᑐᖅ ᐳᕙᓪᓗᓇᖅ ᑎᒥᒦᓕᕐᒪᑦ ᐳᕓᑦ ᓯᓚᑖᓂ. ᖃᕆᑕᕐᒨᕈᓐᓇᑐᖅ, ᓴᐅᓂᕐᓄᑦ, ᕿᒥᕐᓗᒧᑦ, ᓈᕐᒧᑦ, ᖁᖓᓯᕐᒧᑦ ᑎᖑᓐᓄᓗ. ᓇᒧᓕᒫᕈᓐᓇᑐᖅ ᑎᒥᒥ! |
GeneXpert ᐅᕝᕙᓗᓐᓃᑦ TB PCR ᐳᕙᓪᓗᓇᕐᒥᒃ ᖃᐅᔨᓴᐅᑎᒃ | ᐃᓅᑉ ᐅᕆᐊᕐᑐᑕᖓ ᑲᒪᐅᑎᒨᕐᑕᐅᑐᐊᕐᒪᑦ ᖃᐅᔨᒍᑎᐅᓲᖅ ᐳᕙᓪᓗᓇᐅᑉ ᖁᐱᕐᕈᑯᓗᖓᓂᒃ. ᐁᑦᑐᑑᑕᐅᒍᓐᓇᑐᒥᒃ ᐳᕙᓪᓗᒪᖔᑦ ᖃᐅᔨᓴᐅᑎᒃ. ᐅᓪᓗᐃᑦ ᐊᒥᓱᒐᓓᑦ ᐃᓗᐊᓂ ᖃᐅᔨᔭᐅᒍᑎᖏᑦ ᓄᐃᓲᑦ. |
ᑲᔪᖏᕐᓭᒍᑏᑦ | ᐱᕙᓪᓕᖁᑎᑖᕐᑎᓯᓂᖅ ᐃᓄᓐᓂᒃ ᐋᓐᓂᐊᕕᓕᐊᖃᑦᑕᖁᓪᓗᒋᑦ ᐋᓐᓂᐊᓯᐅᑎᑐᕆᐊᕐᑐᓗᑎᒃ. ᑲᔪᖏᕐᓭᒍᑎᖃᕐᓂᖅ ᐃᓕᑕᕐᓯᒍᑎᐅᔪᖅ ᐳᕙᓪᓗᓇᕐᒧᑦ ᖃᐅᔨᓴᕐᑕᐅᓂᖅ ᐃᕐᖃᕆᐊᖃᕐᓂᐅᓗ ᐅᖁᒣᑦᑑᒍᓐᓇᓂᖓᓂᒃ ᐃᓄᓐᓄᑦ ᐃᓚᖏᓐᓄᓗ. ᐅᑦᑑᑎᐅᒍᓐᓇᑐᑦ ᑲᔪᖏᕐᓭᒍᑎᐅᒍᓐᓇᑐᓄᑦ, ᑯᐊᐸᒃᑯᓂ ᓂᐅᕕᕐᓂᐊᕈᑎᑖᕐᑎᓯᓂᖅ, ᐃᖏᕐᕋᐅᑎᒧᑦ ᐁᑦᓯᕋᕐᓂᖅ, ᓂᕿᓯᒍᑦᔨᒋᐊᕐᑐᓂᖅ ᐊᓯᖏᓪᓗ ᐱᑖᕐᑎᓯᒍᑎᑦᓴᔦᑦ. |
ᐃᓄᓐᓃᑌᓕᒋᐊᖃᕐᓂᖅ | ᐃᓄᒃ ᖃᓂᒪᒥᒃ ᐁᑦᑐᑑᑎᖃᕈᓐᓇᓕᕐᑐᖅ ᐊᕕᑦᓯᒪᑎᑕᐅᔪᖅ ᐊᓯᒥᓂᒃ (ᕈᓐᓇᕕᓕᒫᖓᒍᑦ) ᐃᕐᐸᑎᕆᖁᓇᒍ ᐳᕙᓪᓗᓇᐅᑉ ᖁᐱᕐᕈᑯᓗᖓᓂᒃ ᐃᓚᒥᓄᑦ ᓄᓇᓕᒻᒧᓗ. |
ᓯᓂᑦᑑᓂᕋᕐᑕᖅ ᐳᕙᓪᓗᓇᖅ | ᓯᓂᑦᑑᓂᕋᕐᑕᖅ ᐳᕙᓪᓗᓇᖅ ᐅᕝᕙᓗᓐᓃᑦ ᐳᕙᓪᓗᓇᕐᒧᑦ ᖁᐱᕐᕆᓯᒪᓂᖅ. ᐳᕙᓪᓗᓇᐅᑉ ᖁᐱᕐᕈᑯᓗᖓ ᑎᒥᒥᑦᑐᖅ ᓱᒃᑯᑎᕆᖕᖏᑲᓗᐊᕐᓱᓂ ᑎᒥᒥᒃ. ᐃᓄᒃ ᖃᓂᒪᖕᖏᑐᖅ ᐃᕐᐸᑎᕆᕐᖃᔭᕋᓂᓗ ᐳᕙᓪᓗᓇᕐᒥᒃ ᐊᓯᒥᓄᑦ. |
