ᑖᓐᓇ ᐊᕕᑦᓯᒪᓂᖅ ᐱᓯᒪᔪᖅ ᐃᓱᒫᓗᓚᕿᐅᑕᐅᒍᓐᓇᓲᓂᑦ ᐅᖃᐅᓯᖃᓕᕋᕕᑦ ᐊᑐᓃᕐᑎᑐᓂᒃ ᑲᐅᕕᒍᓂᓚᕐᑐᓂᒃ ᐊᒻᒪᓗ ᑭᐅᒍᑕᐅᑐᐃᓐᓇᕆᐊᖃᓲᓂᒃ:

ᖃᓄᐃᖕᖏᓂᖅ

"ᐃᓂᕐᑑᒪᓕᕐᑐᖓ ᖃᓄᖅ ᐳᕙᓪᓗᓇᖅ ᖃᓄᐃᓕᖕᙰᓚᖀᓂᐊᕐᓂᖓᓂᒃ ᖃᓄᐃᖕᖏᓂᕐᓃᕙᖓ."

• ᑭᖑᓂᕐᒥ ᐃᓄᐃᑦ ᐳᕙᓪᓗᓂᕋᕐᑕᐅᓱᑎᒃ ᐅᖃᐅᑦᔭᐅᓯᒪᔪᑦ ᐃᓘᓐᓇᑎᒃ ᐊᑦᔨᒌᖕᖏᑐᓂᒃ ᐃᑉᐱᒍᓱᓚᕿᓯᒪᔪᑦ. ᐃᓂᕐᑑᒪᑦᓱᑎᒃ, ᑯᑮᖓᑦᓱᑎᒃ, ᐊᓕᐊᑦᓱᑎᒃ ᐅᕝᕙᓘᓐᓃᑦ ᓱᒻᒪᖔᒻᒥᒃ ᖃᐅᔨᒋᐊᒥᒃ ᐊᓕᐊᖔᑐᐃᓐᓇᓕᕐᓱᑎᒃ ᑐᑭᖃᑦᓯᐊᑐᓂᒃ ᖃᐅᔨᔭᐅᒍᑎᒥᓂᒃ ᐅᖃᐅᑦᔭᐅᒋᐊᒥᒃ, ᐊᓕᐊᖕᖏᑑᓕᕐᓱᑎᒃ, ᓂᖕᖓᓱᑎᒃ. ᐊᒻᒪᓗ ᖃᓄᐃᖕᖏᑐᖅ ᐃᑉᐱᒍᓱᒋᐊᒥᒃ ᐊᒥᓱᐃᓂᒃ ᐃᑉᐱᒍᓱᓚᕿᐅᑎᐅᒍᓐᓇᑐᓂᒃ ᐊᑕᐅᑦᓯᑯᑦ.

• ᑌᒫᑦᓭᓇᖅ, ᑭᐅᒋᐊᖃᖕᖏᑐᑎᑦ ᐃᓱᕐᕆᖏᒃᑯᕕᑦ ᑭᐅᒍᑎᖃᕆᐊᖅ, ᑭᓯᐊᓂ ᐅᓪᓗᓂ ᐊᒥᓲᖕᖏᑐᓂ ᖃᐅᔨᓯᒪᓕᕋᕕᑦ, ᑕᒐᑕᒐ ᖃᓄᖅ ᐃᑉᐱᒍᓱᓕᕐᕿᑦ ᐳᕙᓪᓗᕆᐊᒥᒃ?

• ᐃᑉᐱᒍᓱᒋᐊᖅ ᑌᒫᒃ ᐱᐅᓯᑐᐃᓐᓇᓯᐊᖅ. ᓇᑯᕐᒦᒃ ᓱᓕᑦᓯᐊᓱᑎᑦ ᐅᖃᕋᕕᑦ.

ᐋᓐᓂᐊᓯᐅᑏᑦ ᐄᒉᑦ

"ᐱᑦᓯᐊᖃᔭᖕᖏᑐᒻᒪᕆᐊᓘᔪᖓ ᐃᕐᖃᐅᒪᓂᐅᔭᓲᒍᖕᖏᓇᒪ ᐄᒐᕐᑐᕆᐊᖃᕆᐊᒥᒃ."

