ᐳᕙᓪᓗᓇᐅᑉ ᖁᐃᓇᒋᔭᐅᓂᖓ

ᓱᓇᐅᑦᓴᕆᕓᓐᓈ ᐳᕙᓪᓗᓇᕐᒥᒃ ᖁᐃᓇᓐᓂᖅ?

ᐳᕙᓪᓗᑐᓂᒃ ᖁᐃᓇᓐᓂᖅ ᓈᒻᒪᓈᕐᕕᖃᕋᑎᒃ ᐃᕐᖃᑐᐃᓚᕿᐅᑕᐅᓲᑦ ᐃᓄᒻᒥᒃ ᐅᕝᕙᓘᓐᓃᑦ ᐃᓚᒌᑦᑐᓂᒃ ᐃᓄᓐᓂᒃ (ᐃᓪᓗᒥᐅᑕᕇᓂᒃ ᐅᕝᕙᓘᓐᓃᑦ ᓄᓇᓕᓐᓂᒃ) ᐳᕙᓪᓗᓂᑐᐃᓐᓇᖏᓐᓄᑦ. ᑖᒃᑯᐊ ᓇᕐᕈᓃᑦ ᑐᖕᖓᕕᖃᕙᓪᓗᓲᑦ ᑐᑭᓯᒪᖕᖏᓂᕐᒥᒃ ᐳᕙᓪᓗᓇᕐᒥᒃ ᐊᒻᒪᓗ/ᐅᕝᕙᓘᓐᓃᑦ ᖃᓂᒻᒪᓯᒥᒃ ᐃᓂᕐᑑᒪᒋᔭᖃᕐᓂᒥᒃ. ᐳᕙᓪᓗᓇᕐᒥᒃ ᖁᐃᓇᓐᓂᖅ ᐃᓚᖃᕙᓪᓗᓲᖅ ᓱᓕᖕᖏᑐᓂᒃ ᐅᓂᒃᑳᓂᕐᓂᒃ ᐃᓄᒃ ᖃᓄᖅ ᐳᕙᓪᓗᓚᕿᓐᓂᒪᖔᑦ ᐅᕝᕙᓘᓐᓃᑦ ᖃᓄᐃᓘᕈᑎᖃᕐᓂᖏᓐᓂᒃ ᐳᕙᓪᓗᓂᕐᒥᓄᑦ.

ᖁᐃᓇᓐᓂᖅ ᐅᕝᕙᓘᓐᓃᑦ ᖁᐃᓇᑦᓱᑎᒃ ᐱᐅᓯᖃᕐᕕᖃᓃᑦ ᐃᒣᒍᑕᐅᑦᔭᖏᒃᑲᓗᐊᕐᓗᑎᒃ ᑲᕙᕐᓇᑑᒐᓱᐊᒧᑦ. ᐃᓛᓂᐅᖕᖏᑐᖅ, ᖁᐃᓇᓐᓂᖅ ᐃᓄᒻᒥᒃ ᐃᑉᐱᒍᓱᓕᕐᑎᓯᒍᓐᓇᓲᖅ ᐃᒻᒥᓂᒃ ᓇᕐᕈᓕᕐᓱᑎᒃ ᐅᕝᕙᓘᓐᓃᑦ ᐳᕙᓪᓗᕆᐊᒥᒃ.

ᐃᓘᓐᓈᒍᑦ, ᐳᕙᓪᓗᑐᓂᒃ ᖁᐃᓇᑦᑐᑦ ᐃᑉᐱᒍᓱᓲᑦ ᐊᒻᒪᓗ ᐸᓯᑦᓯᓱᑎᒃ ᐃᓄᒻᒥᒃ ᓈᒻᒪᑐᖔᓂᒃ ᐃᑉᐱᒍᓱᒐᑎᒃ ᐳᕙᓪᓗᓇᐅᑉ ᖁᐱᕐᕈᐊᕈᖏᓐᓂᒃ ᐊᒻᒪᓗ ᐱᔭᕐᓃᑐᒃᑰᕈᑎᖃᓚᕿᑦᓱᑎᒃ ᐃᓘᓐᓈᒍᑦ ᖃᐅᔨᓴᕐᑕᐅᒋᐊᖃᕐᓱᑎᒃ ᐊᒻᒪᓗ ᒪᒥᓴᕈᑎᖃᕆᐊᖃᕐᓱᑎᒃ ᐳᕙᓪᓗᓇᕐᒥᒃ.