ᕿᕐᖑᓯᔭᐅᑎᒧᑦ ᕿᒥᕐᕈᓂᖅ ᖁᐱᕐᕈᑯᓗᑦᓴᔭᕐᓂᒃ | ᕿᒥᕐᕈᓂᖅ ᒥᑭᔪᕖᖕᖓᓂᒃ ᐆᒪᔪᒍᓗᓐᓂᒃ, ᒥᑭᔪᐸᐅᔮᓘᓂᑯᒥᓄᑦ ᕿᕐᖑᓯᔭᐅᑎᒧᑭᓯᐊᓂ ᑕᑯᔭᐅᒍᓇᑐᓂᒃ. ᕿᒥᕐᕈᔭᐅᓂᖓ ᖁᐱᕐᕈᑯᓗᐃᑦ ᐃᓚᐅᒻᒥᔪᑦ. |
ᓇᐅᑦᓯᑐᐃᓂᖅ | ᖃᐅᔨᒪᒐᓱᐃᓐᓇᓂᖅ ᐃᑉᐱᒋᔭᖃᑦᓯᐊᕋᓱᐊᕐᓂᓗ ᖃᓄᐃᖕᖏᑲᓗᐊᕐᒪᖔᑦ ᐃᓄᒃ. |
ᐋᓐᓂᐊᓯᐅᕐᑕᐅᔪᖅ | ᐃᓄᒃ ᑲᒪᒋᐅᔪᖅ ᐋᓐᓂᐊᓯᐅᑎᑐᕐᑎᑕᐅᔪᕐᓘᓃᑦ ᐊᓐᓂᐊᓯᐅᕆᔨᓄᑦ. |
PPE(ᐊᑦᑑᒥᑎᕐᑕᐅᒌᒃᑯᑏᑦ ᐱᓇᓱᐊᕐᑐᐃᑦ ᐋᓐᓂᐊᕕᒻᒥ ᐊᑐᕆᐊᖃᓲᖏᑦ) | ᐋᓐᓂᐊᕕᒻᒥ ᐱᓇᓱᑦᑏᑦ ᐋᓐᓂᐊᓯᐅᕆᔩᓪᓘᓃᑦ ᐊᑐᓲᖏᑦ ᓴᐳᒻᒥᒍᑎᒋᑦᓱᒋᑦ ᐃᒻᒥᓂᒃ ᖃᓂᒻᒪᓚᕿᒍᒪᖕᖏᒧᑦ. ᖃᓄᐃᑦᑐᑐᐃᓐᓇᐅᒍᓐᓇᑐᑦ, ᑮᓇᐅᑉ ᒥᓕᖏᑦ ᐊᒡᒐᔮᓪᓘᓃᑦ. |
ᓯᕗᕐᖐᓯᒪᒐᓱᐊᕈᑏᑦ ᐊᑦᑕᓇᕐᓂᐊᖑᕐᑐᓂᒃ | ᖃᐅᔨᓴᕐᓂᖅ, ᐋᓐᓂᐊᓯᐅᑎᑐᕐᑎᓂᖅ ᑲᒪᒋᔭᖃᕐᓂᓗ ᐊᑑᑎᓲᖅ ᖃᐅᔨᔭᐅᓪᓚᕆᕋᑕᖕᖏᑐᒥᒃ ᖃᓂᒪᓐᓇᖃᕐᓂᐊᖒᓕᕐᒪᑦ. ᓯᕗᕐᖐᓯᒪᒐᓱᐊᕈᑏᑦ ᐊᑦᑕᓇᕐᓂᐊᖑᕐᑐᓂᒃ ᐊᑑᑎᔭᐅᓲᑦ ᖃᐅᔨᑦᓯᐊᕆᐊᓪᓛᕈᑎᐅᑦᓱᑎᒃ, ᖃᓂᒪᓐᓇᕖᖕᖓᐅᒐᔭᕐᑐᒥᒃ ᓯᕗᕐᖐᓯᒪᒐᓱᐊᕈᑎᐅᑦᓱᑎᒃ, ᐊᒻᒪᓗ/ᐅᕝᕙᓗᓐᓃᑦ ᐃᓱᒪᓇᕐᓂᖏᑦᑐᒥᒃ ᖃᓂᒪᓐᓇᒥᒃ ᓯᕗᕐᖐᓯᒪᒍᑎᐅᒐᓱᐊᕐᓯᓱᑎᒃ ᓄᐃᓚᕿᖁᓇᒍ ᓯᕗᓂᕐᒥ. |