• ᑐᑭᓯᑦᓯᐊᐸᒋᑦ. ᑌᒫᑦᓭᓇᕋᒪ. ᐱᐅᔪᖅ ᐃᕐᖃᐅᒪᒍᓐᓇᓗᒍ ᑖᑦᓱᒥᖓ ᐊᑑᑎᓚᖓᒐᕕᑦ ᐱᑦᔪᑎᖃᕐᓱᑎᑦ ᖃᓄᐃᖕᖏᓂᕐᓃᕕᑦ ᐊᒻᒪᓗ ᑎᒥᓐᓃᕕᑦ ᐊᓂᑎᓗᒋᑦ ᐳᕙᓪᓗᓇᐅᑉ ᖁᐱᕐᕈᐊᕈᓯᖏᑦ.

• ᖃᐅᔨᓯᒪᔪᖓ ᐃᓄᐃᑦ ᐃᑲᔪᕐᓯᔭᐅᒍᓐᓇᓲᒍᒋᐊᖏᑦ ᐳᐃᒍᕇᒃᑯᑎᖃᕐᓱᑎᒃ ᐃᕐᙯᑎᑦᓯᐅᑎᒥᒃ ᐅᖄᒍᑎᒥᓃᑦᑎᓗᒋᑦ, ᐳᐃᒍᖃᑦᑕᓂᐊᖕᖏᓇᕕᑦ ᖁᐱᕐᕈᐊᕈᕐᓂᒃ ᑐᖁᓭᒍᑎᓂᒃ ᐄᓯᒋᐊᖃᕐᓗᑎᑦ ᐅᕝᕙᓘᓐᓃᑦ ᐄᒐᑎᑦ ᐅᓪᓛᕈᒥᑕᑦᓴᔭᕐᑐᓂᐊᕐᑕᐱᑦ ᑭᓪᓕᖓᓃᑦᑎᖃᑦᑕᓗᒋᑦ.

ᐃᓄᑐᐊᒃᑯᕕᒻᒦᑐᖅ

"ᕿᑐᕐᖓᑲ ᐊᓇᕐᕋᓯᒪᔪᑦ ᐊᒻᒪᓗ ᐊᓯᐊᓅᕐᕕᓴᖃᕐᓇᖓ ᐅᕝᕙᓘᓐᓃᑦ ᐊᓇᕐᕋᒥᑕ ᐊᓯᐊᓅᕐᖃᔭᕋᑎᒃ."

• ᐋᐃᕼᐊᐃ, ᐃᓄᑐᐊᒃᑯᕕᒻᒦᓂᖅ ᐊᓇᕐᕋᓯᒪᑦᓱᓂ ᓇᓗᓇᓲᖅ. ᐊᓕᐊᓇᕐᐳᖅ ᖃᓄᐃᖕᖏᓯᐊᕐᓂᖏᓐᓂᒃ ᐃᓱᒪᒋᔭᖃᕐᒥᒐᕕᑦ.

• ᐃᒣᓗᑭᓲᖅ, ᐊᓇᕐᕋᓯᒪᑦᓱᑎᒃ ᐃᓄᑐᐊᒃᑯᕕᒻᒦᑐᑦ ᑐᑭᖃᕐᒪᑦ ᐃᓄᐃᑦ ᐃᓕᑦᓯᓂ ᑲᑎᒪᕙᒃᑲᕕᒃᑭᑦ, ᓅᕝᕕᒋᖕᖏᑲᓗᐊᕈᕕᒃᑭᑦ ᖃᓄᐃᖕᖏᒪᑕ. ᖃᐅᔨᒐᓱᐊᓚᖓᔭᕗᑦ ᖃᐅᔨᓴᕈᑏᑦ ᐃᓚᖏᓐᓂᒃ ᐳᕙᓪᓗᓇᕐᒧᑦ ᐊᑑᑎᒋᐊᖃᕐᒪᖔᑕ ᐊᒻᒪᓗ ᓱᕐᖁᐃᓯᓪᓚᕆᓪᓗᑕ ᖃᓄᐃᖕᖏᓂᖏᓐᓂᒃ.

• ᐱᐅᓂᕐᓴᐅᓚᖓᕐᖂᑐᖅ ᐃᓕᓐᓄᑦ ᐃᓕᒃᑯᑦ ᐃᓪᓗᐊᕈᓯᕐᒦᖃᑦᑕᕈᕕᑦ ᓯᓂᕝᕕᒋᖃᑦᑕᓗᒍ ᐊᒻᒪᓗ ᐱᕕᑦᓴᐱᑦ ᐅᓄᕐᓂᓴᖏᓐᓂ ᓇᔪᖃᑦᑕᓗᒍ. ᑌᒣᒍᓐᓇᓚᖓᕖᑦ?

