ᐅᖃᐅᓰᑦ ᑐᑭᖏᑦ
ᐅᖃᐅᓰᑦ ᑐᑭᖏᑦ
ᐳᕙᓪᓗᓇᖅ ᖁᐱᕐᕈᐊᕈᖏᑦ ᓂᒪᕐᑐᑦ | ᐳᓪᕙᓪᓗᓇᐅᑉ ᖁᐱᕐᕈᐊᕈᖏᓐᓂᒃ ᐱᑕᓕᒃ ᓱᒃᑯᐃᕙᓪᓕᐊᔪᓂᒃ ᑎᒥᒥᒃ. ᐃᓄᒃ ᖁᐱᕐᕈᐊᕈᖏᑦ ᓂᒪᕐᑐᓂᒃ ᐳᕙᓪᓗᕈᑎᓕᒃ ᖃᓄᐃᓐᓂᒥᓂᒃ ᐃᑉᐱᒍᓱᒍᓐᓇᑐᖅ ᐊᒻᒪᓗ ᓯᐊᒻᒪᑎᑦᓯᒍᓐᓇᓱᓂ ᐳᕙᓪᓗᓇᕐᒥᒃ ᓂᐅᕋᑦᓴᑎᒍᑦ. |
ᑎᒥᐅᑉ ᖁᓄᓪᓕᕈᑎᖃᕐᓂᖓ | ᐊᑑᑎᓗᑭᖕᖏᓯᐊᕐᑐᖅ, ᑭᓯᐊᓂ ᖁᓄᓪᓕᕈᑎᖃᕐᓱᓂ ᖃᓄᐃᓕᖕᖓᑕᐅᓪᓚᕆᑦᑐᖅ. ᑎᒥᐅᑉ ᖁᓄᓪᓕᕈᑎᖃᕐᓂᖓ, ᐅᕝᕙᓘᓐᓃᑦ ᖁᓄᓪᓕᕈᑎᖃᕐᓂᒧᑦ ᑎᒥᖓ ᖁᐊᕐᓵᑐᖅ, ᐃᓅᒍᓐᓀᕈᑕᐅᒍᓐᓇᑐᖅ ᑲᒪᒋᔭᐅᑲᐱᖕᖏᑯᓂ. ᐊᑑᑎᓗᑭᖕᖏᓯᐊᕐᑑᒐᓗᐊᖅ, ᕿᓄᕕᖃᓲᒍᕗᒍᑦ ᐃᓄᒻᒥᒃ ᐅᑕᕐᕿᖁᑦᓱᒋᑦ 15 ᒥᓂᑦᔅᓂ ᐅᕕᓂᒃᑯᑦ ᖃᐅᔨᓴᕐᑕᐅᕋᑖᕐᑐᓂᒃ. |
ᖁᐱᕐᕈᐊᕈᕐᓂᒃ ᑐᖁᓭᒍᑎᒃ | ᐋᓐᓂᐊᓯᐅᑎᐊᓘᑉ ᐅᕝᕙᓘᓐᓃᑦ ᐋᓐᓂᐊᓯᐅᑎᐅᑉ ᐱᔭᐅᖁᔭᖓ ᒪᒥᓭᓚᖓᔪᖅ ᖁᐱᕐᕈᐊᕈᕐᓄᑦ ᐃᒻᒪᓯᒪᑎᑕᕐᒧᑦ. ᐊᑦᔨᒌᖕᖏᑐᑦ ᖁᐱᕐᕈᐊᕈᕐᓂᒃ ᑐᖁᓭᒍᑏᑦ ᑐᖁᑦᓯᒍᓐᓇᑐᑦ ᐊᑦᔨᒌᖕᖏᑐᓂᒃ ᖁᐱᕐᕈᐊᕈᕐᓂᒃ, ᑌᒣᒻᒪᑦ ᐳᕙᓪᓗᑐᖅ ᒪᒥᓴᕐᑐᖅ ᐃᓕᒃᑰᑎᕐᑐᓂᒃ ᑲᑎᒪᑦᓱᑎᒃ ᖁᐱᕐᕈᐊᕈᕐᓂᒃ ᑐᖁᓭᒍᑎᓂᒃ ᐄᕐᖃᕆᐊᖃᓲᑦ. |
ᒪᓗᓐᓇᕈᑎᖃᖕᖏᑐᖅ | ᒧᒥᖕᖓᐅᑎᖓ ᒪᓗᓐᓇᕈᑎᓕᐅᑉ. ᐃᓄᒃ ᑕᑯᑦᓴᐅᑎᑦᓯᖏᑉᐸᑦ ᐅᕝᕙᓘᓐᓃᑦ ᓯᕐᓚᒃ ᑭᓯᐊᓂ ᒪᓗᓐᓇᕈᑎᖃᕐᐸᑦ (ᑎᒥᒥᒍᑦ ᐃᑉᐱᒍᓱᖕᖏᑐᖅ ᐊᑦᔨᒋᔭᐅᖕᖏᑐᓂᒃ ᐱᐅᓯᑐᐃᓐᓇᒧᑦ). ᐃᓄᐃᑦ ᕿᑲᕐᑐᓂᒃ ᐳᕙᓪᓗᓇᕐᑕᓖᑦ, ᐊᒻᒪᓗ ᐃᓄᐃᑦ ᐃᓚᖏᑦ ᓂᒪᕐᑐᓂᒃ ᐳᕙᓪᓗᓇᕐᑐᓖᑦ ᒪᓗᓐᓇᕈᑎᖃᓲᖕᖏᑐᑦ ᑌᒣᑦᑑᓲᒍᒻᒪᑕ ᑕᑯᒋᐊᒥᒃ ᐳᕙᓪᓗᓇᕐᒥᒃ ᐱᔭᕐᓃᓂᕐᓴᐅᓲᖅ ᐊᒻᒪᓗ ᓱᓇᒥᑦᑐᓂᒃ ᖃᐅᔨᓴᕐᑕᐅᒋᐊᖃᕐᓂᐅᑉ ᐱᒻᒪᕆᐅᒍᑎᒋᑦᓱᓂᐅᒃ. |
ᖁᐱᕐᕈᐊᕈᐃᑦ | ᒥᑭᔪᐊᐲᑦ ᐊᓂᕐᓂᓖᑦ, ᑕᑯᑦᓴᐅᖏᑦᑐᑦ ᐃᔨᑐᐃᓐᓈᓄᑦ. ᐱᓕᐊᒍᕗᑦ ᐊᑦᔨᒌᖕᖏᑐᑦ ᖁᐱᕐᕈᐊᕈᐃᑦ. ᐊᒥᓱᑦ ᓱᒃᑯᐃᓲᑦ ᐃᓄᓐᓂᒃ ᐊᒻᒪᓗ ᐊᓪᓛᑦ ᐱᒻᒪᕆᐅᑦᓱᑎᒃ ᖃᓄᐃᖕᖏᓂᕐᑎᓄᑦ (ᑌᔭᐅᓗᑭᓲᑦ 'ᐱᐅᔪᐃᑦ ᖁᐱᕐᕈᐊᕈᓰᑦ'). ᐃᓚᖏᑦ, ᐆᑦᑑᑎᒋᑦᓱᒋᑦ ᖁᐱᕐᕈᐊᕈᐃᑦ ᐳᕙᓪᓗᑎᑦᓯᓲᑦ, ᐃᓅᑉ ᑎᒥᖓᓂᒃ ᓱᒃᑯᐃᒍᓐᓇᓱᑎᒃ. |
Bacille Calmette-Guerin (BCG) ᑲᐴᑎᒃ | ᑖᓐᓇᑐᐊᖅ ᑲᐴᑎᒃ ᒪᓂᔨᐅᑕᐅᒍᓐᓇᑐᖅ ᐳᕙᓪᓗᕇᒃᑯᑎᐅᑎᓗᒍ. ᓄᑕᕋᓕᒫᑦ ᓄᓇᕕᒻᒥ ᑲᐱᔭᐅᓯᒪᑉᐸᑕ ᑖᑦᓱᒧᖓ ᐱᐅᔪᖅ ᓄᑕᕃᑦ ᑎᒥᖏᑦ ᓄᕐᖃᑎᑦᓯᒍᓐᓇᓯᐊᖕᖏᒪᑕ ᐳᕙᓪᓗᓇᐅᑉ ᖁᐱᕐᕈᐊᕈᓯᖏᓐᓂᒃ ᓯᐊᒻᒪᕈᓐᓇᑐᓂᒃ ᑎᒥᖏᑦᑕ ᐊᓯᖏᓐᓄᑦ (ᐃᓚᐅᑎᓗᒍ ᖃᕆᑕᖅ). BCG ᑲᐴᑎᒃ ᐃᑲᔪᕐᓯᓲᖅ ᓄᑕᕋᐅᑉ ᑎᒥᖓ ᐃᑎᕐᑕᐅᐸᑦ ᓂᒪᕐᑐᓄᑦ ᐳᕙᓪᓗᓇᐅᑉ ᖁᐱᕐᕈᐊᕈᖏᓐᓄᑦ ᓯᐊᒻᒪᖃᔭᖕᖏᑑᑎᑦᓯᔪᖅ ᐊᓯᖏᓐᓄᑦ ᑎᒥᖓᓅᕐᖃᓯᓗᑎᒃ. BCG ᑲᐴᑎᒃ ᐊᑐᕐᑕᐅᖏᒃᑯᓂ ᓈᒻᒪᒋᔭᐅᓂᕐᓴᐅᓲᖅ ᓂᑉᐱᓴᕐᑐᓄᑦ ᐅᕝᕙᓘᓐᓃᑦ ᐃᓄᒻᒪᕆᓐᓄᑦ. |