ᐄᕐᖃᒐᕐᑖᕈᑎᒃ | ᐅᖃᐅᓯᖅ “ᐄᖃᒐᕐᑖᕈᑎᒃ” ᐊᑐᕐᑕᐅᓲᖅ ᐅᖃᐅᓯᐅᓕᑐᐊᕐᒪᑦ ᖃᓄᓪᓗᐊᑎᒋᒃ ᖃᓄᐃᑦᑐᒥᓪᓗ ᐋᓐᓂᐊᓯᐅᑎᑖᕆᐊᖃᕐᑐᖃᓕᕐᒪᑦ ᖃᖓᓗ ᐱᔭᐅᖃᑦᑕᕆᐊᖃᕐᒪᖔᑦ. ᐅᑦᑑᑎᒋᓗᒍ: ᐃᓄᒃ ᐄᖃᒐᕐᑖᑎᑕᐅᔪᖅ 600 milligrams-ᓂᒃ ᒪᒥᓴᐅᑎᒥᒃ rifampicin-ᒥᒃ ᑕᕐᕿᓄᑦ ᓯᑕᒪᓅᓕᖓᔪᒥᒃ. |
ᓯᕗᕐᖐᓯᒪᒐᓱᐊᕐᓂᖅ | ᑲᒪᒋᔭᖃᕐᓂᖅ ᐋᓐᓂᐊᓯᐅᑎᑐᕐᑎᓯᓂᕐᓗ ᐃᓄᒻᒥᒃ ᖃᓂᒪᕋᑕᖕᖏᑐᒥᒃ ᖃᓂᒻᒪᓚᕿᖁᓇᒍ. PPE ᐊᑦᑑᒥᑎᕐᑕᐅᒌᒃᑯᑏᑦ ᐱᓇᓱᐊᕐᑐᐃᑦ ᐋᓐᓂᐊᕕᒻᒥ ᐊᑐᕆᐊᖃᓲᖏᑦ ᓯᕗᕐᖐᓯᒪᒐᓱᐊᕈᑎᑦᓴᔭᐅᒻᒥᔪᑦ. |
ᐳᕙᒻᒦᑐᖅ ᐳᕙᓪᓗᓇᖅ | ᐁᑦᑐᑑᑕᐅᒍᓐᓇᑐᖅ ᐳᕙᒻᒦᑐᖅ ᐳᕙᓪᓗᓇᖅ |
ᖁᐱᕐᕆᕆᐊᓪᓚᓂᖅ | ᐃᓄᒃ ᓯᓂᑦᑑᓂᕋᕐᑕᒥᒃ ᐁᑦᑐᑑᑎᐅᒍᓐᓇᑐᒥᓪᓘᓃᑦ ᐳᕙᓪᓗᓯᒪᒌᕐᑐᖅ ᓂᐅᕐᓯᒋᐊᓪᓚᑐᖅ ᓄᑖᒥᒃ ᐳᕙᓪᓗᓇᐅᑉ ᖁᐱᕐᕈᑯᓗᖓᓂ ᑎᒥᒥᓅᔨᐊᖃᕆᐊᓪᓚᓱᓂ. |
ᐊᑑᑎᔭᐅᕋᓕᓲᖅ | ᐱᐅᓯᕆᔭᐅᑦᓱᓂ ᐊᑑᑎᔭᐅᕋᓕᓲᖅ. ᐊᒥᓱᕕᑦᓱᒍ ᐊᑑᑎᔭᐅᖏᓐᓇᓲᖅ. |
ᖃᐅᔨᓴᕐᓂᖅ | ᐅᖃᐅᓯᖅ ᑐᑭᖃᕐᒥᔪᖅ: “ᕿᓂᕐᓂᒥᒃ”. ᐅᖃᐅᓯᖅ “ᖃᐅᔨᓴᕐᓂᖅ” ᐊᑐᕐᑕᐅᓲᖅ ᐊᑦᔨᒌᖕᖏᑐᑎᒍᑦ. ᐊᑕᐅᓯᖅ ᐃᓄᒃ ᖃᐅᔨᓴᕐᑕᐅᒍᓐᓇᑐᖅ ᐳᕙᓪᓗᒪᖔᑦ, ᑐᑭᓕᒃ ᖃᐅᔨᓴᕐᑕᐅᔪᖅ ᐳᕙᓪᓗᓇᕐᑕᖃᕐᒪᖔᑦ ᑎᒥᒥᒍᑦ. ᓄᓇᓕᒃ ᖃᐅᔨᓴᕐᑕᐅᒍᓐᓇᒥᔪᖅ (‘ᓄᓇᓕᒻᒥᒃ ᖃᐅᔨᓴᕐᓂᖅ’), ᑌᒣᓕᒻᒪᓕ ᑐᑭᓕᒃ ᐊᒥᓱᑦ ᓄᓇᓕᒻᒥᐅᑦ ᐳᕙᓪᓗᓇᕐᑕᖃᕐᒪᖔᑕ ᖃᐅᔨᓴᕐᑕᐅᒋᐊᕐᑐᖁᔭᐅᓕᑐᐊᕐᒪᑕ. |