• ᐃᒻᒪᖄ ᐱᐅᔫᓚᖓᔪᖅ ᐸᕐᓀᓯᒪᐅᑎᑦᓯᐊᒍᓗᓂ ᐃᓪᓗᐊᕈᓯᕐᓃᕕᑦ ᓅᖃᑦᑕᓚᖓᒍᓐᓀᓗᑎᑦ ᕿᑐᕐᖓᑎᑦ ᐊᓇᕐᕋᓯᒪᓕᕐᐸᑕ, ᐊᒻᒪᓗ ᐃᓕᓴᕐᓂᖏᓐᓂ ᐃᓪᓗᓯᓐᓂ ᐃᓪᓗᐊᕈᓯᐅᑉ ᐊᓯᖏᓐᓃᖃᑦᑕᓗᑎᑦ ᐊᒻᒪᓗ ᐃᒐᓛᑦ ᐃᓚᖏᑦ ᐅᒃᑯᐃᖔᕐᑎᖃᑦᑕᓗᒋᑦ ᓂᐅᕋᑦᓴᖅ ᓂᒪᕐᓂᐊᒪᑦ?

• ᐋᐊ, ᐊᓕᐊᓇᖕᖏᓚᕆᑦᑑᒐᓗᐊᖅ, ᒐᓗᐊᕐᓱᓂ 2-ᑐᐃᓐᓈᓂ ᐱᓇᓱᐊᕈᓰᓐᓂ ᑌᒣᖃᑦᑕᕆᐊᖃᓚᖓᔪᑎᑦ.

ᐊᓯᒥᓂᒃ ᐅᖑᒪᑦᓯᓂᖅ

"ᐃᓂᕐᑑᒪᔪᖓ ᑐᑲᖃᑦᑕᓚᖓᒋᐊᒥᒃ ᐃᓄᓐᓃᓗᖓ ᑌᒪ ᓯᐊᒻᒪᑎᑦᓯᓚᕿᓂᐊᓕᕋᒪ ᐳᕙᓪᓗᓇᕐᒥᒃ ᑌᒃᑯᓄᖓ ᐊᒻᒪᓗ ᐸᑦᓯᑎᖕᖑᓗᖓ ᖃᓂᒻᒪᑎᓚᕿᒐᒃᑭᑦ."

• ᑐᑭᓯᕗᖓ. ᐊᒥᓱᑦ ᐃᓄᐃᑦ ᐳᕙᓪᓗᓯᒪᔪᑦ ᑌᒫᑦ ᐃᓱᒪᓲᒍᒻᒥᔪᑦ.

• ᖁᐱᕐᕈᐊᕈᖏᑦ ᓯᓂᑦᑐᓂᒃ ᐳᕙᓪᓗᓇᕐᑕᖃᕐᑐᑎᑦ (ᐅᕝᕙᓘᓐᓃᑦ ᖁᐱᕐᕈᐊᕈᖏᑦ ᓂᒪᕐᑐᓂᒃ ᐳᕙᓪᓗᓇᕐᑕᖃᕐᑐᑎᑦ ᐊᒻᒪᓗ ᐃᓄᑐᐊᒃᑯᕕᒻᒦᒍᓐᓀᓯᒪᓕᕐᓱᑎᑦ) ᑐᑭᖃᓪᓚᕆᑦᑐᖅ ᑖᓐᓇ ᐁᑦᑐᐃᓂᐅᔭᕈᓐᓀᓂᕐᓃᕕᑦ. ᐳᕙᓪᓗᓇᕐᒥᒃ ᓯᐊᒻᒪᑎᑦᓯᓂᐅᔭᕈᓐᓀᑐᑎᑦ ᐃᓄᑐᐊᒃᑯᕕᒻᒦᒋᐊᖃᕈᓐᓀᕋᕕᑦ.

• ᐃᓄᐃᑦ ᐅᖃᐅᑎᓯᒪᑐᐃᓐᓇᕆᐊᓕᑎᑦ ᐳᕙᓪᓗᕆᐊᕐᐱᑦ, ᓱᕐᖁᐃᓯᑎᑦᓯᐊᕈᓐᓇᑕᑎᑦ ᐳᕙᓪᓗᓇᕐᒥᒃ ᐁᑦᑐᓂᐅᔭᕈᓐᓀᕋᕕᒃᑭᑦ.