ᐊᐅᒃᑯᑦ ᖃᐅᔨᓴᕈᑎᒃ | ᐊᑐᕐᑕᐅᓲᖅ ᕿᓂᕐᑐᓄᑦ ᐳᕙᓪᓗᓇᐅᑉ ᖁᐱᕐᕈᐊᕈᖏᓐᓂᒃ ᑎᒥᒦᑦᑐᓂᒃ ᐅᕝᕙᓘᓐᓃᑦ ᐃᑉᐱᒋᔭᐅᑎᓗᒋᑦ ᑎᒥᐅᑉ ᖃᓄᐃᓕᒍᑎᖃᕐᓂᖏᑦ ᐳᕙᓪᓗᓇᕐᒧᑦ ᒪᒥᓴᐅᑎᓄᑦ. ᐋᓐᓂᐊᓯᐅᑎᒃ ᑲᐲᓚᖓᔪᖅ (ᐃᓅᑉ ᑕᓕᖓᒎᕙᓪᓗᓲᖅ) ᐊᒻᒪᓗ ᐊᐅᒃ ᒥᓗᑦᓯᐅᑎᒧᑦ ᒥᓗᑦᑕᐅᑎᓗᒍ. ᑕᑯᓗᒍ ᐊᐅᖏᕐᑕᐅᔪᖅ (ᖁᑉᐱᒐᖅ 78). |
Cardex | ᖃᕆᑕᐅᔭᒃᑯᑦ Excel ᐊᑐᕐᓱᒍ ᑕᑯᑦᓴᐅᑎᑦᓯᒍᑎᒃ ᐳᕙᓪᓗᓇᓕᕆᔨᓄᑦ ᓇᓪᓕᖏᑦ ᐋᓐᓂᐊᓯᐅᕐᑕᐅᒋᐊᖃᕐᒪᖔᑕ ᐱᓇᓱᐊᕈᓯᕐᒥ ᑕᕝᕙᓂ ᐊᒻᒪᓗ ᓇᓗᓀᒃᑯᑕᐅᑦᓱᓂ ᓯᕗᓂᕐᒥ ᖃᐅᔨᓴᕐᑕᕕᓂᐅᓗᑎᒃ ᑕᑯᔭᐅᒋᐊᓪᓚᕆᐊᖃᓛᕐᑐᓂᒃ. ᐱᒻᒪᕆᐅᕗᖅ ᐃᑉᐱᒋᔭᐅᑦᓯᐊᕆᐊᖃᕐᓂᖓ ᑐᑭᓯᐅᑎᑦᓴᓂᒃ ᐃᓕᔨᔪᓄᑦ Kardex-ᒧᑦ ᖃᓄᐃᓕᖕᙰᓚᕿᒍᓐᓇᒪᑦ ᐃᓄᐃᑦ ᐋᓐᓂᐊᓯᐅᕐᑕᐅᓂᑎᒍᑦ ᑐᑭᓯᐅᑎᑦᓴᑕᖏᓐᓂᒃ ᐊᒻᒪᓗ ᓯᕗᓂᕐᒥ ᐋᓐᓂᐊᓯᐅᑎᓄᑦ ᑲᒪᒋᔭᐅᖃᑦᑕᕆᐊᖃᕐᓂᖏᓐᓂᒃ. |
ᐋᓐᓂᐊᓯᐅᑎᒃᑯᓂ ᓇᐅᑦᓯᑐᕐᑕᐅᓂᖅ | ᐊᑑᑎᔭᐅᓲᖅ ᐃᑲᔪᕐᓯᒍᒪᑦᓱᒍ ᑐᑭᑖᕈᑕᐅᓂᖓ ᑭᓇᑐᐃᓐᓇᐅᑉ ᐳᕙᓪᓗᒪᖔᑦ ᖃᐅᔨᓴᕐᑕᐅᓕᕐᕿᒋᐊᓕᐅᑉ. ᐋᓐᓂᐊᓯᐅᑎᒃ ᐊᐱᕐᓱᓚᖓᔪᖅ ᐃᓄᒃ ᖃᓄᐃᒻᒪᖔᑦ, ᐅᖁᒣᓐᓂᖓ ᖃᐅᔨᓗᒍ, ᐳᕙᖏᑦ ᓈᓚᓪᓗᒋᒃ, ᐊᒻᒪᓗ ᖁᖏᓯᖓ ᑕᑦᓯᑐᕐᓗᒍ ᐳᓪᓕᒪᖔᑦ. ᑕᑯᓗᒍ ᐋᓐᓂᐊᓯᐅᑎᒧᑦ ᓇᐅᑦᓯᑐᕐᑕᐅᓂᖅ (ᖁᑉᐱᒐᖅ 65) |
ᓄᓇᓕᓐᓃᑐᓂᒃ ᐃᓕᓐᓂᐊᑎᑦᓯᓂᖅ | ᒪᓂᔨᓂᖅ ᖃᓄᐃᖕᖏᓂᕐᒧᑦ ᑐᑭᓯᐅᑎᑦᓴᓂᒃ ᓄᓇᓕᓐᓄᑦ ᑐᑭᓯᓇᑦᓯᐊᑎᑕᐅᔪᓂᒃ. ᑐᕌᒐᖓ ᓄᓇᓕᓐᓃᑐᓂᒃ ᐃᓕᓐᓂᐊᑎᑦᓯᓂᐅᑉ ᐃᑉᐱᒍᓱᒋᐊᕐᑎᓯᓂᐅᕙᓪᓗᓲᖅ ᐊᒻᒪᓗ ᑐᑭᓯᓕᐅᒥᑎᑦᓯᐅᑕᐅᑦᓱᓂ ᐱᔭᕆᐊᑭᖕᖏᓂᖏᓐᓂᒃ ᖃᓄᐃᖕᖏᓂᕐᒥ ᐱᓀᓗᑦᓯᓯᒪᐅᑕᐅᓲᑦ. ᐆᑦᑑᑎᐅᒍᓐᓇᑐᑦ ᐊᑭᓐᓇᒥᐅᑌᑦ, FB-ᑯᑦ ᓄᐃᑌᑦ, ᑐᓴᐅᑎᒃᑰᓃᑦ, ᐊᒻᒪᓗ ᓄᓇᓕᓐᓂ ᐊᑑᑎᓂᖃᕐᕕᓂ. |
ᓄᓇᓕᓐᓂ ᓱᓇᒥᑦᑐᓂᒃ ᖃᐅᔨᓴᕐᓂᖅ | ᓄᓇᓕᓐᓂ ᓱᓇᒥᑦᑐᓂᒃ ᖃᐅᔨᓴᕐᓂᖅ ᐊᒥᓲᓈᕐᑎᑐᓂᒃ (ᓄᓇᓕᒻᒦᑐᓕᒫᓂᐅᒍᓐᓇᑐᖅ) ᕿᓄᕕᐅᑎᓗᒋᑦ ᐃᓚᐅᖁᔭᐅᑦᓱᑎᒃ ᖃᐅᔨᓴᕐᓂᒧᑦ ᐱᑕᖃᕐᑐᖃᕐᒪᖔᑦ ᓂᒪᕐᑐᓂᒃ ᐅᕝᕙᓘᓐᓃᑦ ᕿᑲᕐᑐᓂᒃ ᐳᕙᓪᓗᓇᐅᑉ ᖁᐱᕐᕈᐊᕈᖏᓐᓂᒃ, ᒪᓗᓐᓇᐅᑎᖃᖕᖏᑲᓗᐊᕐᒪᑕ. ᓄᓇᓕᓐᓂ ᓱᓇᒥᑦᑐᓂᒃ ᖃᐅᔨᓴᕐᓂᖅ ᐃᑲᔪᕐᓯᔪᖅ ᑕᑯᓚᕿᒋᐊᕐᓂᒥᒃ ᐳᕙᓪᓗᓇᕐᒥᒃ ᖃᐅᔨᔭᐅᓯᒪᖕᖏᑐᓂᒃ ᐊᒻᒪᓗ ᐱᒻᒪᕆᐅᑦᓱᓂ ᐃᑲᔪᕐᓯᓂᐅᑦᓱᓂ ᓄᓇᓕᓐᓂ ᐳᕙᓪᓗᓇᕐᑕᖃᖕᖏᑑᑎᑕᐅᒋᐊᕐᑎᓗᒍ. |
ᐱᕙᓪᓕᐸᓪᓕᐊᓂᕐᒥᒃ ᐃᑉᐱᒍᓱᒍᑎᒃ | ᐊᑐᕐᑕᐅᓲᖅ ᕿᑲᕐᑐᓂᒃ ᐳᕙᓪᓗᓇᕐᑐᑕᓕᐅᑉ ᒪᒥᓴᕐᑕᐅᓂᖓᓂ ᖃᐅᔨᒣᓐᓇᑕᐅᒋᐊᕐᑎᓗᒋᑦ ᐄᖃᑦᑕᑕᖏᑦᑕ ᐃᓅᑉ ᖃᓄᐃᓪᓗᐊᓂᖏᑦ (ᐅᓪᓗᐃᑦ ᐄᒐᕐᑐᕖᑦ). ᐃᓄᒃ ᐱᕕᑦᓴᒥᓂ ᐄᒋᐊᓕᒥᓂᒃ ᐄᕐᖃᖃᑦᑕᑐᑦᓴᐅᓂᕐᒪᑦ ᓈᒻᒪᓈᕐᓯᒪᑎᓪᓗᒋᑦ ᑌᒣᑉᐸᑦ ᒪᒥᓴᕐᓂᖓ ᐃᓱᒪᒋᔭᐅᓚᖓᔪᖅ ᓈᒻᒪᓈᕐᑑᒋᐊᖓ. |