ᐋᓐᓂᐊᓯᐅᑎᓄᑦ ᓱᕐᕋᑕᐅᓃᑦ (ᐃᑉᐱᓂᐊᓚᕿᔭᐅᓂᖅ) | ᑌᔪᒍᓪᓗᓲᑦ “ᖃᐅᔨᓴᐅᑎᒃ ᖃᐅᔨᓪᓚᕆᒍᑎᐅᔪᖅ ᖃᓂᒪᓐᓇᒥᒃ”. ᖃᓄᐃᑦᑐᒥᒃ ᖃᐅᔨᒍᑎᐅᒻᒪᖔᑦ ᑐᑭᓯᑎᑦᓯᒍᑎᐅᓲᖅ. ᖃᐅᔨᓪᓚᕆᒍᑎᐅᔪᖅ ᖃᐅᔨᓴᕈᑎᒥᒃ ᑐᑭᓯᒍᑎᐅᓲᖅ ᐃᓄᒃ ᐳᕙᓪᓗᒪᖔᑦ. ᐅᑦᑑᑎᒋᓗᒍ: ᖃᐅᔨᓪᓚᕆᒍᑎᐅᔪᖅ ᐅᕕᓂᒃᑯᑦ ᖃᐅᔨᓴᕐᑕᐅᒍᑎᕕᓂᕐᒥᒃ ᑐᑭᓯᒍᑎᐅᓲᖅ ᐃᓄᒃ ᐳᕙᓪᓗᓇᐅᑉ ᖁᐱᕐᕈᑯᓗᖓᓂ ᑎᒥᒥᐅᑕᖃᓕᕆᐊᖓ. |
ᖃᐅᔨᓪᓚᕆᒍᑎᐅᔪᑦ | ᑌᔪᒍᓪᓗᓲᑦ “ᖃᐅᔨᓴᐅᑎᒃ ᖃᐅᔨᓪᓚᕆᒍᑎᐅᔪᖅ ᖃᓂᒪᓐᓇᒥᒃ”. ᖃᓄᐃᑦᑐᒥᒃ ᖃᐅᔨᒍᑎᐅᒻᒪᖔᑦ ᑐᑭᓯᑎᑦᓯᒍᑎᐅᓲᖅ. ᖃᐅᔨᓪᓚᕆᒍᑎᐅᔪᖅ ᖃᐅᔨᓴᕈᑎᒥᒃ ᑐᑭᓯᒍᑎᐅᓲᖅ ᐃᓄᒃ ᐳᕙᓪᓗᒪᖔᑦ. ᐅᑦᑑᑎᒋᓗᒍ: ᖃᐅᔨᓪᓚᕆᒍᑎᐅᔪᖅ ᐅᕕᓂᒃᑯᑦ ᖃᐅᔨᓴᕐᑕᐅᒍᑎᕕᓂᕐᒥᒃ ᑐᑭᓯᒍᑎᐅᓲᖅ ᐃᓄᒃ ᐳᕙᓪᓗᓇᐅᑉ ᖁᐱᕐᕈᑯᓗᖓᓂ ᑎᒥᒥᐅᑕᖃᓕᕆᐊᖓ. |
SI-PMI (ᒍᐃᒍᐃᑎᑐᑦ ᐃᒣᓕᔪᖅ: ᖃᕆᑕᐅᔭᒃᑯᑦ ᖃᐅᔨᒪᒍᑎᐅᔪᑦ ᓴᐳᓗᑕᐅᒍᓐᓇᑐᓂᒃ ᖃᓂᒪᓐᓇᖃᕐᑎᓯᑌᓕᓂᕐᒧᑦ ᐃᕐᐸᕈᓐᓇᑐᓂᒃ) | ᐋᓐᓂᐊᓯᐅᕐᑎᒪᕇᑦ ᐋᓐᓂᐊᓯᐅᕐᑏᓗ ᖃᕆᑕᐅᔭᒥ ᑕᑯᒋᐊᕐᕕᖃᕈᓐᓇᓲᑦ ᑲᐱᔭᐅᒍᑎᒋᓯᒪᔭᖏᓐᓂᒃ ᐃᓅᑉ (ᐊᓯᖏᓐᓂᓗ ᖃᓄᐃᒍᑎᒋᑐᐃᓐᓇᕆᐊᓕᖏᓐᓂᒃ). |