ᐋᓐᓂᐊᓯᐅᑎᒃᑯᓄᑦ ᙯᓂᖅ

"ᐱᔭᕐᓃᓘᖃᑦᑕᓂᐊᕐᑐᖓ ᐅᓪᓗᑕᒫᑦ ᐋᓐᓂᐊᓯᐅᑎᒃᑯᓕᐊᕆᐊᖃᕐᓗᖓ."

• ᐊᓕᐊᑉᐳᖓ ᑖᓐᓇ ᐅᖃᕋᕕᐅᒃ ᐃᓄᓐᓄᑦ ᐊᒥᓱᓄᑦ ᐱᔭᕐᓃᑐᒃᑰᕈᑕᐅᓲᒍᒻᒥᒪᑦ.

• ᑭᖑᓂᕐᒥ, ᖃᐅᔨᓯᒪᔪᖓ ᐃᓄᓐᓂᒃ ᐊᑦᑕᑐᕐᑎᑕᐅᒍᒪᓯᒪᔪᓂᒃ ᐱᓇᓱᐊᕐᑐᑦ ᐃᖏᕐᕋᐅᑎᖏᓐᓂᒃ ᕿᑲᑫᓐᓇᓕᕈᑎᒃ ᐁᑦᓯᖃᑦᑕᓗᑎᒃ ᕿᑲᕐᓂᖏᓐᓂᒃ ᖁᐱᕐᕈᐊᕈᕐᓂᒃ ᑐᖁᓭᒍᑎᓂᒃ ᐄᓯᒋᐊᕐᑐᕈᑎᒋᓗᒍ. ᐊᖓᔪᕐᖄᑦ ᑌᒫᒃ ᕿᓄᕕᒋᒐᓗᐊᕈᕕᐅᒃ ᖃᓄᐃᑦᓴᖏᑦᑑᒐᔭᕈᓇᑦᓴᑐᖅ?

• ᑌᒣᒍᓐᓇᑐᐃᓐᓇᐅᓲᒍᖕᖏᓇᑦᑕ, ᐋᓐᓂᐊᓯᐅᑎᓂᒃ ᕿᓄᕕᖃᕈᓐᓇᒥᔪᒍᑦ ᐃᓕᓐᓂᒃ ᐊᓇᕐᕋᓯᒪᑎᓪᓗᑎᑦ ᐁᕕᖃᖔᖃᑦᑕᕈᓐᓇᒪᖔᑦᑕ? ᖃᐅᔨᒪᒍᓐᓇᐱᑦ ᖃᑦᓯᖑᕐᑎᓗᒍ ᑌᒪᖕᖓᑦ ᐊᓇᕐᕋᓯᒪᖃᑦᑕᓂᐊᕐᓂᓃᕕᑦ?

• ᐊᓕᐊᑉᐳᖓ ᐋᕐᖀᖃᑎᒌᒍᓐᓇᕋᓐᓄᒃ ᑖᑦᓱᒥᖓ. ᐱᐅᓂᕐᐸᐅᒪᑦ ᖁᐱᕐᕈᐊᕈᕐᓂᒃ ᑐᖁᓭᒍᑎᓂᒃ ᐄᓯᑦᓯᐊᖃᑦᑕᕆᐊᖃᕐᓃᑦ ᐱᔭᕆᐊᑭᓪᓕᑎᕈᓐᓇᕕᖓᓄᑦ ᐱᔭᕆᐊᑭᓪᓕᑎᕋᓱᐊᕋᑦᑎᒍ.

ᐃᓅᓯᖅ

"ᐊᕐᓱᕈᕈᑎᖃᒐᓛᑦᑐᖓ ᐱᓇᓱᐊᕐᖃᔭᓚᖓᖕᖏᒋᐊᕐᓂᖅ ᐃᓄᑐᐊᒃᑯᕕᒻᒦᒋᐊᖃᕐᓂᓂ."

• ᑕᒪᓐᓇ ᐃᓱᒫᓘᑎᐅᒍᓐᓇᓲᒍᒻᒪᑦ ᑐᑭᓯᕗᖓ.