ᐳᕙᓪᓗᓇᕐᒥᒃ ᖁᐃᓇᓐᓂᒧᑦ ᐱᐅᓯᕆᔭᐅᕙᓪᓗᓲᓂᒃ ᐆᑦᑐᕋᐅᑎᖃᕐᓃᑦ:

• ᐃᓄᒻᒥᒃ ᐅᖃᐅᓯᖃᕐᓱᑎᒃ ᐳᕙᓪᓗᓚᕿᔪᕕᓂᐅᓂᕋᕐᓱᒍ ᐃᒥᐊᓗᓲᒍᒐᒥ ᐊᒻᒪᓗ ᐃᒥᐊᓗᖃᑎᒌᑦᑐᓃᓲᒍᒐᒥ.

• ᐃᓄᒃ ᐃᒻᒥᓂᒃ ᑲᒪᑦᓯᐊᖏᓐᓂᕋᕐᓱᒍ ᖃᓄᐃᖕᖏᓯᐊᕋᓱᐊᕆᐊᖃᕐᓂᒥᓂᒃ ᐃᑉᐱᒍᓱᒐᓂ ᐱᔭᕐᓃᓘᕈᑎᖃᕋᒥᒃ ᐋᓐᓂᐊᓯᐅᑎᒃᑯᓕᐊᕆᐊᖅ ᑕᑯᔭᐅᕕᑦᓴᖏᑦ ᓈᒻᒪᓯᑉᐸᑕ.

ᖁᐃᓇᓐᓇᓵᕆᒍᓐᓀᓂᕐᒧᑦ ᐅᖄᒍᓐᓇᑕᑎᑦ ᐊᒻᒪᓗ ᐊᑑᑎᒍᓐᓇᑕᑎᑦ PHO-ᒍᓂᕐᓅᕕᑦ

ᖁᐃᓇᒋᔭᐅᒍᓂ ᐃᓄᒃ ᐃᑉᐱᒍᓱᓕᕈᓐᓇᑐᖅ ᐃᒻᒥᓂᒃ ᓇᕐᕈᓂᕐᒥᒃ, ᐃᓂᕐᑑᒪᓂᕐᒥᒃ, ᐊᒻᒪᓗ ᐃᓄᐃᓴᕐᓂᒥᒃ. ᑖᒃᑯᐊ ᐃᑉᐱᒋᔦᑦ ᖃᓄᐃᓕᖕᙰᒍᓐᓇᑐᑦ ᐃᓱᕐᕆᒍᓐᓀᑎᑦᓯᓗᑎᒃ ᐳᕙᓪᓗᒪᖔᑕ ᓱᓇᒥᑦᑐᓂᒃ ᖃᐅᔨᓴᕐᑕᐅᒋᐊᒥᒃ ᙯᓗᑎᒃ, ᒪᒥᓴᕈᑎᓂᒃ, ᐅᕝᕙᓘᓐᓃᑦ ᑭᖑᓂᖓᒍᑦ ᖃᐅᔨᓴᕐᑕᐅᒋᐊᕐᑐᕆᐊᒥᒃ.

PHO-ᒍᓂᕐᓅᕕᑦ, ᐊᑐᕈᓐᓇᑐᑎᑦ ᖁᐃᓇᒍᓐᓀᑎᑦᓯᐅᑎᓂᒃ ᐅᖃᐅᓯᕆᓗᒋᑦ ᐊᒻᒪᓗ ᖃᓄᐃᓘᕈᑎᒋᓗᒋᑦ ᐃᑲᔪᕐᓯᓂᐊᕋᕕᐅᒃ ᐃᓄᒃ ᐃᑉᐱᒍᓱᓚᕿᑎᓗᒍ ᓲᓱᒋᔭᐅᓂᕐᒥᒃ, ᓄᑭᑖᕐᑕᐅᓂᕐᒥᒃ, ᐊᒻᒪᓗ ᐃᓄᑑᑎᓂᕐᒥᒃ.