ᐅᕕᓂᒃᑯᑦ ᖃᐅᔨᓴᐅᑎᒃ | ᐊᑑᑎᔭᐅᓲᖅ ᐳᕙᓪᓗᓇᐅᑉ ᖁᐱᕐᕈᑯᓗᖓᓂᒃ ᖃᐅᔨᒐᓱᐊᕈᑕᐅᑦᓱᓂ ᑎᒥᒦᒻᒪᖔᑦ. ᐋᓐᓂᐊᓯᐅᕐᑎ ᑲᐳᑎᒥᒃ ᐅᕕᓂᐅᑉ ᐊᑖᓄᐊᐱᒃ ᑲᐱᓯᑦᓱᓂ ᐃᒻᒪᑎᐊᐱᓯᑦᓱᒍ ᑲᐴᑎᐅᑉ ᐃᒪᖓᓄᑦ. ᐃᓄᒃ ᐅᑎᕆᐊᖃᓲᖅ ᒪᕐᕉᒃ ᐱᖓᓱᓪᓘᓃᑦ ᐅᓪᓗᐃᑦ ᓈᑉᐸᑕ ᑕᑯᒐᓱᐊᕐᑕᐅᓂᐊᓕᕐᒪᑦ ᖃᐅᔨᓴᕐᑕᐅᓂᕕᓂᖓ. ᑕᑯᓗᒍ ᐅᕕᓂᒃᑯᑦ ᖃᐅᔨᓴᐅᑎᒃ (ᒪᑉᐱᒐ 66) |
ᓯᓂᑦᑑᓂᕋᕐᑕᖅ ᐳᕙᓪᓗᓇᖅ | ᑕᑯᓗᒍ “ᓯᓂᑦᑑᓂᕋᕐᑕᖅ ᐳᕙᓪᓗᓇᖅ” ᖁᓛᓂ ᐊᓪᓚᓯᒪᔪᓂᒃ ᐅᕝᕙᓗᓐᓃᑦ ᓯᓂᑦᑑᓂᕋᕐᑕᖅ ᐳᕙᓪᓗᓇᖅ (ᒪᑉᐱᒐ 55). |
ᐅᕆᐊᕐᑕᕕᓂᕐᒥᒃ ᕿᒥᕐᕈᕈᑎᒃ | Frottis-ᖑᓂᕋᕐᑕᐅᒥᔪᖅ. ᐃᓅᑉ ᐅᕆᐊᕐᑕᕕᓂᖓ ᑕᑯᒐᓱᐊᕐᑕᐅᓕᑐᐊᕐᒪᑦ ᕿᕐᒍᓯᔭᐅᑎᒃᑯᑦ (ᐊᖏᓖᒍᑎᐅᔪᖅ ᕿᒥᕐᕈᔭᒥᒃ) ᑕᑯᒍᑎᐅᓚᕿᓲᖅ ᐳᕙᓪᓗᓇᐅᑉ ᖁᐱᕐᕈᑯᓗᖓᓂᒃ. ᐳᕙᓪᓗᓇᐅᑉ ᖁᐱᕐᕈᑯᓗᖓ ᑕᑯᑦᓴᐅᑐᐊᕐᒪᑦ, ᖃᐅᔨᒍᑎᐅᓲᖅ ᐃᓅᑉ ᐃᕐᐸᑎᑦᓯᒍᓐᓇᓕᕐᓂᖓᓂᒃ ᖁᐱᕐᕈᑯᓗᒻᒥᒃ ᐁᑦᑑᑎᒋᒍᓐᓇᓕᕐᓗᒍ ᐊᓯᒥᓄᑦ. ᐃᓚᖏᑦ ᐃᓄᐃᑦ ᐁᑦᑐᑑᑕᐅᒍᓐᓇᑐᒥᒃ ᐳᕙᓪᓗᕈᑎᖃᓲᑦ ᖁᐱᕐᕈᑯᓗᒃ ᑕᑯᑦᓴᐅᖏᒃᑲᓗᐊᕐᒪᑦ ᕿᕐᖑᓯᔭᐅᑎᒧᑦ. |
ᐅᕆᐊᕐᑎᑕᐅᓂᖅ | ᐊᑑᑎᔭᐅᓲᖅ ᕿᓂᕈᑎᐅᑦᓱᓂ ᐳᕙᓪᓗᓇᐅᑉ ᖁᐱᕐᕈᑯᓗᖓᓂᒃ ᑎᒥᒥ. ᐋᓐᓂᐊᓯᐅᕐᑎ ᐃᓄᒻᒥᒃ ᓂᐅᕐᓯᑎᑦᓯᒐᔭᕐᑐᖅ ᖁᐃᕐᑐᕖᖕᖓᓚᕿᒍᑎᒋᓂᐊᕐᑕᖓᓂᒃ. ᐃᓄᒃ (ᐳᕙᒻᒥᓃᑦᑐᕕᓂᕐᒥᒃ) ᓄᕙᒻᒥᒃ ᐅᕆᐊᓕᕋᔭᕐᑐᖅ ᖃᔫᑦᑕᒧᑦ, ᑖᓐᓇᓗ ᖃᔫᑦᑕᖅ ᐊᐅᓪᓚᑎᑕᐅᓕᕋᔭᕐᑐᖅ ᖃᐅᔨᓴᕐᑕᐅᖏᐊᕐᑐᓗᓂ. ᑕᑯᓗᒍ ᐅᕆᐊᕐᑎᑕᐅᓂᖅ (ᒪᑉᐱᒐ 75). |