• ᖃᓄᐃᑦᓴᓚᖓᖕᖏᒋᐊᒥᒃ ᐃᓱᒪᕕᑦ ᑖᑦᓱᒥᖓ ᐅᖃᐅᑎᒍᒃᑭᑦ ᐳᕙᓪᓗᓇᓕᕆᔩᑦ? ᐃᑲᔪᕈᓐᓇᑐᑦᓴᐅᒐᑦᑕ ᑯᐊᐸᒃᑯᓂᑦ ᓂᐅᕕᕈᑎᑦᓴᓄᑦ ᐅᕝᕙᓘᓐᓃᑦ ᓂᕿᓯᐅᑎᑦᓴᓄᑦ. ᓱᓇᓕᒫᒍᕐᖃᔭᖕᖏᑑᒐᓗᐊᑦ ᑭᓯᐊᓂ ᒥᑭᔫᒐᓗᐊᕐᓱᓂ ᐃᑲᔪᕐᓯᐅᑎᐅᒍᓐᓇᑐᖅ.

• ᐃᑲᔪᕐᓯᓚᖓᔪᖅ ᐋᓐᓂᐊᓯᐅᑎᒃᑯᑦ ᐅᖄᕕᖃᕐᐸᑕ ᐱᓇᓱᕝᕕᓃᕕᑦ ᑐᑭᓯᑎᓗᒋᑦ ᖃᓄᐃᓕᖓᓂᕐᓃᕕᑦ? ᖃᐅᔨᒐᓱᐊᕐᕕᒋᓗᒍ ᐅᓪᓗᖃᕐᒪᖔᑉᐱᑦ ᖃᓂᒪᓗᑎᑦ ᐱᓇᓱᐊᖕᖏᑑᑫᓐᓇᕕᑦᓴᓂᒃ ᐅᕝᕙᓘᓐᓃᑦ ᐱᕙᓪᓕᖁᑎᑦᓴᖃᕐᒪᖔᑉᐱᑦ ᐃᓄᑐᐊᒃᑯᕕᒻᒦᓗᑎᑦ ᑌᒪᖕᖓᑦ ᐊᑭᓕᕐᑐᑕᐅᖕᖏᑑᓚᖓᖕᖏᓇᕕᑦ.

ᖁᐃᓇᒋᔭᖃᕐᓂᖅ

"ᐃᓄᐃᓴᕆᐊᒥᒃ ᐃᑉᐱᒍᓱᓪᓚᕆᑦᑐᖓ. ᐃᓄᐃᑦ ᐅᕙᓐᓄᑦ ᐳᓛᕆᐊᕈᒪᖃᑦᑕᖏᑦᑐᑦ ᐳᕙᓪᓗᓇᕐᒥᒃ ᐁᑦᑐᑕᐅᑦᔭᖒᕐᓱᑎᒃ."

• ᓯᕐᓈᐹ ᑌᒣᑦᑐᑰᕐᑐᒥᒃ. ᐊᓯᑎᑦ ᐃᓄᐃᑦ ᐳᕙᓪᓗᓯᒪᔪᑦ ᑌᒫᑦᓭᓇᖅ ᐅᖃᖃᑦᑕᓯᒪᒻᒥᔪᑦ.

• ᑕᒐ ᐃᓄᑐᐊᒃᑯᕕᒻᒦᒋᐊᖃᕈᓐᓀᕋᕕᑦ, ᐊᓯᓐᓃᕕᑦ ᐳᕙᓪᓗᓇᕐᒥ ᐁᑦᑐᐃᓂᐅᔭᕐᓂᓃᕕᑦ ᐃᓱᒫᓘᑎᖃᕆᐊᖃᕈᓐᓀᖁᑎᑦ.

• ᑭᓇᑐᐃᓐᓇᒧᑦ ᑕᑯᔭᐅᒍᒪᒍᓐᓀᕈᕕᑦ, ᐃᕐᙯᑎᒍᓐᓇᑕᑎᑦ ᐊᓂᒍᐃᓯᒪᓕᕋᕕᑦ ᐃᓄᑐᐊᒃᑯᕕᒻᒦᒋᐊᖃᕐᓂᓃᕕᑦ ᐊᒻᒪᓗ ᓴᓂᓐᓃᕖᒐᓗᐊᕈᑎᒃ ᐃᓂᕐᑑᒪᒋᐊᖃᕈᓐᓀᓱᑎᒃ.

ᓱᖃᑦᓯᐅᑏᑦ

"ᑖᒃᑯᓇᓂ ᐅᓪᓗᓂ ᑐᐹᑭᒻᒪᕆᖃᑦᑕᓕᕐᖁᖓ. ᑭᖑᓂᕐᒥ ᓄᖃᕋᓱᐊᕐᓯᒪᒐᓗᐊᕐᓱᖓ ᑭᓯᐊᓂ ᑕᒐᑕᒐ ᑐᐹᑭᒍᒪᕐᕈᐊᖃᑦᑕᑐᖓ. ᐳᕚᒃᑲ ᑭᖑᓂᕐᒥᓂᑦ ᐱᐅᖕᖏᓂᕐᓴᐅᔮᓕᕐᑑᒃ, ᐋᕐᕿᐸᓪᓕᐊᕗᖔ?"

