ᖃᓂᑕᓕᕕᓂᕐᒥᑦ ᐱᑦᓱᓂ ᓯᓂᑦᑐᕈᕐᑐᖅ ᐁᑦᑐᑑᑎᖕᖑᕈᓐᓇᓱᓂᓗ
ᐊᑐᕐᓗᒍ ᐊᑦᔨᖑᐊᖅ ᐅᖄᖃᑎᖃᕐᓂᖅ ᐃᓄᒻᒥᒃ ᖃᓄᖅ ᐳᕙᓪᓗᓇᖅ ᑎᒥᒨᓲᖑᒻᒪᖔᑦ ᖃᓂᒻᒪᑫᒍᓐᓇᓱᓂᓗ
ᑕᒡᒐᓂ ᐊᑦᔨᖑᐊᒥ ᑕᑯᓐᓇᓯᕗᒍᑦ ᖃᓄᖅ ᐳᕙᓪᓗᓇᖅ ᑎᒥᓐᓅᓲᖑᒻᒪᖔᑦ ᖃᓄᕐᓗ ᓯᓂᑦᑐᕈᓲᖑᒻᒪᖔᑦ ᐁᑦᑐᑑᑎᐅᒍᓐᓇᓯᓲᖑᒻᒪᖓᓪᓘᓃᑦ
ᐳᕙᓪᓗᓚᖀᓲᖅ ᖁᐱᕐᕈᑯᓗ ᒥᑭᔪᐸᐅᔮᓗᑦᓱᓂ ᑕᑯᑦᓴᐅᖏᑦᑐᖅ ᐃᔨᑦᑎᓄᑦ. ᐃᓄᒃ ᐁᑦᑐᑑᑎᐅᒍᓐᓇᑐᒥᒃ ᐳᕙᓪᓗᑐᖅ ᖁᐃᕐᑐᑐᐊᕐᒪᑦ, ᑖᓐᓇ ᐳᕙᓪᓗᓇᐅᑉ ᖁᐱᕐᕈᑯᓗᖓ ᐊᓂᕐᑎᕆᔭᐅᔪᒧᑦ ᐃᕐᐸᓲᖅ. ᐊᓯᐊᑕ ᐃᓅᑉ ᓂᐅᕐᓂᐊᓕᕐᒪᐅᒃ ᖁᐱᕐᕈᖅ ᐳᕙᖏᓐᓅᓯᑦᓱᓂ.
ᐳᕙᓪᓗᓇᖅ ᐃᕐᐸᓲᖅ ᐃᓄᒻᒥᑦ ᐃᓄᒻᒧᑦ ᑭᓯᐊᓂ ᐱᒻᒪᕆᐅᕗᖅ ᖃᐅᔨᒪᑦᓯᐊᕆᐊᖃᕋᑦᑕ ᑭᓇᓘᓐᓃᑦ ᐸᓯᒐᑦᓴᐅᖏᒻᒪᑦ. ᐱᐅᓂᕐᐸᐅᕗᖅ ᖃᐅᔨᓴᕐᑕᐅᒋᐊᕐᑐᓂᖅ ᐋᓐᓂᐊᓯᐅᑎᑐᕐᓂᓗ ᐳᕙᓪᓗᓂᕋᕐᑕᐅᒍᕕᑦ.
ᐳᕙᑎᓐᓃᓕᕋᒥ, ᐳᕙᓪᓗᓇᖅ ᓯᓂᑦᑐᕈᓲᖅ ᐁᑦᑐᑑᑎᐅᒍᓐᓇᑐᕈᕐᓱᓂᓗᓐᓃᑦ. ᐊᒥᓱᐃᑦ ᐱᑦᔪᑎᐅᑎᓪᓗᒋᑦ ᐳᕙᓪᓗᓇᖅ ᑎᒥᓐᓃᓕᕈᓂ ᓯᓂᑦᑐᕈᒍᓐᓇᑐᖅ ᐁᑦᑐᑑᑎᐅᒍᓐᓇᑐᕈᕐᓗᓂᓗᓐᓃᑦ.
ᑕᑯᒋᐊᕐᖄᑕ ᐁᑦᑐᑑᑎᐅᒍᓐᓇᓂᖓᓂᒃ. ᐳᕙᓪᓗᓇᖅ ᐁᑦᑐᑑᑎᐅᒍᓐᓇᑐᕈᑐᐊᕐᒪᑦ, ᑎᒦᑦ ᐊᐅᓚᑦᓯᖃᔦᓲᖅ ᖁᐱᕐᕈᑯᓗᖏᓐᓂᒃ ᐳᕙᓪᓗᓇᐅᑉ ᐊᓱᐃᓛ ᖃᓂᒻᒪᑎᑦᓯᕙᓪᓕᐊᓂᐊᓕᕐᒪᑕ ᐃᓕᓐᓂᒃ. ᖁᐱᕐᕈᑯᓗᒃ ᓱᒃᑯᑎᕆᓯᓲᖅ ᐳᕙᑎᓐᓂᒃ ᐊᓯᖏᓐᓂᓗ ᑎᒥᓐᓃᑐᓂᒃ. ᖁᐃᕐᑐᖃᑦᑕᓯᒍᕕᑦ ᐳᕙᓪᓗᓇᐅᑉ ᖁᐱᕐᕈᑯᓗᖏᑦ ᐃᕐᐸᐸᓪᓕᐊᓯᓲᑦ ᐊᓯᑎᓐᓄᑦ.
ᑕᑯᒋᐊᓕᕐᒥᒍᑦᑕ ᐳᕙᓪᓗᓇᕐᒥᒃ ᓯᓂᑦᑑᓂᕋᕐᑕᒥᒃ, ᐃᓅᑉ ᑎᒥᖓ ‘ᐊᑭᓐᓇᓕᐅᓯᓲᖅ’ ᐊᕙᓗᓕᐅᕐᓱᒍ ᖁᐱᕐᕈᑯᓗᒃ ᓯᓂᑦᑎᓯᓯᑦᓱᓂ ᖁᐱᕐᕈᑯᓗᒻᒥᒃ ᓱᒃᑯᐃᓂᐊᖕᖏᒪᑦ ᑎᒥᓐᓂᒃ. ᑖᓐᓇ ᐳᕙᓪᓗᓇᐅᑉ ᖁᐱᕐᕈᑯᓗᖓ ᓯᓂᒍᓐᓇᑐᖅ ᑎᒥᓐᓂ ᐃᓅᓯᓕᒫᕐᓂ ᐋᓐᓂᐊᓯᐅᑎᑐᕈᑎᕕᓂᕆᖕᖏᑐᐊᕈᕕᐅᒃ. ᐳᕙᓪᓗᓇᐅᑉ ᓯᓂᑦᑑᓂᕋᕐᑕᐅᑉ ᖁᐱᕐᕈᑯᓗᖓ ‘ᑐᐸᒍᓐᓇᑐᖅ’ ᐅᕝᕙᓗᓐᓃᑦ ᐊᑭᓐᓇᓕᐊᖑᒪᔪᒥᒃ ᐊᕙᓗᒥᓂᒃ ᓯᖁᑦᑏᒍᓐᓇᓱᓂ ᖃᖓᑐᐃᓐᓇᓕᒫᖅ ᐊᓱᐃᓛ ᐁᑦᑐᑑᑎᐅᒍᓐᓇᑐᕈᕐᓂᐊᓕᕋᒥ.
On this page