ᐳᕙᓪᓗᓇᖅ ᐅᖃᕆᐊᒥᒃ ᐊᕐᓱᕈᓐᓇᑐᖅ - ᐅᖃᓚᐅᕈᒃ. ᐱᐅᓯᑐᐃᓐᓇᖑᕐᑎᒋᐊᓕᕗᑦ ᐅᖃᕆᐊᒥᒃ ᐳᕙᓪᓗᓇᐅᑉ ᖃᓂᒻᒪᓯᐅᑦᓱᓂ ᑐᑭᓯᒐᓱᐊᕆᐊᒥᒃ ᓇᓗᓇᕆᐊᖓ, ᖃᐅᔨᔭᐅᓪᓚᕆᒋᐊᒥᒃ ᐅᕝᕙᓘᓐᓃᑦ ᒪᒥᓴᕈᑕᐅᒋᐊᒥᒃ. ᑌᒣᓘᕐᓂᖅ ᐃᑲᔪᕐᓯᒍᓐᓇᑐᖅ ᐃᓄᒻᒥᒃ ᐃᑉᐱᒍᓱᓚᕿᑎᓗᒍ ᑫᓪᓗᑐᕐᑕᐅᓂᕐᒥᒃ ᐊᐱᕐᓲᑎᑦᓴᒥᓂᒃ ᐊᐱᕐᓱᕈᓐᓇᓯᓗᓂ, ᖃᐅᔨᓴᕐᑕᐅᒋᐊᕐᑐᕈᓐᓇᓯᓗᓂ ᐅᕝᕙᓘᓐᓃᑦ ᒪᒥᓴᐅᑎᒥᓂᒃ ᑲᔪᓯᑎᑦᓯᒍᓐᓇᓯᓗᓂ.

ᖁᐱᕐᕈᐊᕈᖅ ᐸᓯᖔᕐᓗᒍ. ᖁᐃᓇᒋᔭᖃᕐᓂᖅ ᐃᓚᖃᕈᓐᓇᑐᖅ ᐃᑉᐱᒍᓱᓐᓂᒥᒃ ᐃᓄᒻᒥᒃ ᐃᑉᐱᒍᓱᖔᕆᐊᖃᕐᓱᑕ ᖁᐱᕐᕈᐊᕈᓯᕐᒥᒃ. ᑭᓇᑐᐃᓐᓇᖅ ᐅᖃᐅᓯᖃᓯᑉᐸᑦ ᐸᑦᓯᑎᖃᕐᓂᒥᒃ (ᐃᒻᒥᓂᒃ ᐅᕝᕙᓘᓐᓃᑦ ᐊᓯᒥᓂᒃ ᐃᓄᒻᒥᒃ), ᐅᖃᐅᓯᖃᕐᓂᑎᓐᓃᕕᑎᒃ ᓴᖑᑎᑦᓯᒋᐊᕆᐊᖃᕐᑐᑎᑦ ᐳᕙᓪᓗᓇᐅᑉ ᖁᐱᕐᕈᐊᕈᖓ ᐅᖃᐅᓯᕆᖔᓯᓗᒍ.

ᓱᓕᔪᑦ ᐃᓕᒪᕕᒋᓗᒋᑦ. ᖁᐃᓇᓐᓂᖅ ᐃᓚᓕᒃ ᐃᓱᒪᖕᖑᐊᓂᕐᒥᒃ ᓱᓕᖕᖏᑐᓂᒃ ᑌᒣᒍᑎᖃᕐᑐᕕᓂᐅᔪᕆᓂᕐᒥᒃ. ᑖᒃᑯᐊ ᓴᖑᑎᖔᕈᓐᓇᑕᑎᑦ ᓱᓕᓂᖏᑦ ᐳᕙᓪᓗᓚᖀᓲᑦ ᓇᓗᓀᖔᖃᑦᑕᓗᒋᑦ.

ᓱᓕᒍᑎᖃᕐᓗᑎᑦ. ᐳᕙᓪᓗᓗᓂ ᒪᒥᓭᒍᑏᑦ ᐊᑐᕆᐊᒥᒃ ᐊᓕᐊᓇᒐᓛᖕᖏᑐᑦ. ᑭᓯᐊᓂ ᐊᓕᐊᓇᖕᖏᑑᒐᓗᐊᑦ, ᐄᓯᖃᑦᑕᓗᓂ ᑭᓯᐊᓂᐅᕗᖅ ᑎᒥᒥᑦ ᐲᔭᓚᕿᓂᐊᕐᒪᑕ ᐳᕙᓪᓗᓀᑦ.

