ᑕᒐᓂ ᐊᓪᓚᓯᒪᔪᑦ ᓄᐃᑕᑎᑦᓯᒍᑎᐅᔪᑦ ᐃᓱᒫᓗᑎᐅᒍᓐᓇᑐᓂᒃ ᐅᖃᐅᓯᖃᓕᕈᕕᑦ ᐊᒻᒪᓗᑭᑖᒦᑦᑐᓂᒃ ᑭᐅᒍᑎᐅᒍᓐᓇᕋᔭᕐᑐᓂᓪᓗ :

ᖃᓄᐃᖕᖏᓯᐊᕐᓂᖅ

‘ᑲᑉᐱᐊᓱᒍᑎᖃᕐᐳᖓ ᖃᓄᖅ ᐳᕙᓪᓗᓇᖅ ᓱᕐᕃᓂᖃᓚᖓᒻᒪᖔᑦ ᖃᓄᐃᖕᖏᓯᐊᕆᐊᖃᕐᓂᕋᓂᒃ.’

• ᐃᓄᐃᑦ ᐳᕙᓪᓗᓂᕋᕐᑕᐅᒐᒥᒃ ᐊᑦᔨᒌᖕᖏᑐᓂᒃ ᐃᑉᐱᓂᐊᒍᑎᖃᖃᑦᑕᓯᒪᔪᑦ. ᑲᑉᐱᐊᓱᑦᓱᑎᒃ, ᓯᕘᕋᕐᓱᑎᒃ, ᐊᓕᐊᑦᓱᑎᒃ ᐅᕝᕙᓗᓃᑦ ᑐᑦᔫᒥᑦᓱᑎᒃ ᖃᐅᔨᑦᓯᐊᑐᐊᕋᒥᒃ ᐊᑑᑎᒋᐊᓕᒥᓂᒃ, ᐊᓕᐊᓱᖕᖏᓕᕐᓱᑎᒃ ᐆᒥᓱᓕᕐᓱᑎᒃ. ᖃᓄᐃᖕᖏᑐᖅ ᑕᒪᒃᑯᐊ ᐊᒥᓱᐃᑦ ᐊᑕᐅᑦᓯᑰᕐᑎᓗᒋᑦ ᐃᑉᐱᓂᐊᕆᒋᐊᖏᑦ.

• ᑭᐅᒋᐊᑐᖕᖏᑐᑎᑦ ᕈᒪᖕᖏᑯᕕᑦ, ᐅᓪᓗᓂᒃ ᐊᒥᓲᖕᖏᑐᓂᒃ ᖃᐅᔨᒪᓕᕋᕕᑦ ᐳᕙᓪᓗᕆᐊᖅ, ᖃᓄᕐᓕ ᐃᑉᐱᓂᐊᕈᑎᒋᒻᒪᖔᑉᐱᐅᒃ ᑕᒪᓐᓇ?

• ᖃᓄᐃᒐᓛᖕᖏᑐᖅ ᑕᒪᒃᑯᓂᖓ ᐃᑉᐱᓂᐊᕆᐊᖅ. ᓇᑯᕐᒦᒃ ᐅᖄᑦᓯᐊᕈᓐᓇᕋᕕᑦ.

ᐋᓐᓂᐊᓯᐅᑏᑦ (ᐄᕐᖃᒉᑦ)

‘ᐳᐃᒍᓲᐹᐅᔮᓘᕗᖓ ᐋᓐᓂᐊᓯᐅᑎᒃᑲᓂᒃ ᐃᓯᒋᐊᖃᕐᓱᖓ’

• ᑐᑭᓯᑦᓯᐊᖃᒋᑦ. ᑌᒣᑦᑑᒥᒐᒪ. ᖃᐅᔨᒪᑦᓯᐊᑐᐃᓐᓇᕆᑦ ᑖᒃᑯᐊ ᐄᕐᖃᑕᑎᑦ ᖃᓄᐃᖕᖏᓯᐊᕐᓂᓅᓕᖓᒻᒪᑕ ᐳᕙᓪᓗᓇᐅᓪᓗ ᖁᐱᕐᕈᑯᓗᖏᓐᓂᒃ ᑎᒥᓐᓃᑐᓂᒃ ᓄᖑᓭᒍᑎᐅᑦᓱᑎᒃ.