ᒪᖓᑦᓯᑌᓕᒋᐊᖃᕐᓂᖅ | ᓲᓱᑦᓴᓂᖅ ᐃᓅᑉ ᐱᔪᓐᓇᐅᑎᖓᓂᒃ ᐊᐅᓚᑦᓯᒍᓐᓇᓱᓂ ᑭᓇᒃᑯᑦ ᓇᒻᒥᓂᕐᒥᓅᓕᖓᔪᓂᒃ ᖃᓄᐃᖕᖏᓂᖓᓄᑦ ᑐᑭᓯᐅᑎᑦᓴᓂᒃ ᑕᑯᖃᑎᒌᒍᓐᓇᒪᖔᑕ. ᐋᓐᓂᐊᓯᐅᑎᒃᑯᓂ ᐱᓇᓱᑦᑏᑦ ᐱᐅᓯᕐᓱᓯᐊᕐᓂᒥᒃ ᐊᒻᒪᓗ ᐱᖁᔭᑎᒎᕐᑐᒥᒃ ᐱᑦᔪᑎᖃᓲᑦ ᓲᑦᓱᑦᓴᕆᐊᖃᕐᓱᑎᒃ ᓇᐅᓕᒫᓂᒃ ᑐᓴᕐᑎᓯᒋᐊᖃᕋᑎᒃ ᒪᖓᓪᓗᒍ ᐃᓄᒃ. |
ᐃᓄᒃ ᑲᑎᒪᔭᐅᓯᒪᔪᖅ | ᐃᓄᒃ ᓂᐅᕐᓯᔪᕕᓂᐅᑐᐃᓐᓇᕆᐊᓕᒃ ᐳᕙᓪᓗᓇᐅᑉ ᖁᐱᕐᕈᐊᕈᖓᓂᒃ (ᓴᓂᐊᓃᑦᓱᓂ ᐳᕙᓪᓗᑑᑉ ᐁᑦᑐᐃᒍᓐᓇᑑᑉ ᓂᒪᕐᑐᓂᒃ ᐳᕙᓪᓗᓇᕐᑕᖃᕐᓱᓂ) ᐊᒻᒪᓗ ᒪᓂᔨᕕᐅᑦᓱᓂ ᕿᑲᕐᑐᓂᒃ ᐅᕝᕙᓘᓐᓃᑦ ᓂᒪᕐᑐᓂᒃ ᐳᕙᓪᓗᓇᐅᑉ ᖁᐱᕐᕈᐊᕈᖏᓐᓂᒃ ᖃᐅᔨᓴᕐᑕᐅᒍᑎᒥᒃ. |
ᑲᑎᒪᔭᐅᓯᒪᔪᓂᒃ ᖃᐅᔨᓴᕐᓂᖅ (ᑲᑎᔭᐅᓯᒪᔪᓂᒃ ᕿᓂᕐᓂᖅ) | ᐳᕙᓪᓗᓇᓕᕆᔩᑦ ᕿᓄᕕᖃᓚᖓᔪᑦ ᐃᓄᒻᒥᒃ ᐅᖃᐅᑎᔭᐅᕋᑖᕐᑐᒥᒃ ᓂᒪᕐᑐᓂᒃ ᖁᐱᕐᕈᐊᕈᖏᑦ ᐳᕙᓪᓗᑐᒥᒃ ᑌᔨᖁᓗᒍ ᐃᓄᓐᓂᒃ ᑲᑎᒪᖃᑦᑕᑕᒥᓂᒃ. ᑌᒣᒋᐊᓕᒃ ᐳᕙᓪᓗᓇᓕᕆᔩᑦ ᒪᓂᔨᒍᓐᓇᒪᑕ ᕿᑲᕐᑐᓂᒃ ᐅᕝᕙᓘᓐᓃᑦ ᓂᒪᕐᑐᓂᒃ ᐳᕙᓪᓗᓇᐅᑉ ᖁᐱᕐᕈᐊᕈᖏᓐᓂᒃ ᐱᑕᖃᕐᒪᖔᑕ ᖃᐅᔨᓴᕐᑕᐅᓂᕐᓂᒃ ᓂᐅᕐᓯᔪᕕᓂᐅᑐᐃᓐᓇᕆᐊᓕᓐᓂᒃ ᐳᕙᓪᓗᓇᐅᑉ ᖁᐱᕐᕈᐊᕈᖏᓐᓂᒃ. |
ᐁᑦᑑᑕᐅᓐᓇᑐᖅ | ᖃᓂᒻᒪᓯᖅ ᓯᐊᒻᒪᒪᑦ ᐊᓯᖏᓐᓄᑦ ᐃᓄᓐᓄᑦ. ᓂᒪᕐᑐᑦ ᐳᕙᓪᓗᓇᐅᑉ ᖁᐱᕐᕈᐊᕈᓯᖏᑦ ᑭᓯᐊᓂ ᐁᑦᑑᑕᐅᒍᓐᓇᑐᑦ, ᐊᒻᒪᓗ ᐃᓄᐃᑦ ᐁᑦᑐᐃᒍᓐᓇᕕᖏᑦ ᐅᓪᓗᐃᑦ ᐅᕝᕙᓘᓐᓃᑦ ᐱᓇᓱᐊᕈᓰᑦ ᓄᖑᓲᑦ ᐱᒋᐊᕐᓯᒪᓕᕐᒪᑦ ᒪᒥᓴᐅᑎᓂᒃ. |
ᓱᕐᖁᐃᓇᕐᓯᐊᕆᔭᖅ ᐱᕈᕐᐸᓕᐊᑎᑕᐅᑦᓱᓂ | ᑖᓐᓇ ᐃᓅᑉ ᓄᕙᖓ ᐅᐊᕈᑦᓯᓯᒪᔪᖅ ᐊᑑᑎᖃᕐᑎᑕᐅᔪᒥ ᐳᓪᓚᐅᔭᒦᑦᑐᖅ ᑕᑯᒐᓱᐊᕋᑦᓴᐅᓚᖓᑦᓱᓂ ᐳᕙᓪᓗᓇᕐᑕᖃᕐᒪᖔᑦ ᓄᕙᒃ. ᐱᓇᓱᐊᕈᓯᓂ ᐊᒥᓱᑐᕈᓐᓇᑐᖅ ᐳᕙᓪᓗᓇᐅᑉ ᓄᐃᒐᓱᐊᕐᓂᖓ. ᖃᐅᔨᓴᐅᑎᒃ ᐱᐅᓂᕐᐸᐅᖃᑕᐅᔪᖅ ᖃᐅᔨᒍᑕᐅᒍᓐᓇᕋᒥ ᐃᓄᒃ ᓂᒪᕐᑐᓂᒃ ᐳᕙᓪᓗᓇᐅᑉ ᖁᐱᕐᕈᐊᕈᖏᓐᓂᒃ ᐱᑕᖃᕐᒪᖔᑦ. |
ᐋᓐᓂᐊᓯᐅᑎᒧᑦ ᓱᕐᖁᐃᑕᐅᒍᑎᒃ | ᐱᕙᓪᓕᐊᒍᑕᐅᔪᖅ ᖃᐅᔨᒐᓱᐊᕐᑐᒧᑦ ᐃᓄᒃ ᐳᕙᓪᓗᓇᐅᑉ ᖁᐱᕐᕈᐊᕈᖏᓐᓂᒃ ᑎᒥᖓ ᐱᑕᖃᕐᒪᖔᑦ. ᐊᒥᓱᕕᒐᓛᒋᐊᖃᓲᑦ ᐊᑦᔨᒌᖕᖏᑐᑦ ᖃᐅᔨᓴᕈᑏᑦ ᐊᑐᕐᓱᒋᑦ ᓱᕐᖁᐃᓯᒋᐊᕐᓂᖅ ᐃᓄᒃ ᐳᕙᓪᓗᖏᑦᑑᒪᖔᑦ ᐅᕝᕙᓘᓐᓃᑦ ᕿᑲᕐᑐᓂᒃ ᐅᕝᕙᓘᓐᓃᑦ ᓂᒪᕐᑐᓂᒃ ᐳᕙᓪᓗᓇᐅᑉ ᖁᐱᕐᕈᐊᕈᖏᓐᓂᒃ ᐱᑕᖃᕐᒪᖔᑦ. |
ᑕᑯᓐᓇᓚᕆᓪᓗᒍ ᒪᒥᓴᐅᑎᑐᕐᑎᓯᓂᖅ (DOT) | ᐃᓄᒃ ᑕᑯᓐᓇᑎᓗᒍ ᐳᕙᓪᓗᓂᐅᑎᒥᒃ ᐄᓯᔪᖅ. ᑌᒣᓘᓲᑦ ᐃᓘᓐᓇᑎᒃ ᐄᒉᑦ ᐅᓪᓗᑕᒫᑦ ᐄᔭᐅᑦᓯᐊᓂᖏᑦ ᓱᕐᖁᐃᓇᕆᐊᖃᕐᒪᑕ. ᐊᓪᓗᐃᑕᕐᓂᒃ ᐅᓪᓗᓂᐊᓪᓛᑦ ᐊᒥᓱᓂᒃ ᖃᐅᔨᒪᓇᕐᒪᑦ ᖁᐱᕐᕈᐊᕈᕐᓂᒃ ᑐᖁᓭᒍᑏᑦ ᓱᖕᖏᑑᑐᐃᓐᓇᕆᐊᖃᕐᓂᖏᓐᓂᒃ ᐊᒻᒪᓗ ᐃᓄᒃ ᖃᓂᒻᒪᓚᕿᓗᓂ ᐊᒻᒪᓗ ᐳᕙᓪᓗᓇᕐᒥᒃ ᓯᐊᒻᒪᑎᑦᓯᓂᐅᔭᓯᒌᕐᒥᓗᓂ. |
