ᐳᕙᓪᓗᓇᐅᑉ ᐁᑦᑐᑑᑎᐅᒍᓐᓇᑑᑉ ᐃᖏᕐᕋᕈᓯᖓ
ᐊᑐᕐᓗᒍ ᐊᑦᔨᖑᐊᖅ ᐅᖄᖃᑎᖃᕐᓂᖅ ᐃᓄᒻᒥᒃ ᐳᕙᓪᓗᓱᓂ ᐁᑦᑐᑑᑎᐅᒍᓐᓇᑐᒥᒃ ᐋᓐᓂᐊᓯᐅᑎᑑᒪᓯᕋᑖᕐᑐᒥᒃ:
ᐁᑦᑐᑑᑎᐅᒍᓐᓇᑐᒥᒃ ᐳᕙᓪᓗᓂᕐᓂ ᐋᓐᓂᐊᓯᐅᑎᑐᒪᓕᕈᕕᓪᓗ ᖃᓄᐃᓕᖓᒍᑎᒋᓂᐊᕐᑕᑎᓐᓂᒃ ᑕᕐᕿᓂ ᙯᔪᓂ ᑕᑯᑎᓯᕙᒋᑦ. ᑕᒪᓐᓇ ᑐᑭᓯᑎᑦᓯᒋᐊᕈᑎᑐᐃᓐᓇᑦ, ᐅᖄᒍᑎᖃᕐᓂᐊᒥᒐᓐᓄᑦ ᐃᓗᓕᕐᑕᖏᓐᓂᒃ ᐃᑲᔪᕐᓯᒪᔭᐅᒍᑎᐅᒍᓐᓇᑐᓂᓪᓗ
ᐅᓇ ᐃᕝᕕᑦ ᐱᓇᓱᐊᕈᓯᕐᓂ ᐊᓂᒍᕐᖃᒥᕐᓂ. ᒪᓗᓐᓇᐅᑎᖃᒐᓚᑦᑐᕆᓕᕋᕕᑦ (ᖏᒃᑲᓗᐊᕐᓱᑎᓪᓗᓐᓃᑦ) ᐅᖄᒋᐊᕐᑐᓯᓚᐅᔪᑎᑦ ᐋᓐᓂᐊᓯᐅᕐᑎᒧᑦ, ᖃᐅᔨᓴᕐᑕᐅᖁᔨᓯᓚᐅᔪᖅ ᐳᕙᓪᓗᒪᖔᑉᐱᑦ. ᐅᖃᐅᑎᔭᐅᓚᐅᔪᑎᑦ ᐳᕙᓪᓗᕆᐊᕐᓂᒃ ᐋᓐᓂᐊᓯᐅᑎᑐᕆᐊᖃᓕᕐᓂᓂᓪᓗ.
ᐊᒥᓱᒐᓚᓐᓂᒃ ᐅᓪᓗᓂᒃ ᐋᓐᓂᐊᓯᐅᑎᑐᓕᕐᑐᑎᑦ. ᐃᓄᓐᓂᑌᓕᓂᕐᒦᓕᕐᓱᑎᓪᓗ ᑭᓯᐊᓂ ᑕᒪᓐᓇ ᐊᓂᒍᑦᓴᐅᑎᒋᓚᖓᒻᒪᑦ, ᐃᓱᒫᓗᒋᐊᑐᓚᖓᖕᖏᑐᑎᑦ ᐃᕐᐸᑎᕆᒐᔭᕐᓂᒥᒃ ᐳᕙᓪᓗᓇᕐᒥᒃ ᐊᓯᑎᓐᓄᑦ.
ᐄᖃᕆᐊᖃᕐᓂᐱᑦ ᓯᕗᓪᓕᐹᖓᓃᓕᕐᑐᑎᑦ ᑭᓯᐊᓂ ᖃᐅᑕᒪᑦᓯᐊᖅ ᒪᒥᓴᐅᑎᑎᓐᓂᒃ ᐱᖃᑦᑕᕈᕕᑦ, ᑐᖓᓕᐊᓄᑦᓴᐅᑎᒋᐊᐱᓚᖓᔪᑎᑦ ᐄᖃᕆᐊᖃᕐᓂᐱᑦ. ᐊᒥᓱᑦ ᐃᓄᐃᑦ ᐱᔭᕆᐊᑭᓐᓂᓴᐅᓂᕃᓲᑦ ᑐᖓᓕᐊᓃᓕᕋᒥᒃ ᓯᕗᓪᓕᒥ ᐱᔭᕋᓕᓂᕐᓴᕕᓂᐅᒐᒥ, ᑕᒐ ᓯᕗᒧᐊᑦᓯᐊᕋᓱᐊᑐᐃᓐᓇᓚᖓᔪᒍᑦ.
ᐃᓱᕐᕆᓕᑦᓴᐅᑎᒋᐊᐱᓚᖓᔪᑎᑦ ᐃᒻᒪᖃᖓᓪᓛᑦ ᐃᓱᕐᕆᓂᕐᓴᐅᓕᕇᕐᑐᑎᑦ. ᐃᓱᕐᕆᓕᑦᓯᐊᕈᕕᑦ ᐃᓄᓐᓃᑌᓕᒋᐊᖃᕈᓐᓀᕈᕕᓪᓗ, ᐊᓕᐊᒋᔭᑎᓐᓄᑦ ᐅᑎᕈᓐᓇᓯᐊᓕᕋᔭᕐᑐᑎᑦ ᓱᓇᓱᐊᕈᓐᓇᓯᑦᓯᐊᓗᑎᑦ!
ᐄᖃᕆᐊᖃᕐᓂᐱᑦ ᑐᖓᓕᐊᓂᒃ ᐊᓂᒍᐃᒍᕕᑦ, ᐱᔭᕇᕐᐳᑎᑦ ᐋᓐᓂᐊᓯᐅᑎᑐᕆᐊᑐᒍᓐᓀᑐᑎᑦ! ᑕᒪᓐᓇ ᐱᔭᕆᔭᖃᑦᓯᐊᓂᒻᒪᕆᐊᓗᒃ!
ᑲᒪᒋᔭᐅᒋᐊᓪᓛᖃᑦᑕᓛᕐᑐᑎᑦ ᐊᒃᕌᒍᓂ ᐊᒥᓲᖕᖏᑐᓂ ᙯᔪᓂ ᐳᕙᑎᑦ ᖃᓄᐃᖕᖏᓯᐊᕋᓗᐊᕐᒪᖔᑕ ᖃᐅᔨᒐᓱᐊᕐᑕᐅᓗᑎᑦ, ᑭᓯᐊᓂ ᑕᒪᓐᓇ ᐅᖄᒍᑎᒋᒋᐊᓪᓛᕈᓐᓇᓛᕐᑕᕗᒃ ᑌᑲᓃᓕᕈᑦᑕ.
ᐊᐱᕐᓲᑎᑦᓴᖃᕈᒪᔪᑦᓴᐅᒐᕕᑦ, ᑕᒪᒃᑯᐊ ᐅᖄᐅᓯᕆᕋᑖᕐᑕᑲ ᑐᑭᓯᓇᑦᓯᐊᐸᑦ?
On this page