• ᐃᑲᔪᕐᓯᓲᖑᒻᒥᔪᖅ ᐃᓄᓐᓂᒃ ᐳᐃᒍᕇᒃᑯᑎᓕᐅᖃᑦᑕᓱᑎᒃ ᐅᖄᓚᐅᑎᐊᐱᒻᒥᓅᕐᓱᒍ, ᐃᙯᒍᑎᒋᖃᑦᑕᓂᐊᕋᕕᐅᒃ ᒪᒥᓴᐅᑎᑎᓐᓂᒃ ᐄᓯᒋᐊᖃᕆᐊᖅ ᐅᕝᕙᓗᓐᓃᑦ ᐄᕐᖃᒐᑎᑦ ᐅᓪᓛᕈᒥᑕᓚᖓᔭᑉᐱᑦ ᓴᓂᐊᓃᑦᑎᖃᑦᑕᓗᒋᑦ.

ᐃᓄᓐᓃᑌᓕᓂᖅ

‘ᐱᐊᕋᒃᑲ ᐊᓂᕐᕋᓯᒪᔪᑦ ᓇᒧᖕᖓᕕᑦᓴᖃᖃᑦᑕᖏᑦᑐᒍᑦ.’

• ᐊᓂᕐᕋᓯᒪᑲᓪᓚᒋᐊᖃᕐᓂᖅ ᐃᓱᐃᑦᑐᕋᑕᖅ. ᖃᓄᐃᖕᖏᓯᐊᕆᐊᖃᕐᓂᖓᑦᑕᐅᒃ ᐃᓱᒪᒋᓯᐊᕋᕕᐅᒃ ᐱᐅᔪᖅ.

• ᐊᓂᕐᕋᓯᒪᑲᓪᓚᒋᐊᖃᕐᓂᖅ ᐃᓪᓗᒥᐅᖃᑎᖃᕐᓱᓂ, ᓴᓂᓪᓕᕆᖃᑦᑕᕆᐊᖏᑦ ᐃᑉᐱᒍᓱᑦᓯᐊᕆᐊᖃᕐᓇᑐᖅ ᖃᓄᐃᖕᖏᑲᓗᐊᕐᒪᖔᑕ. ᖃᐅᔨᒐᓱᐊᖃᑦᑕᓚᖓᔭᕗᑦ ᐳᕙᓪᓗᓕᕐᒪᖔᑕ ᖃᓄᐃᖕᖏᓯᐊᖁᓪᓗᒋᑦ.

• ᐱᐅᓂᕐᓴᐅᒍᓐᓇᒥᔪᖅ ᐊᓯᐊᓂ ᓯᓂᕝᕕᖃᖃᑦᑕᕈᕕᑦ ᑌᑲᓂᓗ ᖃᕆᐊᒦᓐᓂᓴᐅᖃᑦᑕᓗᑎᑦ. ᑌᒣᒍᓐᓇᖀᑦ?

• ᐃᒻᒪᖄ ᐱᐅᓂᕐᐸᐅᒐᔭᕐᒥᔪᖅ ᖃᕆᐊᕐᓃᖃᑦᑕᕈᕕᑦ ᐱᐊᕋᑎᑦ ᐊᓂᕐᕋᓯᒪᓕᕐᐸᑕ, ᐃᓕᓐᓂᐊᕕᓕᐊᕐᐸᑕ ᐃᓪᓘᑉ ᐃᓗᐊᓂ ᓂᒪᔭᕈᓐᓇᓯᐊᕐᑐᑎᑦ ᐃᒐᓛ ᐅᒃᑯᐃᖔᕐᑎᓯᐊᖃᑦᑕᓗᒋᑦ ᐊᓄᕆᑕᑦᓯᐊᓂᐊᕐᒪᑦ ᐃᓪᓘᑉ ᐃᓗᐊ.

• ᐊᓕᐊᓇᖕᖏᑐᕋᑕᐅᒐᓗᐊᖅ ᑕᒪᓐᓇ, ᑭᓯᐊᓂ ᐊᑯᓂᐊᓘᓚᖓᖕᖏᑐᖅ ᒪᕐᕈᐃᓇᕐᑐᓚᖓᒐᒥ ᐱᓇᓱᐊᕈᓰᓐᓂᒃ.