ᐄᔭᐅᒋᐊᓖᑦ ᐊᖏᓂᖏᑦ ᐅᓄᕐᓂᖏᑦ | ᑖᓐᓇ ᐊᒥᓱᓂᒃ ᑐᕿᖃᕈᓐᓇᑐᖅ. ᐃᓛᓐᓂ, ᐄᔭᐅᒋᐊᓖᑦ ᐊᖏᓂᖏᑦ ᐅᓄᕐᓂᖏᓪᓘᓃᑦ ᑐᑭᖃᓲᖅ ᐅᓄᕐᓂᖓᓂᒃ ᐋᓐᓂᐊᓯᐅᑎᐅᑉ grams-ᑎᒍᑦ ᐅᕝᕙᓘᓐᓃᑦ milligrams-ᑎᒍᑦ. ᐃᓛᓐᓂ ᐊᖏᓂᖏᑦ ᐅᓄᕐᓂᖏᑦ ᑐᑭᖃᓲᖅ ᐳᕙᓪᓗᓇᐅᑉ ᖁᐱᕐᕈᐊᕈᖏᓐᓂᒃ ᑐᖁᓭᒍᑏᑦ ᐄᔭᐅᒋᐊᓖᑦ ᐅᓪᓗᒥ 1-ᒥ. ᐆᑦᑑᑎᒃ: ᐃᓄᒃ ᐊᓪᓗᐃᔪᖅ 1-ᒥᒃ ᐅᓪᓗᒥᒃ ᓂᒪᕐᑐᓂᒃ ᐳᕙᓪᓗᓇᐅᑉ ᖁᐱᕐᕈᐊᕈᖏᓐᓂᒃ ᐱᑕᖃᕐᓱᓂ ᒪᒥᓴᕐᓱᓂ ᐊᓪᓗᐃᒐᔭᕆᕗᖅ 1-ᒥ ᐄᒋᐊᓕᖓᑕ ᐊᖏᓂᖓᓂᒃ ᖁᐱᕐᕈᐊᕈᕐᓂᒃ ᑐᖁᓭᒍᑎᒥᒃ. |
ᒪᒥᑦᓯᐅᑎᒃ | ᐳᕙᓪᓗᓇᖅ ᐅᖃᐅᓯᐅᓕᕐᒪᑦ, ᑖᓐᓇ ᐊᓯᒋᔭᐅᑎᓗᒍ ᐅᖃᐅᓯᐅᓲᖅ ᖁᐱᕐᕈᐊᕈᕐᓂᒃ ᑐᖁᓭᒍᑎᒃ. ᐃᓘᓐᓈᒍᑦ ᐅᖃᐅᓯᕆᔭᐅᒍᓐᓇᒥᑦᓱᓂ ᐄᒐᐅᒋᐊᖓ. |
ᒪᒥᑦᓯᐅᑎᒧᑦ ᑐᖁᑕᐅᕐᖃᔭᖕᖏᑐᖅ | ᐊᑦᓯᔭᐅᓯᒪᒻᒥᔪᖅ ᖁᐱᕐᕈᐊᕈᕐᓄᑦ ᑐᖁᓭᒍᑎᒧᑦ ᓱᕙᓪᓕᔭᐅᕐᖃᔭᖕᖏᑐᖅ. ᑖᓐᓇ ᖁᐱᕐᕈᐊᕈᕐᓂᒃ ᑐᖁᓭᒍᑎᒃ ᑐᖁᑦᓯᖃᔦᕐᒪᑦ ᖁᐱᕐᕈᐊᕈᕐᓂᒃ. ᑕᒪᓐᓇ ᐳᕙᓪᓗᓇᕐᒥᒃ ᒪᒥᑦᓯᒋᐊᒥᒃ ᐱᔭᕐᓃᑑᓂᕐᓴᒪᕆᐅᓚᖀᓲᖅ. ᒪᒥᑦᓯᐅᑎᒧᑦ ᑐᖁᑕᐅᕐᖃᔦᓲᑦ ᐋᓐᓂᐊᓯᐅᕐᑕᖅ ᐱᒋᐊᕐᑐᕕᓂᐅᑦᓱᓂ ᓄᕐᙯᓇᕐᒪᑦ ᒪᒥᓴᐅᑎᒥᓂᒃ ᐊᑯᓂ ᐱᖃᑦᑕᕈᓐᓀᓱᒋᑦ. ᓇᑯᕐᒪᑦ ᓄᓇᕕᒻᒥ, ᑕᑯᓗᐊᕐᐸᖏᑦᑐᒍᑦ ᒪᒥᑦᓯᐅᑎᒧᑦ ᑐᖁᑕᐅᕐᖃᔦᕐᑐᓂᒃ ᐊᒻᒪᓗ ᑌᒣᖏᓐᓇᖁᔨᑦᓱᑕ! |
ᒪᒥᑦᓯᐅᑎᓄᑦ ᑐᖁᑕᐅᕐᖃᔭᖕᖏᑐᓂᒃ ᐳᕙᓪᓗᓇᕐᑐᑕᓕᒃ | ᐳᕙᓪᓗᓇᐅᑉ ᖁᐱᕐᕈᐊᕈᖏᑦ ᑐᖁᑕᐅᕐᖃᔭᕈᓐᓀᑐᑦ ᐊᑐᕐᑕᐅᓲᓄᑦ ᖁᐱᕐᕈᐊᕈᕐᓂᒃ ᑐᖁᓭᒍᑎᓄᑦ. |
ᒪᒥᑦᓯᐅᑎᓄᑦ ᑐᖁᑕᐅᒍᓐᓇᑐᖅ | ᒧᒥᖓᐅᑎᖓ ᑐᑭᖓᑕ "ᒪᒥᑦᓯᐅᑎᓄᑦ ᑐᖁᑕᐅᕐᖃᔭᖕᖏᑑᑉ". ᖁᐱᕐᕈᐊᕈᕐᓂᒃ ᑐᖁᓭᒍᑎᒃ ᑐᖁᑦᓯᒍᓐᓇᑐᖅ ᖁᐱᕐᕈᐊᕈᕐᓂᒃ. |
ᐳᕚᒃ ᐊᓯᐊᒍᑦ ᐳᕙᓪᓗᓇᕐᑐᑕᓕᒃ | ᓂᒪᕐᑐᑦ ᐳᕙᓪᓗᓇᐅᑉ ᖁᐱᕐᕈᐊᕈᖏᑦ ᑎᒥᐅᑉ ᐃᓚᖏᓐᓃᑐᑦ ᐳᕚᒃ ᓯᓚᑖᓂ. ᑌᒣᓕᒍᓐᓇᑐᖅ ᖃᕆᑕᐅᑉ ᓴᓂᐊᓂ, ᓴᐅᓂᕐᓂ, ᑯᔭᐱᒐᕐᒥ, ᓈᕐᒥ, ᖁᖏᓯᕐᒥ, ᐊᒻᒪᓗ ᑕᕐᑑᓂ. ᓇᓂᑐᐃᓐᓇᑲᓵᑦᓯᐊᖅ ᑎᒥᒥ! |
GeneXpert ᐅᕝᕙᓘᓐᓃᑦ TB PCR | ᑖᓐᓇ ᐃᓅᑉ ᓄᕙᖓ ᐃᓕᔭᐅᒻᒪᑦ ᐃᑯᒪᐅᑎᒨᕐᑐᒧᑦ ᖃᐅᔨᑎᑦᓯᒍᓐᓇᑐᒧᑦ ᐅᕙᑦᑎᓂᒃ ᐳᕙᓪᓗᓇᐅᑉ ᖁᐱᕐᕈᐊᕈᓯᖏᓐᓂᒃ ᐱᑕᖃᕐᒪᖔᑦ. ᖃᐅᔨᓴᐅᑎᒃ ᓂᒪᕐᑐᓂᒃ ᐳᕙᓪᓗᓇᕐᑐᖃᕐᒪᖔᑦ. ᖃᐅᔨᔭᐅᒍᑎᖏᑦ ᓄᐃᑦᓯᐊᒍᓲᑦ ᐅᓪᓗᓂ ᐊᒥᓲᖕᖏᑐᓂ. |
ᐱᔪᑦᓴᐅᔮᕈᑎᑦᓭᑦ | ᒪᓂᔨᓂᖅ ᐱᕙᓪᓕᖁᑎᐅᓚᖓᔪᓂᒃ ᐱᔭᕆᐊᑭᓪᓕᑎᕐᑎᓯᓲᑦ ᐃᓄᓐᓂᒃ ᐋᓐᓂᐊᓯᐅᑎᒃᑯᓄᑦ ᙯᒋᐊᓕᓐᓂᒃ ᐅᕝᕙᓘᓐᓃᑦ ᒪᒥᓴᐅᑎᑐᕆᐊᕐᑐᕆᐊᓕᓐᓂᒃ. ᐱᔪᑦᓴᐅᔮᕐᓂᖃᕈᓂ ᐃᓕᑕᕐᓯᒪᐅᑕᐅᓲᖅ ᖃᐅᔨᓴᕐᑕᐅᓂᖅ ᐳᕙᓪᓗᓇᕐᑕᖃᕐᒪᖔᑦ ᐊᒻᒪᓗ ᐳᕙᓪᓗᓇᕐᒧᑦ ᒪᒥᓴᕐᓂᖅ ᐱᔭᕐᓃᑑᒍᓐᓇᓂᖓᓂᒃ ᐃᓄᓐᓄᑦ ᐊᒻᒪᓗ ᐃᓚᖏᓐᓄᑦ. ᐆᑦᑑᑏᑦ ᐱᔪᑦᓴᐅᔮᕐᑎᓯᐅᑎᑦᓴᐅᓱᑎᒃ ᐃᓚᓖᑦ ᑯᐊᐸᒃᑯᓂ ᓂᐅᕕᐅᑎᑦᓴᑖᕐᑎᓯᐅᑏᑦ, ᐁᔭᐅᒍᒪᑉᐸᑕ ᐁᑦᓯᒍᓐᓇᖃᑦᑕᓂᖅ, ᓂᕿᓯᒋᐊᕐᑐᕈᑦᔨᓂᖅ ᐅᕝᕙᓘᓐᓃᑦ ᐊᓯᖏᓐᓂᒃ ᐁᑦᑑᑎᑦᓴᖃᕐᓂᖅ. |