• ᐊᓕᐊᑦᑐᖓ ᑖᑦᓱᒥᖓ ᐊᐱᕐᓲᑎᖃᕋᕕᑦ!

• ᖃᐅᔨᒪᒐᕕᑦ, ᑐᐹᑭᐅᑉ ᓱᒃᑯᐃᓲᒍᒋᐊᖓᓂᒃ ᐳᕙᓐᓃᕕᑦ ᐊᒻᒪᓗ ᐳᕙᓪᓗᓇᕐᒥᒃ ᐊᓂᒍᐃᒐᑖᕐᓱᑎᑦ ᐃᒻᒪᖄ ᐳᕚᒃᑭᑦ ᐊᒻᒪᓗ ᐊᓂᕐᑎᕆᓃᑦ ᐃᑯᓪᓚᐅᒥᔫᔮᖕᖏᐅᑎᓖᒃ ᒪᒥᑦᓯᖏᓐᓈᕋᕕᑦ ᐳᕙᓪᓗᑐᕕᓂᐅᑦᓱᑎᑦ

• ᐊᑑᑎᔭᕐᓃᕕᓪᓕ, ᓂᒪᕐᑐᓂᒃ ᖁᐱᕐᕈᐊᕈᖏᑦ ᐳᕙᓪᓗᓇᖅ ᓱᒃᑯᐃᓯᒪᑐᐃᓐᓇᕆᐊᓕᒃ ᐳᕙᓐᓃᕕᑦ ᐊᒻᒪᓗ ᑎᒥᓐᓃᕕᑦ ᐃᑭᓐᓂᓴᐅᓕᕐᑑᒐᓗᐊᑦ ᐳᕙᓪᓗᓇᐅᑉ ᖁᐱᕐᕈᐊᕈᓯᖏᑦ ᐊᒻᒪᓗ ᐳᕙᓐᓃᕕᑦ ᐹᓐᓂᒍᓐᓀᓱᑎᒃ, ᓱᒃᑯᑕᐅᓯᒪᓃᑦ ᑭᖑᓂᕐᒥ ᓄᐃᑕᖏᓐᓈᑐᐃᓐᓇᕆᐊᓕᒃ. ᐃᓱᒪᒋᒍᓐᓇᑌᑦ ᐊᒡᒐᑯᑦ ᑭᓕᕐᑐᕕᓂᐅᓗᑎᑦ ᐅᔭᕋᕐᒧᑦ, ᐅᔭᕋᖅ ᐊᒡᒐᓃᕖᒍᓐᓀᕋᓗᐊᕐᑎᓗᒍ, ᑭᓯᐊᓂ ᑎᒦᑦ ᐱᕕᑦᓴᖃᕋᑕᖕᖏᑐᖅ ᒪᒥᒍᓐᓇᓯᑎᑦᓯᓗᓂ ᑭᓪᓕᓃᕕᑦ.

• ᖃᓄᐃᖕᖏᓃᑦ ᐱᒻᒪᕆᐊᓗᒃ ᐊᒻᒪᓗ ᐃᑯᓪᓚᐅᒥᓂᕐᒥᒃ ᐃᑉᐱᒍᓱᓐᓂᖅ ᑖᑦᓱᒧᖓ ᐃᓚᐅᑦᓱᓂ. ᐱᐅᔫᓚᖓᔪᖅ ᑖᑦᓱᒥᖓ ᐅᖃᐅᑎᒍᕕᐅᒃ ᐳᕙᓪᓗᓇᓕᕆᔨ ᐋᓐᓂᐊᓯᐅᑎᒃ ᖃᓄᑐᐃᓐᓇᖅ ᐃᒣᒍᓐᓇᐳᑏᓚᒍᓐᓇᒪᖔᑦ ᖃᐅᔨᒐᓱᐊᕐᕕᒋᓗᒍ. ᑕᒐᑕᒐ ᐱᕕᑦᓴᖃᕐᐱᑦ ᐊᑕᐅᑦᓯᑯᑦ ᑕᑯᓂᐊᕈᓐᓇᓕᕐᓱᒍ ᒪᓕᑦᑕᒋᓐᓂ?