ᓴᐳᑦᔨᓯᒪᓂᖅ ᐊᓯᒋᔭᓂᒃ

‘ᑲᑉᐱᐊᓱᖃᑦᑕᖁᖓ ᐃᓄᓐᓃᒋᐊᖅ ᐳᕙᓪᓗᓕᕐᑎᓯᓂᐊᖕᖒᒧᑦ ᐸᓯᔭᐅᒍᒪᖕᖏᓇᒪ ᖃᓂᒻᒪᐸᑕ.’

• ᑐᑭᓯᕙᒋᑦ. ᐊᓯᑎᑦ ᐃᓄᐃᑦ ᐳᕙᓪᓗᓱᑎᒃ ᐃᕝᕕᑎᑐᑦ ᑌᒫᒃ ᐃᓱᒪᖃᖃᑦᑕᓯᒪᒻᒥᒪᑕ.

• ᓯᓂᑦᑑᓂᕋᕐᑕᒥᒃ ᐳᕙᓪᓗᕋᕕᑦ (ᐅᕝᕙᓗᓐᓃᑦ ᐁᑦᑐᑑᑎᐅᒍᓐᓇᑐᒥᒃ ᐳᕙᓪᓗᓱᑎᑦ ᐃᓄᓐᓃᑌᓕᒋᐊᑐᕈᓐᓀᓱᑎᓪᓗ) ᐁᑦᑐᑐᐃᒋᐊᓪᓚᕕᖃᕈᓐᓀᑐᑎᑦ. ᐃᕐᐸᑎᕆᒋᐊᓪᓚᕕᖃᑦᔭᒍᓐᓀᖁᑎᑦ ᐳᕙᓪᓗᓇᕐᒥᒃ.

• ᐃᓄᓐᓄᑦ ᐳᕙᓪᓗᓂᕋᕐᑕᐅᓗᑎᑦ ᐅᖃᐅᑎᔭᐅᒍᕕᑦ, ᐅᖃᐅᑎᑦᓯᐊᑐᐃᓐᓇᕈᓐᓇᑕᑎᑦ ᐳᕙᓪᓗᓛᕿᑎᓚᖓᖕᖏᒋᐊᖏᑦ.

ᐋᓐᓂᐊᕕᒻᒨᕆᐊᖃᕐᓂᖅ

‘ᖃᐅᑕᒫᑦ ᐋᓐᓂᐊᕕᓕᐊᕈᑎᑦᓴᙯᓐᓇᓲᖑᖕᖏᑐᖓ.’

• ᓇᑯᕐᒦᒃ ᖃᐅᔨᑎᒐᕕᖕᖓ ᐱᔭᕆᐊᑐᔪᒦᒍᑕᐅᓲᖑᒻᒪᑦ ᐊᒥᓱᓄᑦ ᑕᒪᓐᓇ.

• ᖃᐅᔨᒪᖃᑦᑕᓲᖑᕗᖓ ᐃᓄᓐᓂᒃ ᓄᓇᒃᑰᔫᒥᒃ ᐱᓇᓱᕝᕕᒥᓂᑦ ᐊᑐᑫᓐᓇᖃᑦᑕᓲᓂᒃ ᕿᑲᑫᓐᓇᓂᕐᒥᓂ ᐁᑦᓯᒍᑎᒋᑦᓱᒍ ᒪᒥᓴᐅᑎᒥᓂᒃ ᐄᖃᒐᕐᓂᒃ. ᐃᒻᒪᖄ ᐊᖓᔪᕐᖄᑦ ᖃᓄᐃᑦᓴᕋᔭᖕᖏᑐᖅ ᑕᒪᑐᒥᖓ?

• ᐋᓐᓂᐊᓯᐅᕐᑎᒥᒃ ᐊᐱᕆᒍᓐᓇᕆᕗᒍᒃ ᐊᓂᕐᕋᓄᑦ ᐳᓛᕆᐊᕈᓐᓇᒪᖔᓐᓄᒃ ᑌᒣᓘᖏᓐᓇᓕᒫᓲᖑᖕᖏᑲᓗᐊᕐᓱᑕ. ᖃᑦᓯᖑᒥ ᐅᓪᓗᑯᑦ ᐊᓂᕐᕋᓯᒪᓲᖑᕕᑦ?