ᐃᓄᑐᐊᒃᑯᕕᒻᒦᑐᖅ | ᐃᓄᒃ ᐁᑦᑐᐃᒍᓐᓇᒪᑦ ᐊᕕᑦᓯᒪᑎᑕᐅᔪᖅ ᐃᓅᖃᑎᒥᓄᑦ (ᓈᒻᒪᓈᑦᓯᐊᓯᒪᔭᐅᓗᓂ ᐱᑦᔪᑎᖃᕐᓂᖓᒍᑦ) ᓯᐊᒻᒪᑎᑦᓯᓚᕿᓂᐊᖕᖏᒪᑦ ᐳᕙᓪᓗᓇᐅᑉ ᖁᐱᕐᕈᐊᕈᓯᖏᓐᓂᒃ ᐁᑦᑐᓗᒋᑦ ᓇᓪᓕᒋᔭᖏᑦ ᓇᓪᓕᑎᖏᑦ ᐊᒻᒪᓗ ᓄᓇᓖᑦ. |
ᕿᑲᕐᑐᑦ ᐳᕙᓪᓗᓇᐅᑉ ᖁᐱᕐᕈᐊᕈᖏᑦ | ᐊᑎᖃᕐᑎᑕᐅᒻᒥᔪᑦ ᓯᓂᑦᑐᖅ ᐳᕙᓪᓗᓇᖅ ᐅᕝᕙᓘᓐᓃᑦ ᐳᕙᓪᓗᓇᕐᒧᑦ ᐃᒻᒪᓯᒪᔪᖅ. ᐳᕙᓪᓗᓇᐅᑉ ᖁᐱᕐᕈᐊᕈᓯᖏᑦ ᑎᒥᒻᒦᓱᑎᒃ ᑭᓯᐊᓂ ᑎᒥᒥᒃ ᓱᒃᑯᐃᕙᓪᓕᐊᖏᑦᑐᑦ. ᐃᓄᒃ ᖃᓂᒪᖕᖏᑐᖅ ᐊᒻᒪᓗ ᓯᐊᒻᒪᑎᑦᓯᖃᔭᕋᓂ ᐳᕙᓪᓗᓇᕐᒥᒃ ᐊᓯᒥᓄᑦ ᐃᓄᓐᓄᑦ. |
ᖁᐱᕐᕈᐊᕈᓯᓕᕆᓂᖅ | ᖃᐅᔨᓴᕐᓂᖅ ᒥᑭᔪᕐᓚᓂᒃ ᐆᒪᔪᐊᕈᕐᓂᒃ, ᒥᑭᔫᑦᓴᕋᒥᒃ ᐊᖏᓕᒪᐅᑎᒧᑦ ᑭᓯᐊᓂ ᑕᑯᔭᐅᒍᓐᓇᑐᑦ (ᐱᕕᓕᒫᒃᑯᑦ ᐊᖏᓪᓕᑎᕆᒍᓐᓇᑐᒧᑦ). ᑖᓐᓇ ᐃᓚᓕᒃ ᖁᐱᕐᕈᐊᕈᓰᑦ ᖃᐅᔨᓴᕐᑕᐅᓂᖏᓐᓂᒃ. |
ᐃᑉᐱᒍᓱᓐᓂᖅ | ᖃᐅᔨᒣᓐᓇᕋᓱᐊᕐᓂᖅ ᐅᕝᕙᓘᓐᓃᑦ ᐱᓗᐊᕐᑐᒥᒃ ᐃᑉᐱᒋᔭᖃᕐᓂᖅ ᖃᓄᐃᖕᖏᓂᕐᒥ ᐊᓯᑦᔨᐅᑕᐅᔪᓂᒃ. |
ᐋᓐᓂᐊᓯᐅᕐᑕᖅ | ᐃᓄᒃ ᑲᒪᒋᔭᖅ ᐊᒻᒪᓗ/ᐅᕝᕙᓘᓐᓃᑦ ᒪᒥᓴᕐᑕᐅᔪᖅ ᖃᓄᐃᖕᖏᓯᐊᕐᓂᓕᕆᔨᓄᑦ. |
PPE (ᐃᒻᒥᓂᒃ ᐅᖑᒪᐅᑏᑦ ᐱᐅᒃᑯᑏᑦ) | ᓱᓇᑐᐃᓐᓀᑦ ᐃᓄᐃᑦ ᐅᕝᕙᓘᓐᓃᑦ ᖃᓄᐃᖕᖏᓂᓕᕆᔩᑦ ᐱᓇᓱᑦᑏᑦ ᐊᑐᓲᖏᑦ ᐃᒻᒥᓂᒃ ᐅᖑᒪᐅᑎᒋᑦᓱᒋᑦ ᖃᓂᒪᓐᓇᒥᒃ ᐁᑦᑐᑕᐅᒌᒃᑯᑎᒋᑦᓱᒋᑦ. ᐃᒣᑦᑑᒍᓐᓇᑐᑦ ᒪᑐᒣᒍᑏᑦ ᕿᖓᕐᒥᒃ ᖃᓂᕐᒥᓗ ᐅᕝᕙᓘᓐᓃᑦ ᐊᒡᒐᔮᒃ. |
ᓱᒃᑯᓚᕿᑎᑦᓯᑌᓕᒍᑎᒃ | ᓱᓇᒥᑦᑐᓂᒃ ᖃᐅᔨᓴᕐᓂᖅ, ᒪᒥᓴᕐᓂᖅ ᐅᕝᕙᓘᓐᓃᑦ ᑲᒪᒋᔭᐅᓂᖅ ᐊᑑᑎᓲᖅ ᖃᓂᒪᑦᑕᖃᕐᓂᐅᔭᕐᑐᒥ, ᓱᕐᖁᐃᑕᐅᓪᓚᕆᕋᑕᖕᖏᑐᒥᒃ. ᓱᒃᑯᓚᕿᑎᑦᓯᑌᓕᒍᑏᑦ ᐊᑑᑎᔦᑦ ᐱᕕᑦᓴᖃᕐᑎᒋᐊᓪᓚᓱᒋᑦ ᐱᔭᐅᒋᐊᖃᕐᓂᖏᑦ ᑐᑭᓯᐅᑎᑦᓴᒋᐊᓪᓓᑦ, ᖃᓂᒪᓐᓇᒪᕆᒻᒧᑦ ᐊᑦᑐᑕᐅᑎᑦᓯᑌᓕᒋᐊᖃᕐᓂᒧᑦ, ᐊᒻᒪᓗ/ᐅᕝᕙᓘᓐᓃᑦ ᖁᐊᕐᓭᔭᐅᑦᑌᓕᒍᑎᐅᑦᓱᑎᒃ ᖃᓂᒪᓐᓇᒧᑦ ᓄᐃᕙᓪᓕᐊᓯᔪᒧᑦ. |
ᐋᓐᓂᐊᓯᐅᑎᐊᓘᑉ ᐱᔭᐅᖁᔭᖓ | ᐅᖃᐅᓯᖅ "ᐋᓐᓂᐊᓯᐅᑎᐊᓘᑉ ᐱᔭᐅᖁᔭᖓ" ᐊᑐᕐᑕᐅᕙᓪᓗᓲᖅ ᐅᖃᐅᓯᐅᓕᕐᒪᑕ ᐅᓄᕐᓂᖏᑦ ᐊᒻᒪᓗ ᖃᓄᐃᑦᑑᓂᖏᑦ ᐄᕐᖃᑕᐅᒋᐊᓖᑦ ᐅᕝᕙᓘᓐᓃᑦ ᒪᒥᓴᐅᑎᐅᒋᐊᓖᑦ. ᐆᑦᑑᑎᒃ: ᐃᓄᒃ ᐋᓐᓂᐊᓯᐅᑎᐊᓗᒻᒧᑦ 600 milligrams-ᓂᒃ ᖁᐱᕐᕈᐊᕈᕐᓂᒃ rifampicin ᑐᖁᓭᒍᑎᑐᒋᐊᖃᕐᓂᕋᕐᑕᖅ 4-ᓂ ᑕᕐᕿᓂ. |
ᐊᑑᑎᖕᖏᓚᕿᑎᑦᓯᑌᓕᓂᖅ | ᒪᓂᔨᓂᖅ ᑲᒪᓂᕐᒥᒃ ᐅᕝᕙᓘᓐᓃᑦ ᒪᒥᓭᓂᕐᒥᒃ ᐃᓄᒻᒥᒃ ᖃᓂᒻᒪᕋᑕᖕᖏᑐᒥᒃ ᖃᓂᒻᒪᖏᑦᑑᑎᒋᐊᕐᓱᒍ. ᐃᒻᒥᓂᒃ ᐅᖑᒪᐅᑏᑦ ᐱᐅᒃᑯᑏᑦ (PPE) ᐊᑐᕐᑕᐅᓲᒍᒻᒥᔪᖅ. |