ᐅᖃᐅᓯᖅ ᓯᕗᓪᓕᐅᔨᒍᑎᒃ ᐃᓄᒻᒥᒃ ᐊᑐᖃᑦᑕᓗᒍ. ᐃᓄᒻᒥᒃ ᓯᕗᓪᓕᐅᔨᒍᑎᒃ ᐅᖃᐅᓯᖅ ᑐᑭᓕᒃ ᐃᓕᒃᑰᑎᑦᓯᓂᖅ ᐃᓄᒻᒥᒃ ᐳᕙᓪᓗᓇᕐᒧᑦ. ᑕᒪᓐᓇ ᐅᖃᐅᓯᖅ ᐸᑦᓯᑎᖃᕈᑕᐅᖕᖏᒪᑦ ᐅᕝᕙᓘᓐᓃᑦ ᓇᓗᓀᕐᓯᐅᑕᐅᖕᖏᒪᑦ ᐃᓄᒻᒥᒃ ᐳᕙᓪᓗᓂᖓᓄᑦ ᑭᓯᐊᓂ. ᐆᑦᑑᑎᒃ: ᐊᑐᖔᕈᒪᒐᔭᕐᑐᒍᑦ "ᐃᓄᒃ ᐳᕙᓪᓗᑐᖅ, ᐃᒣᓕᒍᓐᓀᓗᑕ "ᐳᕙᓪᓗᓇᕐᒧᑦ ᐃᒻᒪᓯᒪᑎᑕᐅᔪᖅ ᐃᓄᒃ."

ᐳᕙᓪᓗᑐᖅ ᐱᖁᔭᕐᓂᒃ ᓯᖁᒥᑦᓯᐅᑕᐅᖕᖏᑐᖅ. ᐅᖃᐅᓯᖅ ᑐᓴᕐᓱᒍ ᑐᑭᓕᐅᔮᕐᐸᑦ ᐃᓕᒪᒋᐊᖓ ᐱᖁᔭᕐᓂᒃ ᓯᖁᒥᑦᓯᔪᓕᕆᓂᕐᒧᑦ, ᐊᑐᕐᑌᓕᖃᑦᑕᓗᒍ ᐅᖃᐅᓯᖃᓕᕈᕕᑦ ᐳᕙᓪᓗᓇᕐᓄᐊᖓᔪᒥᒃ. ᐆᑦᑑᑎᒃ: ᐊᑐᖔᕈᒪᒐᔭᕐᑐᒍᑦ "ᐃᓄᒃ ᐳᕙᓪᓗᑐᐃᓐᓇᕆᐊᓕᒃ", ᐃᒣᓕᒍᓐᓀᓗᑕ "ᐳᕙᓪᓗᕆᐊᖓ ᐃᓕᒪᓇᕐᑐᖅ" ᐅᕝᕙᓘᓐᓃᑦ "ᐳᕙᓪᓗᓇᕐᑕᓕᒃ".

ᓇᓂᑐᐃᓐᓇᖅ ᑕᑯᒍᕕᑦ ᓇᓗᓀᒃᑯᑖᐱᒻᒥᒃ ᑐᑭᓯᐅᑎᑦᓴᓂ ᑕᑯᒐᓱᐊᒐᕐᓂ, ᑐᑭᖓ ᖃᐅᔨᓗᒋᑦ ᐱᕕᑦᓭᑦ ᖁᐃᓇᒍᓐᓀᑎᑦᓯᒍᓐᓇᑐᑦ!

ᐃᓄᐃᑦ ᖁᐃᓇᒋᔭᐅᔪᑦ ᐊᓯᒥᓄᑦ ᐃᓄᓐᓄᑦ

ᐱᒻᒪᕆᐅᕗᖅ ᑕᕝᕙᓂ PHO ᓱᓇᑕᓕᒫᖏᓐᓂᒃ ᑲᒪᖕᖏᑲᓗᐊᕈᓂ ᖃᓄᐃᖕᖏᓂᖓ - ᖃᓄᐃᖕᖏᑐᖅ ᐊᑑᑎᖃᑦᑕᑕᓕᒫᖏᓐᓂᒃ ᐃᓅᑉ ᐋᕐᖀᖃᔭᖕᖏᑲᓗᐊᕈᕕᑦ. ᐃᒣᒍᓐᓇᕋᓗᐊᕐᓱᑎᑦ:

• ᓇᑯᕐᒦᓗᒍ ᐃᓄᒃ ᓱᓕᑦᓯᐊᑐᓂᒃ ᐅᖃᕐᒪᑦ ᐊᒻᒪᓗ ᐃᓂᑦᑑᒪᒍᓐᓀᑎᒋᐊᕐᓗᒍ. ᐆᑦᑑᑎᒃ: ᓇᑯᕐᒦᒃ ᐅᖃᐅᑎᒐᕕᖕᖓ, ᐊᓕᐊᓇᖕᖏᒪᑦ ᑌᒣᓘᕐᑕᐅᒋᐊᖅ".