• ᓇᑯᕐᓴᖁᖓ ᖃᓄᐃᓕᖓᐅᑎᒋᓂᐊᕐᑕᑎᓐᓂᒃ ᑐᑭᑖᖃᑎᒌᒐᓐᓄᒃ. ᐋᓐᓂᐊᓯᐅᑎᑑᒪᒋᐊᖃᕐᓃᑦ ᐱᔭᕆᐊᑐᔫᖁᑦᔭᖏᓐᓇᑎᒍ.

ᐃᓅᓯᖅ

‘ᐃᓱᐃᓪᓘᒐᓚᒃᑯᖓ ᐱᓇᓱᕐᖃᔭᖕᖏᑑᓚᖓᓂᕋᓂᒃ ᐃᓄᓐᓃᑌᓕᒋᐊᖃᕐᓂᕋᓂ’

• ᑖᓐᓇ ᐃᓱᒫᓗᒍᑎᓪᓚᕆᐅᓲᖅ.

• ᑕᒪᓐᓇ ᐅᖃᐅᓯᕆᒍᒪᔦᑦ ᐳᕙᓪᓗᑐᓕᕆᔨᓄᑦ ᐋᓐᓂᐊᓯᐅᕐᑎᓄᑦ? ᐃᑲᔪᕈᓐᓇᕋᔭᕐᖂᕋᑦᑕ ᑯᐊᐸᒃᑯᓂᑦ ᓂᐅᕕᕐᓂᐊᕈᑎᑦᓴᑎᒍᑦ ᓂᕿᓯᒋᐊᕐᑐᑕᐅᖃᑦᑕᓗᑎᓪᓘᓃᑦ. ᐊᖏᔫᖕᖏᑑᒐᓗᐊᖅ ᐃᑲᔪᕐᓯᐊᐱᒍᓐᓇᒪᑦ.

• ᐃᑲᔪᕐᓯᒐᔭᕈᓇᑦᓴᑐᖅ ᐋᓐᓂᐊᓯᐅᕐᑎ ᐅᖄᕕᖃᕐᐸᑦ ᐱᓇᓱᕝᕕᓂᒃ ᑐᑭᓯᔭᐅᑎᑦᓯᓗᓂ ᖃᓄᐃᑦᑐᒦᒻᒪᖔᑉᐱᑦ? ᐅᓪᓗᓂᒃ ᖃᓂᒪᓂᕐᒨᓕᖓᔪᓂᒃ ᐱᑕᖃᕐᒪᖔᑉᐱᑦ ᐱᕙᓪᓕᖁᑎᓂᓪᓘᓃᑦ ᑮᓇᐅᑦᔭᓴᕈᓐᓇᓂᐊᕋᕕᑦ ᐃᓄᓐᓃᑌᓕᓂᕐᓂ.

ᓇᕐᕈᓇᕐᑎᓯᓂᖅ

‘ᐃᓄᐃᓪᓘᑐᐹᓘᕗᖓ. ᐃᓄᐃᑦ ᐳᓛᕆᐊᕈᒪᖃᑦᑕᖏᒻᒪᑕ ᐅᕙᓐᓂᒃ ᐳᕙᓪᓗᓕᕐᓂᐊᖑᕋᒥᒃ.’

• ᐃᓛᓂᐅᖕᖏᑑᒐᓗᐊᖅ ᑌᒣᑦᑐᒦᒐᕕᑦ. ᐊᓯᑎᑦ ᐳᕙᓪᓗᓱᑎᒃ ᑌᒣᑦᑐᑰᕐᓯᒪᓂᕋᕐᒥᒪᑕ.

• ᐃᓄᓐᓃᑌᓕᒋᐊᖃᕈᓐᓀᕋᕕᑦ, ᐃᓱᒪᓗᒋᐊᑐᕈᓐᓀᖁᑎᑦ ᐳᕙᓪᓗᓚᖀᓚᖓᑦᔭᖏᓐᓇᕕᑦ ᐊᓯᑎᓐᓂᒃ

• ᑭᓇᑐᐃᓐᓇᒧᑦ ᑕᑯᑦᑌᓕᔭᐅᒍᕕᑦ, ᐃᕐᙯᑎᒍᓐᓇᓯᐊᕐᑕᑎᑦ ᐃᓄᓐᓃᑌᓕᒋᐊᑐᕈᓐᓀᓂᕐᓂᒃ ᑲᑉᐱᐊᓱᖁᖕᖏᓗᒋᓪᓗ ᓴᓂᓐᓂᖐᐊᖅ.