ᐳᕙᓪᓗᑐᖅ ᐳᕙᒃᑯᑦ | ᐳᕙᓐᓂ ᓂᒪᕐᑐᑦ ᐳᕙᓪᓗᓇᐅᑉ ᖁᐱᕐᕈᐊᕈᖏᑦ. |
ᐳᕙᓪᓗᒋᐊᓪᓚᑐᖅ | ᐃᓄᒃ ᓯᓂᑦᑐᓂᒃ ᐳᕙᓪᓗᓇᐅᑉ ᖁᐱᕐᕈᐊᕈᖏᓐᓂᒃ ᐱᑕᓕᕕᓂᖅ ᐅᕝᕙᓘᓐᓃᑦ ᓂᒪᕐᑐᓂᒃ ᐳᕙᓪᓗᓇᐅᑉ ᖁᐱᕐᕈᐊᕈᖏᓐᓂᒃ ᐱᑕᓕᕕᓂᖅ ᓄᑖᓂᒃ ᐳᕙᓪᓗᓇᐅᑉ ᖁᐱᕐᕈᐊᕈᓯᖏᓐᓂᒃ ᓂᐅᕐᓯᒪᑦ ᑎᒥᖓ ᐱᑕᑦᓯᕕᐅᑎᓗᒍ. |
ᓱᖏᐅᓐᓂᖃᕈᑎᒃ | ᒪᓕᑦᑕᐅᓲᖅ ᓱᓇᑐᐃᓐᓇᖅ ᐱᔭᕇᒋᐊᖃᕐᒪᑦ. ᐊᑑᑎᑎᑕᐅᓕᕐᕿᕙᓪᓗᓲᖅ ᐊᒥᓱᕕᑦᓱᓂᐊᓪᓛᑦ. |
ᓱᓇᒥᑦᑐᓂᒃ ᖃᐅᔨᓴᕐᓂᖅ | ᐃᒣᓕᔫᑉ ᐊᓯᐊᒍ ᑐᑭᑦᓭᓇᖓ: "ᕿᓂᕐᑐᖅ". ᐅᖃᐅᓯᖅ "ᓱᓇᒥᑦᑐᓂᒃ ᖃᐅᔨᓴᕐᓂᖅ" ᐊᑐᕐᑕᐅᒍᓐᓇᑐᖅ ᐊᑦᔨᒌᖕᖏᑐᓂ ᐅᖄᔭᐅᔪᓂ. ᐊᑕᐅᓯᖅ ᐃᓄᒃ ᓱᓇᒥᑦᑐᓂᒃ ᖃᐅᔨᓴᕐᑕᐅᒍᓐᓇᑐᖅ ᐳᕙᓪᓗᒪᖔᑦ, ᑐᑭᖓ ᑎᒥᒥᓂ ᐳᕙᓪᓗᓇᐅᑉ ᖁᐱᕐᕈᐊᕈᖏᓐᓂᒃ ᐱᑕᖃᕐᒪᖔᑦ ᖃᐅᔨᓴᕐᑕᐅᔪᖅ ('ᓄᓇᓕᓐᓂ ᓱᓇᒥᑦᑐᓂᒃ ᖃᐅᔨᓴᕐᓂᖅ'), ᐊᒥᓱᑦ ᓄᓇᓕᒥᐅᑦ ᕿᓄᕕᐅᔪᑦ ᐳᕙᓪᓗᓇᕐᑕᖃᕐᒪᖔᑕ ᖃᐅᔨᓴᕐᑕᐅᖁᔭᐅᑦᓱᑎᒃ ᙯᓗᑎᒃ. |
ᖃᓄᐃᓕᖕᖓᑕᐅᓂᕐᓘᑎᒃ | ᐄᒐᕐᑐᓱᓂ ᖃᓄᐃᓕᖕᖓᐅᑎᐅᒍᒥᓇᖕᖏᑐᒥᒃ ᖃᓄᐃᓕᖕᖓᑕᐅᔪᖅ, ᖃᐅᔨᓴᕐᑕᐅᓱᓂᓘᓐᓃᑦ, ᐅᕝᕙᓘᓐᓃᑦ ᑲᐱᔭᐅᑦᓱᓂ. ᖃᓄᐃᓕᖕᖓᑕᐅᓂᕐᓘᑎᒃ ᐃᑲᔪᕐᓯᒍᓐᓇᑐᖅ, ᓱᓚᖀᒍᓐᓀᓗᓂ ᐅᕝᕙᓘᓐᓃᑦ ᓱᒃᑯᐃᓚᕿᓗᓂ ᑎᒥᒥᒃ, ᑭᓯᐊᓂ ᐃᓘᓐᓈᒍᑦ ᐃᓱᒫᓘᑎᖃᓲᒍᔪᒍᑦ ᓱᒃᑯᑕᐅᓚᕿᑦᓱᑦᑎᒃ ᖃᓄᐃᓕᖕᖓᑕᐅᓂᕐᓗᑐᓂᒃ. |
ᐆᑦᑐᕋᕐᑕᐅᒍᑎᒥᓄᑦ ᒪᒥᓴᕆᐊᖃᓚᕿᔪᖅ | ᑌᔭᐅᓂᕐᓴᐅᓲᖅ "ᐊᓱᐃᓛᒍᑎᓗᒍ ᖃᐅᔨᓴᕐᑕᐅᒍᑎᖓ ᖃᐅᔨᔭᐅᔪᖅ". ᐊᑐᕐᑕᐅᓲᖅ ᓇᓗᓀᕐᓯᐅᑕᐅᑦᓱᓂ ᖃᐅᔨᓴᕐᑕᐅᒍᑎᖓᑕ ᖃᓄᐃᓕᓂᖓᓂᒃ. ᒪᒥᓴᕆᐊᖃᓚᕿᔪᖅ ᐅᕝᕙᓘᓐᓃᑦ ᐊᓱᐃᓛᒍᔪᖅ ᖃᐅᔨᓴᕐᑕᐅᓱᓂ ᖃᓄᐃᓕᓂᖓ ᐃᓄᒃ ᐳᕙᓪᓗᑐᐃᓐᓇᕆᐊᖃᕐᑎᓗᒍ. ᐆᑦᑑᑎᒃ: ᒪᒥᓴᕆᐊᖃᓚᕿᔪᖅ ᐅᕕᓂᒃᑯᑦ ᖃᐅᔨᓴᕐᑕᐅᓱᓂ ᑐᑭᖓ ᐃᓄᒃ ᐳᕙᓪᓗᓀᑦ ᖁᐱᕐᕈᐊᕈᓯᖏᓐᓂᒃ ᐱᑕᓕᒃ ᑎᒥᖓ. |
SI-PMI (Système d’information pour la protection de maladies infectieuses) | ᖃᕆᑕᐅᔭᒃᑯᑦ ᐋᓐᓂᐊᓯᐅᑎᐊᓗᐃᑦ ᐊᒻᒪᓗ ᐋᓐᓂᐊᓯᐅᑏᑦ ᖃᐅᔨᒐᓱᐊᕈᓐᓇᕕᖓ ᑲᐴᑎᓂᒃ (ᐊᒻᒪᓗ ᐊᓯᖏᓐᓂᒃ ᑐᑭᓯᐅᑎᑦᓴᓂᒃ) ᐃᓅᑉ ᑭᖑᓂᕐᒥ ᐊᑑᑎᓯᒪᑐᐃᓐᓇᕆᐊᓕᖏᓐᓂᒃ. |
ᐅᕕᓂᒃᑯᑦ ᖃᐅᔨᓴᕈᑎᒃ | ᐊᑑᑎᑎᑕᐅᓲᖅ ᕿᓂᕈᑕᐅᑦᓱᓂ ᐳᕙᓪᓗᓇᐅᑉ ᖁᐱᕐᕈᐊᕈᖏᓐᓂᒃ ᑎᒥᒦᑦᑐᓂᒃ. ᐋᓐᓂᐊᓯᐅᑎᒃ ᑲᐱᓯᑎᓪᓗᒍ ᐅᕕᓂᐅᑉ ᐊᑖᓅᓚᖓᔪᖅ ᐃᒪᖓ ᐳᕕᕐᓯᐊᐱᓪᓗᓂ ᐅᕕᓂᒻᒥᒃ. ᑖᓐᓇ ᐃᓄᒃ ᐅᑎᕆᐊᖃᓛᕐᑐᖅ 2-3 ᐅᓪᓗᐃᑦ ᓈᑉᐸᑕ ᐋᓐᓂᐊᓯᐅᑎᒧᑦ ᖃᐅᔨᓴᕐᑕᐅᒍᑎᕕᓂᕐᒥᓂᒃ ᑐᓴᕐᑎᑕᐅᒋᐊᕐᑐᓗᓂ. ᑕᑯᓗᒍ ᐅᕕᓂᒃᑯᑦ ᖃᐅᔨᓴᕈᑎᒃ (ᖁᑉᐱᒐᖅ 66) |