• ᐃᕐᙯᑎᓗᒋᑦ ᑲᒪᒍᓯᓂᒃ ᖁᓛᓂ ᐅᖃᕐᑕᓂᒃ ᐆᑦᑑᑎᒋᓗᒋᑦ "ᓱᓕᔪᑦ ᐃᓕᒪᕕᒋᓗᒋᑦ" ᐊᒻᒪᓗ "ᖁᐱᕐᕈᐊᕈᖅ ᐸᓯᖔᕐᓗᒍ".

ᐃᓄᐃᑦ ᐊᓕᐊᓐᓂᓴᐅᓲᑦ ᐱᕕᑦᓴᖃᕐᑎᑕᐅᒋᐊᒥᒃ ᓈᓚᑦᑕᐅᒍᓐᓇᓱᑎᒃ ᐊᒻᒪᓗ ᑐᓴᕐᑕᐅᒍᓐᓇᓱᑎᒃ.

ᐃᓄᐃᑦ ᐃᒻᒥᓂᒃ ᖁᐃᓇᑦᑐᑦ ᐅᕝᕙᓘᓐᓃᑦ ᐊᓯᒥᓂᒃ ᐃᓄᓐᓂᒃ

ᑕᒪᓐᓇ ᐃᓱᒪᒋᒍᓐᓇᑌᑦ ᐃᒫᒃ 'ᐃᒻᒪᓇᐅᑉ ᐱᒋᐊᕐᕕᕕᓂᖓᓄᑦ ᐅᓂᒃᑳᖅ' ᐃᓄᒃ ᓇᓚᐅᑦᓵᓂᖃᑐᐃᓐᓇᕆᐊᖃᓕᕐᐸᑦ ᐅᑯᓂᖓ ᑭᓇ, ᓱᓇ, ᖃᖓ, ᓇᓂ, ᓱᒧᑦ, ᐊᒻᒪᓗ ᖃᓄᖅ ᐳᕙᓪᓗᓯᓐᓂᒪᖔᒻᒥᒃ. ᑕᒪᓐᓇ ᐱᐅᓯᑐᐃᓐᓇᖅ ᖃᓄᐃᓕᒍᑕᐅᓚᕿᓲᖅ, ᐊᒻᒪᓗ ᑐᓵᖃᑦᑕᓚᖓᔪᑦᓴᐅᓱᑎᑦ ᐊᒥᓱᓂᒃ ᑌᒣᑦᑐᓂᒃ ᐅᓂᒃᑳᓂᒃ ᐱᓇᓱᕝᕕᓃᕕᑦ. ᐃᕝᕕᓕ:

• ᐃᓄᒃ ᓱᓕᒻᒪᖔᑦ ᐅᕝᕙᓘᓐᓃᑦ ᓱᓕᖕᖏᒪᖔᑦ ᐅᖃᖕᖏᑲᓗᐊᕈᕕᑦ ᖃᓄᐃᖕᖏᑐᖅ.

• ᓈᓚᓪᓗᒍ ᐊᒻᒪᓗ ᓇᑯᕐᒦᓗᒍ ᐃᓄᒃ ᓱᓕᑦᓯᐊᓱᓂ ᐅᖃᕐᒪᑦ.

• ᐅᖃᐅᓯᕆᖔᓯᓗᒍ ᓴᖑᕕᒋᓗᒍ ᖁᐱᕐᕈᐊᕈᖅ. ᐆᑦᑑᑎᒃ: 'ᑭᓇᓘᓐᓃᑦ ᐸᑦᓯᑎᑦᓴᐅᒐᓛᖕᖏᑐᖅ, ᐳᕙᓪᓗᓇᐅᑉ ᖁᐱᕐᕈᐊᕈᖓ ᑭᓇᑐᐃᓐᓇᒨᕈᓐᓇᑐᖅ".

ᑖᒃᑯᐊ 'ᐃᒻᒪᓇᐅᑉ ᐱᒋᐊᕐᕕᕕᓂᖏᓐᓂᒃ ᐅᓂᒃᑳᑦ' ᐃᓚᐅᒍᓐᓇᑐᑦ ᐃᓅᑉ ᑲᒪᒍᓐᓇᓯᐊᕐᓂᖓᓄᑦ (ᑐᑭᓯᒐᓱᐊᕐᑑᑉ ᓱᓐᓂᒪᖔᕐᒥᒃ).