ᓱᓇᓱᐊᕐᓃᑦ

ᓱᐴᕈᓯᔭᕐᑐᐹᓗᖃᑦᑕᖁᖓ. ᓄᕐᖃᕋᓱᑦᓯᒪᒐᓗᐊᕐᓱᖓ ᐱᒋᐊᓕᕐᕿᓯᒪᒐᒪ. ᐳᕙᒃᑲ ᐃᓱᐃᓪᓘᓂᕐᓴᐹᓗᓕᕐᑐᑦ, ᐋᕐᕿᐸᓪᓕᐊᖏᓪᓚᖔ?

• ᓇᑯᕐᒦᒃ ᑕᒪᓐᓇ ᐊᐱᕆᐅᑎᒋᒐᕕᐅᒃ!

• ᖃᐅᔨᒪᒐᕕᑦ, ᓱᐴᕈᑎᒃ ᓱᒃᑯᐃᓲᖑᒻᒪᑦ ᐳᕙᓐᓂᒃ ᐳᕙᓪᓗᖃᒻᒥᐅᒐᕕᓪᓗ ᐃᒻᒪᖄ ᐳᕙᑎᑦ ᐊᓂᕐᑎᕆᓃᓪᓗ ᑌᒪᑦᓯᐊᖏᑦᑑᓚᕿᔪᖅ ᒪᒥᒐᓱᐊᖏᓐᓇᕋᕕᑦ ᐳᕙᓪᓗᑐᕕᓂᐅᑦᓱᑎᑦ.

• ᐁᑦᑐᑑᑕᐅᒍᓐᓇᑐᒥᒃ ᐳᕙᓪᓗᓂᕆᓚᐅᕐᑌᑦ ᓱᒃᑯᐃᓯᒪᑐᐃᓐᓇᕆᐊᓕᒃ ᐳᕙᑎᓐᓂᒃ ᑎᒦᓪᓗ ᐳᕙᓪᓗᓇᐅᑉ ᖁᐱᕐᕈᖏᓐᓂᒃ ᐱᑕᖃᖕᖏᓂᕐᓴᐅᓕᕋᓗᐊᕐᓱᓂ ᓱᒃᑯᑎᕆᒍᓀᕋᓗᐊᕐᑎᓗᒋᓪᓗ ᐳᕙᑎᓐᓂᒃ, ᓱᒃᑯᑕᐅᓂᕕᓂᖏᑦ ᐳᕙᑉᐱᑦ ᓄᐃᑕᖏᓐᓇᖁᕐᑐᑦ. ᐅᑦᑐᕋᐅᑎᖃᕈᓐᓇᑐᖓ ᐃᒫᒃ, ᐊᒡᒉᑦ ᑭᓕᕐᑕᕕᓂᕆᑦᓴᕈᕕᐅᒃ ᐅᔭᕋᕐᒧᑦ ᐹᓪᓚᓱᑎᑦ, ᐅᔭᕋᖅ ᐊᒡᒐᓃᒍᓐᓀᕋᓗᐊᕐᑎᓗᒍ, ᑭᓯᐊᓂ ᑎᒦᑦ ᒪᒥᑦᑎᓯᑦᓯᐊᕋᑕᖕᖏᑐᖅ ᑭᓪᓕᓂᒃ.

• ᖃᓄᐃᖕᖏᓯᐊᕆᐊᖃᕐᓃᑦ ᐱᒻᒪᕆᐊᓗᒃ ᐃᓱᕐᕆᓕᕐᓂᓗ ᐃᓚᒋᔭᐅᓪᓚᕆᑦᓱᓂ ᑕᒪᑐᒧᖓ. ᐱᐅᔫᒐᔭᕐᑐᖅ ᑕᒪᓐᓇ ᐅᖃᐅᓯᕆᒍᕕᐅᒃ ᐳᕙᓪᓗᑐᓕᕆᔨᒧᑦ ᐋᓐᓂᐊᓯᐅᕐᑎᒧᑦ ᖃᓄᖅ ᐃᓱᒪᖃᕐᒪᖔᑕ ᑐᑭᓯᑎᑕᐅᓂᐊᕋᕕᑦ. ᒪᕐᕉᓗᓅᒃ ᐊᐱᕆᒋᐊᕐᑐᓚᐅᕐᓚᕗᒃ?