ᒪᓗᓐᓇᐅᑎᒃ | ᑎᒥᐅᑉ ᐃᑉᐱᒋᔭᖓ ᐱᐅᓯᕆᓲᖓᓄᑦ ᐊᑦᔨᒋᔭᐅᒐᓂ ᐃᓱᕐᕆᖏᓐᓂᐅᓱᓂ. ᒪᓗᓐᓇᐅᑏᑦ ᖃᐅᔨᒪᒍᑎᐅᓲᑦ ᑎᒥᐅᑉ ᐱᑕᖃᓕᕐᓂᖓᓂᒃ ᐳᕙᓪᓗᓇᐅᑉ ᖁᐱᕐᕈᑯᓗᖓᓂᒃ. ᐳᕙᓪᓗᓇᕐᒥᒃ ᒪᓗᓐᓇᐅᑏᑦ ᐅᑯᐊ, ᖁᐃᕐᑐᕖᖕᖓᖃᑦᑕᓂᖅ ᐱᐅᓯᕆᖕᖏᑕᒥᒍᑦ, ᓂᕆᒍᒣᕐᓯᒪᓂᖅ, ᕿᐅᔭᖃᑦᑕᓂᖅ ᐆᓇᕿᖃᑦᑕᓂᕐᓗ, ᐊᐅᒻᒥᒃ ᐅᕆᐊᖃᑦᑕᓂᖅ, ᓴᓗᓐᓂᖅ ᐅᓐᓄᐊᑯᓪᓗ ᐊᐅᒃᑲᓂᕖᖕᖓᖃᑦᑕᓂᖅ. |
ᒪᓗᓐᓇᐅᑎᓕᒃ | ᐃᓄᒃ ᒪᓗᓐᓇᐅᑎᖃᓕᕐᑐᖅ ᐳᕙᓪᓗᓇᕐᒨᓕᖓᔪᓂᒃ (ᑎᒥᒥᑕ ᐱᐅᓯᕆᓲᖑᖕᖏᑕᖏᓐᓂᒃ). ᐋᓐᓂᐊᓯᐅᕐᑎ/ᐋᓐᓂᐊᓯᐅᕐᑎᒪᕆ ᑐᑭᑖᕋᔭᕐᑐᖅ ᐃᓄᒃ ᒪᓗᓐᓇᐅᑎᖃᓕᕐᐸᑦ ᖃᐅᔨᓴᕐᑕᐅᔪᑦᓴᐅᑎᓕᕐᓗᒍ ᐅᕕᓂᒃᑯᑦ, ᑕᕐᕋᑐᕐᑕᐅᓂᒃᑯᑦ, ᐅᕆᐊᕐᑎᑕᐅᓂᒃᑯᓗᓐᓃᑦ ᕿᓂᕈᑎᐅᓂᐊᓕᕐᑎᓗᒋᑦ ᐳᕙᓪᓗᓇᐅᑉ ᖁᐱᕐᕈᑯᓗᖓᓂᒃ ᑎᒥᒥᑦᑐᒥᒃ. |
ᐳᕙᓪᓗᑐᒥᒃ ᑲᒪᒍᓰᑦ | ᐅᖃᐅᓯᕆᔭᐅᓲᖅ ᐊᑦᔨᒋᖕᖏᑐᓂᒃ ᑲᒪᒋᔭᐅᒍᑎᖃᕆᐊᖃᓕᕐᒪᑦ ᐃᓄᒃ ᐳᕙᓪᓗᓂᕐᒨᓕᖓᔪᓂᒃ. ᖃᐅᔨᓴᕐᓃᑦ/ᖃᐅᔨᓪᓚᕆᒍᑏᑦ, ᐄᕐᖃᑎᑦᓯᓂᖅ ᐃᑲᔪᕐᓯᒪᓂᕐᓗ ᐃᓄᓐᓂᒃ ᐱᒻᒪᕆᑦᑕᕆᔭᐅᕗᑦ ᐳᕙᓪᓗᑐᒥᒃ ᑲᒪᒍᓯᐅᑦᓱᑎᒃ. |