ᐳᕙᓪᓗᓇᖅ ᖁᐱᕐᕈᐊᕈᖏᑦ ᓯᓂᑦᑐᑦ | ᑕᑯᓗᒍ "ᕿᑲᕐᑐᑦ ᐳᕙᓪᓗᓇᐅᑉ ᖁᐱᕐᕈᐊᕈᖏᑦ" ᖁᓛᓂ ᓇᓗᓀᒃᑯᑕᕐᓂ ᐅᕝᕙᓘᓐᓃᑦ ᕿᑲᕐᑐᑦ ᐳᕙᓐᓗᓀᑦ (ᖁᑉᐱᒐᖅ 55) |
ᐊᐃᑦᑑᐱᔭᕐᑕᖅ | ᑌᔭᐅᒻᒥᔪᖅ Frottis. ᑖᓐᓇ ᐃᓅᑉ ᓄᕙᖓᑕ ᖃᐅᔨᓴᕐᑕᐅᒍᑎᖓ ᕿᒥᕐᕈᔭᐅᔪᖅ ᐊᖏᓕᒪᐅᑎᐅᑉ ᐊᑖᒍᑦ (ᐊᑦᔨᓕᐅᕈᑎᑕᓕᒻᒧᑦ ᐊᖏᓕᒪᑎᑦᓯᒪᕆᓲᒧᒃ) ᑕᑯᔭᐅᒍᓐᓇᓯᑎᓗᒋᑦ ᐳᕙᓪᓗᓇᐅᑉ ᖁᐱᕐᕈᐊᕈᖏᑦ. ᐳᕙᓪᓗᓇᐅᑉ ᖁᐱᕐᕈᐊᕈᖏᑦ ᑕᑯᔭᐅᒻᒪᑦ, ᑐᑭᖃᕙᓪᓗᓲᖅ ᐃᓅᑉ ᐁᑦᑐᑐᐃᓯᓇᐅᓂᕐᓴᐅᓂᖓᓂᒃ. ᐃᓄᐃᑦ ᐃᓚᖏᑦ ᓂᒪᕐᑐᓂᒃ ᐳᕙᓪᓗᓇᖃᓲᒍᒻᒥᔪᑦ ᖁᐱᕐᕈᐊᕈᖏᑦ ᑕᑯᔭᐅᖕᖏᑲᓗᐊᕐᒪᑕ ᐊᖏᓕᒪᐅᑎᐅᑉ ᐊᑖᓂ. |
ᓄᕙᒻᒥᒃ ᖃᐅᔨᓴᕈᑎᒃ | ᐊᑑᑎᔭᐅᓲᖅ ᕿᓂᕐᑕᐅᑎᓗᒋᑦ ᐳᕙᓪᓗᓇᐅᑉ ᖁᐱᕐᕆᐊᕈᖏᑦ ᑎᒥᒦᑦᑐᑦ. ᐋᓐᓂᐊᓯᐅᑎᒃ ᐃᓄᒻᒥᒃ ᓂᐅᕐᓯᖁᔨᓚᖓᔪᖅ ᐃᒪᐅᑉ ᐳᔪᖓᓂᒃ ᐃᓅᑉ ᖁᐃᕐᑐᕈᐊᓚᕿᐅᑎᒋᓂᐊᕐᑕᖓᓂᒃ. ᐃᓄᒃ ᓄᕙᒻᒥᒃ ᐅᕆᐊᓚᖓᔪᖅ (ᐱᔪᒥᒃ ᐊᑖᖏᓐᓂᑦ ᐳᕙᖏᑦᑕ) ᖃᓪᓗᑎᒧᑦ ᐊᐅᓪᓚᑎᑕᐅᓚᖓᔪᒧᑦ ᖃᐅᔨᓴᕐᑕᐅᒋᐊᕐᑐᓗᓂ. ᑕᑯᓗᒍ ᓄᕙᒻᒥᒃ ᖃᐅᔨᓴᕈᑎᒃ (ᖁᑉᐱᒐᖅ 75). |
ᒪᓗᓐᓇᐅᑎᒃ | ᑎᒥᒃ ᐃᑉᐱᒍᓱᑦᑐᖅ ᐊᑦᔨᒋᔭᐅᖕᖏᑐᒥᒃ ᐃᑉᐱᒋᓲᒥᓄᑦ. ᒪᓗᓐᓇᐅᑎᒃ ᑎᒥᐅᑦ ᑕᑯᑦᓴᐅᑎᑦᓯᒍᓐᓇᐅᑎᒋᒍᓐᓇᑕᖓ ᐳᕙᓪᓗᓇᐅᑉ ᖁᐱᕐᕈᐊᕈᓯᖓᓄᑦ ᓇᔪᕐᑕᐅᓕᕐᓂᒥᓂᒃ. ᒪᓗᓐᓇᐅᑎᖏᑦ ᐳᕙᓪᓗᓇᐅᑉ ᐃᓚᓖᑦ ᖁᐃᕐᑐᓂᕐᓴᐅᖃᑦᑕᓕᕐᑐᖅ, ᑳᖃᑦᑕᕈᓐᓀᑐᖅ, ᕿᐅᖃᑦᑕᑐᖅ ᐊᒻᒪᓗ ᐆᓐᓂᖃᑦᑕᓱᓂ (ᐆᓇᕋᒥ), ᐊᐅᒻᒥᒃ ᐅᕆᐊᖃᑦᑕᑐᖅ, ᓴᓗᑦᑐᖅ, ᐊᒻᒪᓗ ᐅᓐᓄᐊᒥ ᐊᐅᒃᑲᓂᖓᖃᑦᑕᑐᖅ. |
ᒪᓗᒍᓱᓐᓇᑐᖃᓕᕐᑐᖅ | ᐃᓄᒃ ᐳᕙᓪᓗᓇᐅᑉ ᒪᓗᓐᓇᐅᑎᖏᑦᑕ ᐃᓚᖏᓐᓂᒃ ᐱᑕᖃᓕᕈᓂ (ᐃᑉᐱᒍᓱᖃᑦᑕᓕᕐᓱᓂ ᑎᒥᒥᓂ ᐊᑦᔨᒋᔭᐅᖕᖏᑐᓂᒃ ᐃᑉᐱᒋᓲᒥᓂᒥᑦ). ᐋᓐᓂᐊᓯᐅᑎᒃ/ᐋᓐᓂᐊᓯᐅᑎᐅᓗᒃ ᑐᑭᑖᓚᖓᔪᖅ ᐃᓅᑉ ᒪᓗᓐᓇᐅᑎᖏᑦ ᑐᑭᖃᕆᐊᖏᑦ ᐅᕕᓂᒃᑯᑦ ᖃᐅᔨᓴᕐᑕᐅᒋᐊᖃᓕᕆᐊᖓ, ᒪᑦᑖᑎᑕᐅᓗᓂ ᐊᑦᔨᓕᐅᕐᑕᐅᓗᓂ, ᐅᕝᕙᓘᓐᓃᑦ ᓄᕙᒃᑯᑦ ᖃᐅᔨᓴᕐᑕᐅᓗᓂ ᕿᓂᕐᑕᐅᑎᓗᒋᑦ ᐳᕙᓪᓗᓇᐅᑉ ᖁᐱᕐᕈᐊᕈᖏᑦ ᑎᒥᒥ. |
ᐳᕙᓪᓗᑑᑉ ᑲᒪᒋᔭᐅᒍᑎᖏᑦ | ᐊᑐᕐᑕᐅᓲᖅ ᐃᓘᓐᓈᒍᑦ ᐅᖃᐅᓯᕆᔭᐅᓕᕐᒪᑕ ᐃᓘᓐᓇᖏᑦ ᐊᑦᔨᒌᖕᖏᑐᑦ ᑲᒪᒋᔭᐅᓂᕆᒍᓐᓇᑕᖏᑦ ᐃᓅᑉ ᐃᓕᖓᔪᑦ ᐳᕙᓪᓗᓂᖓᓄᑦ. ᐃᓘᓐᓈᒍᑦ ᖃᐅᔨᓴᕐᑕᐅᓂᖅ/ ᐋᓐᓂᐊᓯᐅᑎᐊᓗᒻᒧᑦ ᓱᕐᖁᐃᑕᐅᓂᖅ, ᒪᒥᓴᕐᓂᖅ, ᐊᒻᒪᓗ ᐃᑲᔪᕐᓯᒪᓂᖅ ᐃᓄᓐᓂᒃ ᐃᓘᓐᓇᑎᒃ ᐱᒻᒪᕆᐅᑦᓱᑎᒃ ᐃᓚᒋᔭᐅᕗᑦ ᐳᕙᓪᓗᑑᑉ ᑲᒪᒋᔭᐅᒍᑎᖏᓐᓄᑦ. |
ᐳᕙᓪᓗᓇᕐᒧᑦ ᖃᕆᑕᖅ ᐃᒻᒪᑐᖅ | ᐳᕙᐅᑉ ᐊᓯᐊᒍᑦ ᐳᕙᓪᓗᓇᐅᑉ ᖁᐱᕐᕈᐊᕈᖏᑦ ᓂᒪᕐᑐᑦ ᖃᕆᑕᕐᒦᑐᑦ. ᐃᓅᑉ ᐃᓅᓯᖓᓄᑦ ᑌᒣᓕᔪᖅ ᐊᑦᑕᓇᒻᒪᕆᒍᓐᓇᑐᖅ. |