ᐳᕙᓪᓗᓇᐅᑉ ᖁᐱᕐᕈᑯᓗᖓ ᖃᕆᑕᒨᕐᑐᖅ | ᐳᕙᓪᓗᓇᑦᓴᔭᖅ ᐳᕙᐅᑉ ᓯᓚᑖᒍᑦ ᐁᑦᑐᑑᑎᐅᒍᓐᓇᑐᖅ ᐳᕙᓪᓗᓇᖅ ᖃᕆᑕᕐᒨᒪᑦ. ᑕᒪᓐᓇ ᐊᑦᑕᓇᕐᑐᒪᕆᐊᓘᒍᓐᓇᑐᖅ ᐃᓅᑉ ᐃᓅᓯᖓᓄᑦ. |
ᐋᓐᓂᐊᓯᐅᑎᑐᕐᓂᖅ (ᐄᕐᖃᓂᖅ) | ᐋᓐᓂᐊᓯᐅᕐᑕᐅᓂᒃᑯᑦ ᑲᒪᒋᔭᐅᓂᖅ ᒪᒥᑎᒐᓱᐊᕐᓗᒍ ᖃᓂᒪᒍᑎᒋᔭᐅᔪᖅ ᐊᒻᒪᓗ/ᐅᕝᕙᓗᓐᓃᑦ ᐃᓱᕐᕆᓕᐅᒥᖁᓗᒍ ᐃᓄᒃ. ᐳᕙᓪᓗᑐᖅ ᐄᖃᕆᐊᖃᓲᖅ ᒪᒥᓴᐅᑎᓂᒃ ᐳᕙᓪᓗᓇᐅᑉ ᖁᐱᕐᕈᑯᓗᖓ ᓄᖑᖁᓪᓗᒍ ᑎᒥᒥᑦ ᐃᑲᔪᕐᓯᒪᔭᐅᓂᖃᓲᖑᑦᓱᓂᓗ ᐋᓐᓂᐊᓯᐅᑎᑑᒪᔪᖅ. ᓇᐅᓕᒫᓂᒃ ᖃᓄᐃᖕᖏᓯᐊᕐᑎᓯᒐᓱᐊᕐᑏᑦ, ᐋᓐᓂᐊᓯᐅᕐᑎᒪᕇᑦ ᐋᓐᓂᐊᓯᐅᕐᑏᓗ ᐊᑐᐃᓐᓇᐅᕗᑦ ᐃᑲᔪᕈᓐᓇᓱᑎᒃ ᐃᓄᒻᒥᒃ ᐱᒍᓐᓇᓯᐊᖁᓪᓗᒍ ᑎᒥᒥᒍᑦ, ᐃᓱᒪᒥᒍᑦ, ᐃᐱᓂᐊᕐᓂᒥᒍᑦ ᐃᓅᓯᕐᒥᒍᓪᓗ ᐊᑦᓱᕉᑎᖃᕐᑎᓗᒍ ᐳᕙᓪᓗᓂᕐᒥᒃ. |
ᑲᐴᑎᐅᑉ ᐃᓗᓕᖓ | ᑲᐱᔭᐅᒍᕕᑦ ᑖᑦᓱᒧᖓ ᑎᒦᑦ ᐹᒍᓐᓇᓯᑎᑕᐅᓯᔪᖅ ᖁᐱᕐᕈᑯᓗᒻᒥᒃ. ᐳᕙᓪᓗᓕᕇᒃᑯᑎᒃ ᑲᐴᑎᐅᑉ ᐃᒪᖓ BCG-ᖑᓂᕋᕐᑕᖅ. ᑖᓐᓇ BCG ᐱᒻᒪᕆᐊᓗᒃ ᐱᐊᕌᕈᕐᓄᑦ ᐅᐱᓐᓇᕋᓂ ᐱᐊᕌᕈᐃᑦ ᐁᑦᑐᑑᑕᐅᖑᓐᓇᑐᒥᒃ ᐳᕙᓪᓗᓇᕐᑕᓯᒍᑎᒃ, ᐃᕐᐸᕕᐅᑦᓴᐅᑎᒋᐊᐱᒍᓐᓇᒪᑦ ᑎᒥᖓ, ᖃᕆᑕᖓᓅᕈᓐᓇᓱᓂᓗ. BCG ᑲᐴᑎᐅᑉ ᐃᓗᓕᖓ ᐃᑲᔪᕐᓯᒪᓲᖅ ᐱᐊᕌᕈᕐᒥᒃ ᐁᑦᑐᑑᑎᐅᒍᓐᓇᑐᒥᒃ ᐳᕙᓪᓗᓕᑦᓴᐸᑦ, ᑎᒥᖓᓄᑦ ᐃᕐᐸᓚᕿᖁᓇᒍ ᐳᕙᓪᓗᓇᖅ. |
ᐃᓪᓘᑉ ᐃᓗᐊᓂ ᐊᓄᕆᑖᑦᓯᐊᑎᑦᓯᓂᖅ ᐊᓂᕐᓂᖃᑦᓯᐊᑎᑦᓯᓂᖅ | ᐊᓂᕐᓂᓯᐊᖃᕐᑎᓗᒍ ᓴᓗᒪᔪᒥᒃ ᖃᕆᐊᖅ ᐃᓪᓘᑉ ᐃᓗᐊ. ᐊᓄᕆᑖᑦᓯᐊᑎᑦᓯᓂᖅ ᐱᒻᒪᕆᐊᓗᒃ ᐳᕙᓪᓗᓇᕐᒥᒃ ᐲᔦᒍᑎᐅᒐᒥ ᐊᓂᕐᑎᕆᔭᐅᔪᒥᑦ, ᓂᐅᕐᑕᐅᖃᑦᑕᖁᓇᒍ ᐊᓯᑎᓐᓄᑦ. ᐋᓐᓂᐊᕕᒃ ᖃᕆᐊᕐᑕᖃᓲᖑᒻᒥᔪᖅ ᐊᓂᕐᑎᕆᔭᐅᓚᖓᔪᒥᒃ ᓴᓗᒻᒪᓭᑎᑕᓕᒻᒥᒃ, ᐅᕆᐊᕐᑐᑎᑕᐅᕕᐅᑦᓱᓂ ᖃᐅᔨᓴᕐᑕᐅᕕᒻᒥᒃ. ᒥᑭᓂᕐᓴᓂᒃ ᓴᓗᒻᒪᓭᑎᖃᕈᓐᓇᒥᔪᖅ ᐊᓂᕐᑎᕆᔭᐅᓚᖓᔪᖅ ᐊᐅᓓᓐᓇᓯᐊᖁᓪᓗᒍ ᖃᕆᐊᒥ ᐅᐸᑦᓯᒪᔭᐅᒌᕐᐸᑦ ᐋᓐᓂᐊᓯᐅᕐᑕᐅᔪᒧᑦ. |
ᐋᓐᓂᐊᓯᐅᑎᑐᕐᑎᓯᓂᖅ ᐳᕙᓪᓗᒪᖔᑦ ᖃᐅᔨᔭᐅᑦᓯᓂᖓᓂ | ᐳᕙᓪᓗᓇᕐᑕᓯᔪᕕᓂᐅᓂᐊᖕᖒᕆᔭᐅᑉ ᐋᓐᓂᐊᓯᐅᑎᑐᕐᑎᑕᐅᑲᐱᕝᕕᖓ (ᖃᓪᓗᓈᑎᑐᑦ Prophylactic Window Period-ᓚᔭᐅᓲᖑᒻᒥᔪᖅ). ᐋᓐᓂᐊᓯᐅᑎᑐᕐᑎᓯᓂᖅ ᐱᐊᕌᕐᓂᒃ ᐱᐊᕌᕈᕐᓂᓗ ᐁᑦᑐᑑᑎᐅᒍᓐᓇᑐᒥᒃ ᐳᕙᓪᓗᑑᑉ ᓴᓂᐊᓃᑦᑐᕕᓂᕐᓂᒃ. ᑖᓐᓇ ᐋᓐᓂᐊᓯᐅᑎᑐᕐᑎᓯᓂᖅ ᓯᕗᕐᖐᓯᒪᒐᓱᐊᕈᑎᐅᔪᖅ ᐳᕙᓪᓗᓇᕐᒥᒃ ᐃᕐᐸᖁᓇᒍ ᑎᒥᒥ, ᓄᕐᖃᑎᑕᐅᒍᓐᓇᓱᓂᓗ ᖃᐅᔨᔭᐅᑦᓯᐊᑐᐊᕐᐸᑦ ᐳᕙᓪᓗᓇᐅᑉ ᖁᐱᕐᕈᑯᓗᖓᓂᒃ ᑎᒥᒥᐅᑕᖃᖕᖏᒋᐊᖓ ᐱᐊᕋ/ᐱᐊᕌᕈᒃ. |
ᑕᕐᕈᑑᑎᒃ | ᑕᕐᕋᑑᑎᒃ ᐊᑦᔨᓕᐅᕆᒍᑎᐅᔪᖅ ᑎᒥᐅᑉ ᐃᓗᐊᓂᒃ. ᐊᑑᑎᔭᐅᓲᖅ ᖃᐅᔨᒐᓱᐊᕈᑎᐅᑦᓱᓂ ᐳᕙᓪᓗᓇᖅ ᓱᒃᑯᑎᕆᓕᕐᒪᖔᑦ ᑎᒥᒥᒃ (ᐳᕓᑦ ᕿᒥᕐᕈᔭᐅᕙᓪᓗᓲᑦ). ᑕᑯᓗᒍ ᑕᕐᕋᑐᐃᓂᖅ (ᒪᑉᐱᒐᖅ 71) |