ᒪᒥᓴᐅᑎᒃ | ᐋᓐᓂᐊᓯᑎᓄᑦ ᑲᒪᒋᔭᐅᓂᖅ ᑐᓂᔭᐅᔪᖅ ᐋᕐᕿᑕᐅᒍᑎᒋᓂᐊᕐᑕᖓ ᖃᓂᒪᓐᓇᐅᑉ ᐊᒻᒪᓗ / ᐅᕝᕙᓘᓐᓃᑦ ᐃᓅᑉ ᐃᑯᓪᓚᐅᒥᒍᑎᒋᓂᐊᕐᑕᖓ. ᒪᒥᓴᐅᑎᒃ ᐳᕙᓪᓗᓇᐅᑉ ᖁᐱᕐᕈᐊᕈᖏᓐᓄᑦ ᐃᓚᓕᒃ ᖁᐱᕐᕈᐊᕈᕐᓂᒃ ᑐᖁᓭᒍᑎᓂᒃ ᐳᕙᓪᓗᓇᐅᑉ ᖁᐱᕐᕈᐊᕈᖏᑦ ᐲᔭᕐᓱᒋᑦ ᑎᒥᒥᑦ ᐊᒻᒪᓗ ᓴᐳᑦᔨᓱᒍ ᐃᓄᒃ ᖁᐱᕐᕈᐊᕈᕐᓂᒃ ᑐᖁᓭᒍᑎᓂᒃ ᐄᕐᖃᑐᖅ. PHO-ᑦ, ᐋᓐᓂᐊᓯᐅᑎᐊᓗᐃᑦ, ᐊᒻᒪᓗ ᐋᓐᓂᐊᓯᐅᑏᑦ ᐃᓘᓐᓇᑎᒃ ᓇᔪᕐᑕᓖᑦ ᐃᓄᒻᒥᒃ ᐃᑲᔪᕐᓱᒍ ᐊᐅᒡᒉᓯᒪᒐᓱᐊᕐᑎᓗᒍ ᑎᒥᒥᓂᒃ, ᐃᓱᒪᒥᓂᒃ, ᐃᑉᐱᒋᔭᒥᓂᒃ, ᐊᒻᒪᓗ ᐃᓅᖃᑎᖃᕐᓂᒥᓄᑦ ᐱᒐᓱᐊᒻᒪᕆᑦᑎᑕᐅᓂᕐᒥᓄᑦ ᐳᕙᓪᓗᓇᕐᒧᑦ. |
ᑲᐴᑎᒃ | ᑲᐱᔭᐅᒍᑎᒃ ᐊᑐᐃᓐᓇᕈᕐᑎᑕᐅᓯᑎᓗᒍ ᑎᒦᑦ ᐹᓐᓂᒋᐊᓯᑦᓱᓂ ᑐᕌᕐᑕᐅᔪᓂᒃ ᑲᐴᑎᒧᑦ ᖁᐱᕐᕈᐊᕈᕐᒥᒃ. ᐳᕙᓪᓗᑐᓂᒃ ᑲᐴᑎᒃ ᐊᑎᓕᒃ BCG. BCG ᐱᒻᒪᕆᐅᕗᖅ ᓄᑕᕋᕐᓄᑦ ᓄᑕᕃᑦ ᓂᒪᕐᑐᓂᒃ ᐳᕙᓪᓗᓇᐅᑉ ᖁᐱᕐᕈᐊᕈᖏᓐᓂᒃ ᐱᑕᑦᓯᒍᓐᓇᒪᑕ, ᑎᒥᖓᓂ ᓇᒧᑐᐃᓐᓇᖅ ᑎᑭᐅᑎᑲᐱᒍᓐᓇᓱᑎᒃ, ᐃᓚᐅᑎᓗᒍ ᖃᕆᑕᖓ. BCG ᑲᐴᑎᒃ ᐃᑲᔪᕐᓯᔪᖅ ᓄᑕᕋᕐᒥᒃ ᓂᒪᕐᑐᓂᒃ ᐳᕙᓪᓗᓇᐅᑉ ᖁᐱᕐᕈᐊᕈᖏᓐᓄᑦ ᐃᑎᕐᑕᐅᔪᖅ, ᓯᐊᒻᒪᔨᐊᖃᕐᓂᐊᖏᒻᒪᑦ ᐳᕙᖏᑦᑕ ᐊᓯᖏᓐᓄᑦ ᑎᒥᖓᓅᕐᓗᑎᒃ. |
ᓂᐅᕋᑦᓴᒥᒃ ᓴᓗᒪᑎᑦᓯᐅᑎᒃ | ᓂᒪᕐᑎᑕᐅᔪᖅ 'ᓄᑕᐅᓪᓕᖃᑦᑕᓱᒍ' ᐅᕝᕙᓘᓐᓃᑦ 'ᓴᓗᒻᒪᑎᑦᓱᒍ' ᓂᐅᕋᑦᓴᖅ ᐃᓪᓗᐊᕈᓯᒥ. ᓂᐅᕋᑦᓴᒥᒃ ᓴᓗᒪᑎᑦᓯᐅᑎᒃ ᐱᒻᒪᕆᐅᕗᖅ ᐊᓂᐊᖃᑦᑕᓂᐊᕐᒪᑦ ᐳᕙᓪᓗᓇᕐᑐᑕᓕᒃ ᓂᐅᕋᑦᓴᒦᒍᓐᓀᓗᓂ, ᐃᓄᓐᓄᑦ ᐊᓯᖏᓐᓄᑦ ᓂᐅᕐᖃᑕᐅᓚᖓᔪᖅ. ᐋᓐᓂᐊᓯᐅᑎᒃᑯᑦ ᐃᓪᓗᐊᕈᓯᖃᓲᑦ ᐅᕆᐊᕐᑐᕆᐊᕐᑐᕕᒻᒥᒃ ᐊᖏᔪᒥᒃ ᐃᑯᒪᐅᑎᒨᕐᑐᓂᒃ ᓂᐅᕋᑦᓴᒥᒃ ᓴᓗᒻᒪᓭᒍᑎᒥᒃ ᐱᑕᓕᒻᒥᒃ. ᐊᓯᖃᑐᐃᓐᓇᕆᐊᖃᕐᒥᓱᓕ ᒥᑭᔪᕐᓚᐅᓂᕐᓴᓂᒃ ᐃᑯᒪᐅᑎᒨᕐᑐᓂᒃ ᐊᓯᖏᓐᓂ ᐃᓪᓗᐊᕈᓯᓂ ᐃᑲᔪᕐᓯᐅᑎᓂᒃ ᓂᐅᕋᑦᓴᐅᑉ ᓂᒪᕐᓂᖓᓂᒃ ᑕᑯᔭᐅᒌᕐᐸᑕ ᐋᓐᓂᐊᓯᐅᕐᑕᐅᔪᑦ. |
ᐳᕙᓪᓗᓯᓕᑌᓐᓇᑐᕕᓂᐅᑉ ᖃᐅᔨᓴᕐᑕᐅᒍᓐᓇᓯᕕᖓ | ᐊᑎᖃᕐᒥᔪᖅ Prophylactic Window Period. ᒪᒥᓭᓂᖅ ᒥᑭᔪᕐᓚᓂᒃ ᑲᒃᑲᓛᓂᒃ ᐊᒻᒪᓗ ᓄᑕᕋᕐᓂᒃ ᑲᑎᒪᑦᓯᖃᑦᑕᑐᕕᓂᕐᓂᒃ ᐃᓄᒻᒥᒃ ᐁᑦᑐᐃᒍᓐᓇᑐᒥᒃ ᓂᒪᕐᑐᓂᒃ ᐳᕙᓪᓗᓇᐅᑉ ᖁᐱᕐᕈᐊᕈᖏᓐᓂᒃ. ᑖᓐᓇ ᒪᒥᓭᓂᖅ ᐊᑑᑎᑎᑕᐅᓲᖅ ᓱᒃᑯᐃᒍᓐᓇᓂᕐᓭᑦ ᐳᕙᓪᓗᓇᐅᑉ ᖁᐱᕐᕈᐊᕈᖏᑦ ᓯᐊᒻᒪᐸᓪᓕᐊᑎᑦᑌᓕᓯᑦᓱᒋᑦ ᑎᒥᒥ ᐊᒻᒪᓗ ᓄᕐᖃᐅᔭᐅᒍᓐᓇᓯᑦᓱᓂ ᓱᕐᖁᐃᑕᐅᒻᒪᑦ ᐳᕙᓪᓗᓇᐅᑉ ᖁᐱᕐᕈᐊᕈᓯᖏᓐᓂᒃ ᐱᑕᖃᕈᓐᓀᕆᐊᖓ ᑲᒃᑲᓛᖅ/ᓄᑕᕋᖅ. |
ᐊᑦᔨᓕᐅᕈᑎᒃ ᒪᑦᑖᑎᑦᓯᐅᑎᒃ | ᐊᑦᔨᓕᐅᕈᑎᒃ ᐊᑦᔨᓕᐅᕐᓱᒍ ᑎᒥᐅᑉ ᐃᓗᐊ. ᐊᑐᕐᑕᐅᓲᖅ ᕿᓂᕐᑕᐅᑎᓗᒋᑦ ᖃᐅᔨᒪᐅᑏᑦ ᐳᕙᓪᓗᓇᐅᑉ ᓱᒃᑯᐃᕙᓪᓕᐊᓂᖏᑦ ᑎᒥᒥᒃ (ᐳᕚᓐᓂᒃ ᕿᒥᕐᕈᕈᑎᐅᕙᓪᓗᓲᖅ). ᑕᑯᓗᒍ ᒪᑦᑖᕈᑎᒃ ᐊᑦᔨᓕᐅᕆᒍᑎᒃ (ᖁᑉᐱᒐᖅ 71) |